► Матай 19:16—22 оқып шығыңыз. Исаның бұл адамға берген жауабында сізді не таң қалдырады? Мәңгілік өмірге қалай қол жеткізуге болатынын сұраған адамға досыңыздың осылай жауап бергенін естісеңіз, досыңызға нені түсіндіргіңіз келетін еді?

Мынаны елестетіп көріңіз: сіздің денсаулығыңыз жақсы, бірақ досыңыз сізге келіп, айықпас дерттің емін сатып алғанын айтады.[1] Оны сатып алу үшін ол үйін және өзінде бардың бәрін сатып жіберді. Ол дәріні сіз үшін сатып алды.

► Досыңыз сізге осындай сый берсе, оған не айтар едіңіз?

Сіз оның жомарттығы үшін алғыс айтасыз, бірақ оның сыйының мәнін түсінбейтін едіңіз. Неге сізге қажет емес нәрсені сатып алу үшін ол сондай құн төледі?

Енді басқа оқиғаны елестетіңіз. Сіз дәрігерге барып, айықпас дертке шалдыққаныңызды білдіңіз. Дәрі-дәрмектің бағасы тым қымбат, оны сатып алуға қаражатыңыз жоқ. Үйге қайтып бара жатып, өлім туралы ойлайсыз. Отбасыңыз сізден айырылатынын және өмірде қалаған арман-мақсаттарыңызға енді жете алмайтыныңызды түсінесіз.

Сол кезде досыңыз келіп, сізге дәрі сатып алу үшін өзінде бар нәрсенің бәрін бергенін айтады. Сіздің мәселеңіздің шешімі табылғандықтан, сіз бұл істі бағалайсыз. Оның сыйы – сіздің өміріңіз.

Қазір дүние жүзіндегі адамдардың Ізгі хабарды естігенде қандай әсерде болатынын ойлап көріңіз. Ізгі хабар сөзі «жақсы хабар» деген мағынаны білдіреді, бірақ көп адамдар оның неліктен жақсы жаңалық екенін түсінбейді.

Жандос есімді адам бар деп елестетіп көріңіз. Оның досы оған: «Иса сенің күнәларың кешірілуі үшін құрбандық ретінде айқышта өлді», - дейді

Жандос былай ойлауы мүмкін: “Мен жаман адам емеспін. Мен достарыма және отбасыма жақсы қараймын. Неліктен менің күнәларым үшін осындай үлкен құн төленді? Неліктен кешірім соншалықты маңызды?” Жандос досының оны сондай жаман күнәкар деп санайтынына және оны кешіру үшін Исаның өлімі қажет екеніне ашулануы мүмкін.

Киелі кітап айқыш ағаштың адамдарды ренжітетінін айтады, өйткені адамдар өздерін ақтау жолын тапқысы келеді. Олар Исаның құрбандығына мұқтаж емеспіз деп ойлайды, ал айқыштағы құрбандықты ақымақтық деп есептейді.[2]

Ауруды емдеу мысалы сияқты, адамдар айқыштағы құрбандықты бағаламайды, өйткені олар оның не үшін қажет екенін түсінбейді.

Адамдарды Ізгі хабарға дайындаудың Киелі кітап көрсететін жолы — оларға бұл не үшін қажет екенін көрсету. Олар күнәкар екенін және жақын арада Құдай оларды соттайтынын түсінуі керек.

► Неліктен адам Ізгі хабарды естігенде қуануы керек?

Күнәкарлардың сотталып, жазаланатыны күнәкардың Ізгі хабарды естігеніне қуануының ең маңызды себебі болып табылады.

Құдай адамның бір рет өліп, содан соң қиямет сотының алдында тұратынын белгілеген.[1]

Сендерге шын айтамын: адамдар өздері айтқан әрбір жағымсыз сөздері үшін қиямет сотында жауап береді.[2]

► Аян 20:12-15 үзіндісінде берілген соттың сипаттамасын оқып шығыңыз.

Күнәкардың құтқарылуды қажет етуінің басты себебі – келешектегі сот.

Құдай адамдардың бәріне теріс жолдан қайтуды бұйырады, «Себебі Ол осы дүниені әділдікпен соттайтын күнін белгіледі».[3]

Егер адам өзінің күнәсінің ауыр екенін түсінбесе, ол құтқарылуды да қаламайды.

► Адамға күнәсының ауыр екенін түсінуге не көмектесе алады?

Көптеген адамдар Ізгі хабарға қызығушылық танытпайды, өйткені олар өздерін кінәлі деп санамайды. Киелі кітапта адамдардың көпшілігі өздерін жақсымыз деп санайтыны айтылған.[1] Егер сіз біреуден «сіз жақсы адамсыз ба, жоқ па деп сұрасаңыз», ол «иә» деп жауап береді және өз сөзін дәлелдеуге де дайын болады. Көптеген адамдар өздерінің күнәлары ауыр емес және оларды кешіру керек деп ойлайды. Бұл адамдарға рақымдылық пен кешірімді ұсынудың мағынасы жоқ.

Адам рақымға мұқтаж екенін түсінбес бұрын, өзінің күнәкар екенін сезініп, ар-ұждан арқылы әшкереленуі керек. Құдай күнәні көрсету үшін заң берді.

«Заң» термині арқылы біз ғибадатханада ғибадат етуді басшылыққа алатын Ескі өсиеттің талаптарын айтпаймыз. Сондай-ақ біз Исраилді басқаруға берілген, заңдар туралы айтып отырған жоқпыз. Біз Құдайдың әділдік стандарты туралы айтып отырмыз. Дәуіт патша 118-ші Забур жырында Құдайды және Құдайдың заңын қалай жақсы көретінін айтады, өйткені бұл Құдайдың киелі болмысынан шыққан.

Құдайдың заңы бізге қалай өмір сүру керектігін және біз Оған мойынсұнбағанымыздың кесірінен кінәлі болғанымызды көрсетеді. Заңды орындау арқылы ешкім ақтала алмайды,[2] өйткені бәрі бұрыннан күнә жасап келеді. Егер адам оны орындау арқылы құтқарыламын деп ойласа, ол заңды дұрыс қолданбайды.

Құдайдың заңы біздің өмірімізге бағыт-бағдар береді,[3] бірақ ол біздің құтқарылуымыздың құралы емес. Заң бізді құтқара алмайды, өйткені біздің болмысымыз заңды мүлтіксіз орындауға дәрменсіз.[4]

Заң Құдайдың жоспарындағы Ізгі хабарға қарсы емес. Киелі кітапта заңның күнәкардың құтқарылуға мұқтаж екенін түсіну мақсатына қызмет ететіні айтылған. Ізгі хабар заңды жоймайды[5] немесе оны біз үшін маңызсыз етпейді. Заң ежелгі уақытта ғана емес, әлі күнге дейін Ізгі хабарға жақсы дайындық ретінде қызмет етеді.

Заң «тәрбиеулеушіміз» болып, бізді Мәсіхке әкеледі.[6] Кейбір адамдар заңның уақыты бітті, енді рақым уақыты басталды деп санайды. Бірақ шындық мынада, әрбір адам рақымды түсінбес бұрын Құдайдың заңымен бетпе-бет келіп, сотталғанын түсінуі керек. Елші Пауыл: «Заң болмаса, күнә жасағанымды білмес едім», - деді”[7]

Пауыл заңның күнәкарлар өздерінің кінәсін көруі үшін берілгенін және заң арқылы олар ақтала алмайтынын атап өтті, өйткені заң арқылы адамдар өздерінің күнәкар екендерін түсінеді.[8] Әрбір адам «заң астында» болып, құтқарылуға ие болғанға дейін сотталады.

Ізгі хабар күнәларының ауырлығын түсінбейтіндерге жақсы жаңалық емес; бұл өзінің кінәлі екенін білетін және жақын арада Құдайдың соты алдында тұратынын білетін адам үшін жақсы жаңалық.

► Лұқа 18:10—14 оқып шығыңыз. Егер біреу парызшылға Құдайдың рақымының арқасында кешірімге ие бола алатынын айтса, оның жауабы қандай болар еді?

[1]Бүгінгі таңда көптеген Ізгі хабар таратушылар барлық адам күнә жасап, Құдайдың үкіміне лайық екеніне баса назар аударуды ұнатпайды.

Олар адамдарға олардың жаман екенін айтқысы келмейді.

Олар жағымсыз нәрселердің орнына жақсы нәрселер туралы сөйлескісі келеді.

Олар мәңгіліктің орнына құтқарылудың бір сәттік артықшылықтарын ұсынғысы келеді, өйткені олар осы дүниедегі нәрселерге қызығатын адамдармен араласады.

Олар Құдайдың заңын жаман нәрсе, құтқарылудың жауы, тек істермен құтқарылғысы келетін адамдар үшін ол маңызды нәрсе деп көрсетеді. Киелі кітапта заң игі және қасиетті делінген.[2] Құдайға ұнамды болғысы келетін адам Құдайдың заңдарын орындауға тырысады.[3]

Олар Құдайдың стандартын орындау мүмкін емес, сондықтан оны ұстанудың қажеті жоқ және адамдар өздерінің күнәлары үшін кінәлі емес деп санайды.

Мәселе мынада, егер адам өз кінәсін шынымен түсінбесе, ол шынайы түрде тәубеге келе алмайды. Ол өзінің қателік жасағанын түсінбейінше, істеген ісіне өкіне алмайды. Егер адам кешірім сұрағанда өзін күнәкармын деп санамаса, шын мәнінде ол Құдайдан өзінің адами кемшіліктерін қабылдауын ғана сұрайды.

Күнәкарлар күнәкар табиғатпен туылғаны үшін сотталмайды. Олар өздерінің әдейі жасаған күнәлары және Құдайға қарсы әрекет еткендері үшін сотталады.[4]

Көптеген адамдар Құдайдың мейірімді және кешірімді екеніне сенеді, бірақ олар Оның әділ Төреші екенін түсінбейді. Олар тәубе етпесе де, Құдаймен кездескен кезде кешірілеміз деп ойлайды. Олар естіген толық емес Ізгі хабар оларға күнәларымен жайлы өмір сүруге мүмкіндік береді.

Көптеген заманауи Ізгі хабар таратушылар, егер адам мәсіхші болса, ол бақытты болады деп айтады. Олар күнә қанағаттандырмайды, бірақ Құдай қанағаттандырады дейді. Олар Құдайда адам махаббат, тыныштық пен қуаныш табады дейді. Олар Құдайдың әр адамның өміріне керемет жоспары бар, егер адам құтқарылса, бұл жоспар орындалады дейді.

Бұл уәделерді қате түсінуге болады. Құдай сүйіспеншілік пен тыныштық береді, бірақ Құдайды қабылдамайтын адамдармен сізде қақтығыстар болады.[5] Ол қуаныш сыйлайды, бірақ сонымен қатар сіз қудалануыңыз мүмкін.[6] Оның әрбір адам үшін керемет жоспары бар, бірақ мәсіхші қиын жағдайлар мен қайғылы оқиғаларға тап болуы мүмкін.[7] Егер адам өмірін жақсартамын деп мәсіхші болуды шешсе, оның көңілі қалуы мүмкін. Кейбір адамдар мәсіхші болғаны үшін қатты зардап шегуде.

Мәсіхші ретінде біз қиын жағдайларға тап болсақ та, Құдаймен өмір сүрудің керемет екенін түсінеміз. Біз «Құдайға қызмет ету - керемет өмір» деп айта аламыз. Дегенмен, құтқарылмаған адамдардың көпшілігінің керемет өмір туралы түсінігі дұрыс емес. Егер сіз олардан керемет өмір дегеннің не екенін сипаттап беруді сұрасаңыз, олар денсаулық, ақша, еркіндік, тыныштық және т.б. айтады. Олар қуғын-сүргінге ұшыраған, азап шеккен мәсіхшінің керемет өмір сүретінін түсінбейді. Сондықтан, егер сіз күнәкарға егер ол мәсіхші болса, ол керемет өмір сүреді деп айтсаңыз, ол сізді басқаша түсінуі мүмкін.

Ізгі хабарды дұрыс түсінбеуге қатысты тағы бір мәселе бар. Адам өзін сотталуға лайық күнәкар ретінде көрмей-ақ Ізгі хабарды қабылдай алады. Ол күнәнің ауырлығын түсінбегендіктен, шын жүректен тәубе етпейді. Ол күнәдан құтылуды емес, басқа игіліктерді іздейді. Ол құтқарылдым деп ойлауы мүмкін, бірақ шын мәнінде ол құтқарылған жоқ.

Ол құтқарылмағандықтан тіпті шынайы құтқарылу игілігін де алмайды. Ол біраз уақыт тырысады, бірақ содан кейін көңілі қалып, қолдарын түсіреді.

Дұрыс емес Ізгі хабардың ең нашар нәтижесі мынау: Көңілі қалған адамның болашақта Ізгі хабарды қабылдау ықтималдығы аз.

Қорытындылай келе, жақсы өмір туралы Ізгі хабарға қатысты мәселелер төмендегідей:

1. Құдай уәде етпеген нәрсені уәде етеді.

2. Күнәкар оны қате түсінеді.

3. Адам шынайы тәубе етпейді.

4. Ол өзі күткен игіліктерді ала алмайды.

5. Оның болашақта Ізгі хабарды қабылдау ықтималдығы аз.

► Елшілердің істері 14:21—23 оқып шығыңыз. Елшілер сенімге жаңадан келгендерге не күту керектігін айтты?

Иса шәкірттеріне адамдар оларды Мәсіхке сенгені үшін жек көретіндерін ескертті. Ол оларға соңына дейін шыдамаса, құтқарылмайтындарын айтты. Бұл сөздерді Ізгі хабарды жазған үш шәкірті жазып қалдырды.[8] Алғашқы елшілердің көпшілігі Мәсіх үшін өлді.

Миллиондаған мәсіхшілер сенімдері үшін өлтірілді. Бұл тек ежелгі заманда болған мәселе емес. Сенімі үшін азап шеккен мәсіхшілердің жартысынан көбі 20 ғасырда өлтірілді.

Егер адам жеңіл өмір туралы уәдеге емес, құтқарылу уәдесі үшін сенімге келсе, ол сынақтар келгенде берілмейді. Ол мәңгілік өмір үшін қиындықтарға төтеп беруге дайын. Сынақтар ол үшін құтқарылуды одан да құнды етеді.

► Неліктен мәсіхшілер қудалауларға төзеді?

► Тімотеге 2-хат 2:24—26 оқып шығыңыз. Бұл аяттар Ізгі хабар таратушының мінез-құлқы туралы не айтады?

Ізгі хабар таратушы өзі Ізгі хабар айтатын адамдармен жанжалдаспауы керек. Шайтан – қас дұшпан, ал күнәкарлар – шайтанның тұтқындары. Біз шындықты жұмсақтықпен түсіндіруіміз керек. Біздің мақсатымыз – оларды дау-дамайда жеңу емес, оларға көмектесу. Бұл үзіндіде жұмсақтық, сабырлық және ілтипаттылық сияқты сөздер қолданылады.

► Тит 3:2—5 оқып шығыңыз. Бұл үзінді Ізгі хабар таратушының мінез-құлқы туралы не айтады?

Біз Құдайдың рақымынсыз осы дүниенің адамдары сияқты болатынымызды есте ұстауымыз керек. Құдай бізге айыптаумен емес, мейірімділік пен сүйіспеншілікпен келді.

Ізгі хабар таратушы күнәкарға емес, күнәға және шайтанға ашулануы керек. Ол қатал болып көрінбеуі керек. Ол олардың қателіктерін тапқанына қуанбай, қайта олардың құтқарылуына көмектесуге әрекет етуі керек.

Біз Құдай уәде етпейтін нәрсені уәде ету арқылы күнәкарға сүйіспеншілік таныта алмайтынымызды үйрендік. Біз олардың өмірінің мәселелері олардың мәңгілік тағдырынан маңыздырақ сияқты әрекет етіп, жанашырлық танытпаймыз.

Иса Мәсіх «Мессия қатыгез емес, жұмсақ адам болады. Ол майысқан таяқты сындырмайды» деген алдын ала айтылған сөзді орындады.[1]

► Ізгі хабар таратқанда Құдайдың сүйіспеншілігін көрсетудің қандай жолдары бар?

Ізгі хабарға деген Киелі кітаптағы көзқарас адамдарды Ізгі хабарды қабылдауға дайындау үшін Құдай заңын пайдалану болып табылады. Заң күнәкарларды айыптайды және егер олар кешірімге ие болмаса, сотталатынын көрсетеді.

Шомылдыру рәсімінен өткізуші Жақия пайғамбар адамдар Иеміздің келуіне дайындалу және келешектегі қаһарлы жазадан құтылу үшін теріс жолдан қайту керек деп уағыздады.[1]

Иса сот пен тозақ туралы көп рет уағыздады. Күнәлары үшін өкінгендерге рақымын ұсынды.

► Лұқа 7:36—50 оқып шығыңыз. Қандай адам кешіріледі?

Біз Исаның қызметінде күнәлары үшін өкінбеген адамдарға кешірім ұсынғанын көрмейміз. Ол сот туралы адамдарға ескертті. Көп адам өлтірілгенде, Иса халыққа теріс жолдарынан қайтпаса, бәрі де осылай құритынын айтты.[2]

Иса әр түрлі дұға еткен салықшы мен парызшыл туралы әңгімені айтып берді. Салықшы өкініп, кешірімге ие болды. Ал парызшыл өзін ақтауға тырысты. Парызшылға кешірімге ие болудың қажеті де жоқ еді, өйткені ол кешірімнің қажет екеніне сенбеді.

Елші Петір мәңгілік өмір туралы уағыздап, адамдарды теріс жолдан қайтуға және кешірімге ие болуға ​​шақырды.[3]

Степан яһуди билеушілеріне уағыздағанда, мейірімділік танытпай, оларды Құдайға қарсылық танытып, Оның заңын бұзғаны үшін айыптады.[4]

Пауыл «адамдар тәубеге келулері керек, өйткені Құдай күнәларға сабырлық көрсетпейді » деп уағыздады.[5]

Мәсіхшілікпен келетін қуаныш пен баталар туралы айтудың еш жамандығы жоқ, бірақ Киелі кітаптағы Ізгі хабардың негізгі әдісі - күнә және теріс жолдан қайту туралы уағыздау, қиямет соттан құтқарылуды ұсыну.

► Қорынттықтарға 2-хат 5:11 оқып шығыңыз. Елші адамдарды сендіру үшін нені қолданды?

► Елшілердің істері 24:25 оқып шығыңыз. Пауыл Феликспен не туралы сөйлесті? Бұл Феликске қалай әсер етті?

Медет қауымға шақыру қағаздарын таратып жатқанда Жандоспен кездесті.

Жандос: Маған қауым керек емес.

Медет: Киелі кітапта әрбір адам күнәлары үшін Құдайдың сотының алдында тұратыны айтылған. Құдай сізді осы қалпыңызда қабылдайды деп ойлайсыз ба?

Жандос: Иә, мен солай ойлаймын.

Медет: Сіз жақсы адамсыз ба?

Жандос: Менің ойымша, иә.

Медет: Мүмкін сіз басқа адамдармен салыстырғанда жақсы шығарсыз. Мүмкін сіз достарыңыз бен отбасыңызға жақсысыз. Бірақ сіз Құдай қандай стандартты қолданатын білесіз бе? Киелі кітап Құдайдың дұрыс пен бұрысты қалай соттайтыны туралы айтады. Мысалы, Оның ережелері Он өсиет деп аталады. Сіз он өсиетті білесіз бе?

Жандос: Кейбіреулерін білемін.

Медет: Мысалы, бір өсиет мынадай: «жалған куәлік берме». Сіз өміріңізде шындыққа жанаспайтын нәрсені айтып көрдіңіз бе?

Жандос: Әрине, мұны бәрі жасайды.

Медет: Бірақ өтірік айту - Құдайдың бұйрығын бұзу. Тағы біреуі ұрлық жасамау. Сіз өміріңізде бірдеңе ұрлап көрдіңіз бе?

Жандос: Тек ұсақ-түйек нәрселер ғана, бірақ мен ұрлау арқылы адамдарға зиян келтірген жоқпын.

Медет: Бірақ Құдайдың өсиеті – ұрлық жасамау. Тағы біреусі - Құдайдың есімін босқа атамау. Оны құрметсіз атамау немесе оны балағат сөз ретінде қолданбау.

[Өсиеттердің кез келгенін қолдануға болады, бірақ барлығын бір әңгімеде қолданудың қажеті жоқ. Төменде мысалдар берілген.]

• Құдай бізге неке адалдығын бұзбау керектігін айтады, ал Иса әйелге құмарта қараудың өзі – жүректе азғындық жасау екендігін айтты.

• Құдай өлтірме деді, Ал Иса біреуді жек көру жүректе кісі өлтірумен бірдей екенін айтты.

• Құдай демалыс күнін ұстану керектігін айтты. Сіз апта сайын Иеміздің күнін ұстанасыз ба?

• Құдай бізге басқаларда бар нәрсені қалап, Құдайдың орнына сол нәрсе бізді бақытты етеді деп ойламауды айтады.

• Құдай бізге басқа құдайдың болмауын, біз үшін Одан маңыздырақ нәрсенің болуына жол бермеу керектігін айтады, яғни Құдайға мойынсұнуымызға және Оған лайықты түрде табынуымызға ешнәрсе кедергі жасамауы қажет.

[Күнәкардың кінәлі екенін көрсету үшін бірнеше өсиеттерді қолданғаннан кейін біз қорытындыға келеміз.]

Медет: Егер Құдай сізді бүгін соттаса, сіз ақталмайтын едіңіз. Сіз Оның стандартына сай кінәлі болып саналатын едіңіз. Құдайдың сотынан қорықпау үшін кешірімді қалай алуға болатынын білгіңіз келе ме?

[Содан кейін Ізгі хабар таратушы Ізгі хабармен бөлісіп, күнәкарды дұға етуге шақыра алады.]

► Екі студент диалог құрастырып, оны бүкіл топқа көрсетуі керек. Ол диалогта он өсиет қолданылып, Ізгі хабар айтылуы керек. Топ өзінің диалогын талқылай алады. Содан кейін студенттер жұпқа бөлініп, осыны жасап жаттығуы қажет.

► Ізгі хабар сәтті айтылғанын қайдан білуге болады?

Әлбетте, егер адам сіз Ізгі хабарды айтқаннан кейін өкініп, құтқарылуға шешім қабылдаса, оның сәтті болғанын білеміз. Бірақ бұл Ізгі хабардың табысты болғанының жалғыз түрі емес. Құдай тыңдаушының жүрегіне шындықты бекітуге жауапты. Егер сіз Ізгі хабарды тыңдаушы түсінетіндей етіп жеткізсеңіз, оның нәтижесін ешқашан көрмесеңіз де, сіз маңызды нәрсені орындадыңыз. Егер ол сіздің жанашырлығыңыз бен оған көмектескісі келетініңізді сезінген болса, бұл да жақсы. Егер ол ашуланса, әсіресе шындыққа ашуланса, немесе сізді мазақ қылса, бұл сіздің сәтсіздікке ұшырағаныңызды білдірмейді. Ізгі хабар арқылы Құдайдың есімі дәріптеледі. Оны айтқан кезде сіз маңызды нәрседе жетістікке жетесіз.

Бұл Ізгі хабарды жеткізудің тиімді әдісі. Студенттердің оны қолдануды үйренуі маңызды. Келесі сабақта оларға осы әдіс арқылы Ізгі хабарды бөлісуге тырысқан кездегі тәжірибелері туралы айтуға уақыт беріңіз. Олар бірін-бірі жігерлендіріп, кеңес берсін. Сабақты осылай өткізіп, келесі сабақты басқа жолы өткізу пайдалы болуы мүмкін.

Ізгі хабарды кем дегенде үш адамға Медет осы сабақта жасағандай жеткізіңіз. Әр әңгімені бір абзацпен сипаттап жазыңыз. Бұл туралы келесі сабақта айтуға дайын болыңыз.