(1) Осы сабақтың соңында студент түсінуі және түсіндіре білуі қажет:

• Жалпы аян және ерекше аян ұғымдары.

• Киелі кітаптың дәлдігінің негіздемесі.

• Киелі жазбаның Құдай Рухының жетелеуімен жазылғандығының дұрыс түсінігі.

• Неліктен Киелі жазбаның Құдай Рухының жетелеуімен жазылғандығы, оның ішінде ешбір қате жоқтығын білдіреді.

• Құдай Рухының жетелеуі, мінсіз және мүлтіксіз терминдері.

• Неліктен Киелі кітап аяқталған және оған ештеңе қосуға болмайды.

• Неліктен Киелі кітап ілімдердің негізгі көзі және түпкілікті беделі болып табылады.

• Киелі кітаптың мәсіхшінің күнделікті өміріндегі маңызы.

• Киелі кітап туралы мәсіхшілік сенім ұстанымы.

(2) Осы сабақтың тәжірибелік мақсаттарының бірі – студентті дұрыс емес ілімдерді есту немесе шектеулі мақсатпен Киелі кітапты зерттеу барысында, қателіктер жібермеуге үйрету.

Әдетте, сабақ өткен сабақтың материалы бойынша тест тапсыру мен сабақтың мақсаттарын қайталаудан басталады. Бұл бірінші сабақ болғандықтан, бірден Жазбадан үзінді оқуға кірісіңіздер.

► «Забур жырлары 118:1-16» бірге оқыңыздар. Бұл үзінді Киелі кітап туралы не айтатынын талқылаңыздар.

Әлемді Жаратушы, Құдай сөйледі. Ол Өзін және Өзінің жаратылысының мақсатын ашты. Құдайдың бізге ашқан ақиқаты «аян» деп аталады. Киелі кітапта «Аян» деп аталатын кітап бар, бірақ бұл сөзді Құдай бізге ашқан барлық ақиқаттар туралы айтқан кезде де қолдануға болады.

► Құдай бізге ақиқатты қалай ашты?

Құдай ақиқатты әр түрлі жолдармен ашты, сондықтан біз аянды екі түрге бөліп қарастыра аламыз: жалпы аян және ерекше аян.

Жалпы Аян

Жалпы аян – бұл Құдайдың қандай екенін, Оның жаратылысына қарап түсіну. Біз әлемге қарап, Құдайдың таңғажайып ақыл-парасаты мен құдіретін көреміз.

Құдайдың қандай екенін, біз адамның қалай жаратылғанынан көре аламыз. Біздің ойлай алуымыз, сұлулықты бағалай және жақсылық пен жамандықты ажырата білуіміз (толықтай болмаса да), бізге Жаратушымыздың ең жоғары деңгейде, дәл осындай қабілеттерге ие екендігін көрсетеді. Біз Құдайдың ойлай алатынын және қарым-қатынаста бола алатындығын білеміз, өйткені бізде осы қабілеттер бар.

Жалпы аян бізге Құдайдың сөйлей алатындығын көрсететіндіктен, біз ерекше аянның да болуы мүмкін екенін білеміз. Құдай сөйлей алатындықтан, Оның хабарлары немесе тіпті толық бір кітабы да бар болуы мүмкін.

Жалпы аян арқылы адамдар Құдайдың бар екенін, Оған мойынсұну керектігін және Оған бағынбай кеткендерін біледі[1]. Бірақ жалпы аян бізге қалай Құдаймен дұрыс қарым-қатынас орнату керектігін көрсетпейді. Жалпы аян бізге адамдардың күнәһар екенін және олардың Жаратушының алдында «ақтала алмайтындарын» айтатын, ерекше аянның қажеттілігін көрсетеді, бірақ жалпы аян бізге шешім бермейді.

Ерекше Аян

Ерекше аян – Киелі Рухтың жетелеуімен жазылған Киелі кітап пен Исаның бейнесінде көрінді. Ерекше аян жалпы аян көрсеткендей, біздің күнәға батқан жағдайымызды және күнәһар екенімізді түсіндіреді. Ерекше аян Құдайды сипаттайды, күнәға бату мен күнә туралы түсіндіреді және Құдаймен қалай татуласа алатынымызды көрсетеді.

Сіз өзіңізді Киелі кітап бар екенін білмедім деп елестетіп көріңізші. Сіз Құдайдың бар екенін түсінесіз. Құдай алдында кінәлі екеніңізді білесіз. Бірақ сіз өлгеннен кейін не болатынын білмейсіз. Сіз өміріңіздің мақсатын білмейсіз. Сіз Құдайға қалай жақындау керектігін білмейсіз.

Содан кейін біреу сізге бір кітапты көрсетіп, бұл кітаптың сіздің сұрақтарыңызға жауап беру үшін Құдайдан келгендігін айтады деп елестетіп көріңіз. Осы кітаптың сіз үшін қаншалықты бағалы болатынын елестете аласыз ба?

► Киелі кітап өзі туралы не айтады? Киелі кітаптың шынымен Құдайдан екенін көрсететін ондағы мәлімдемелерді мысалға келтіріңіз.

Киелі кітаптың өзі туралы жариялағандары туралы сөйлесейік. Кейін Киелі кітаптың шынайы екендігінің дәлелдерін қарастырамыз.

Киелі кітап – Құдайдың Сөзі екендігін жариялайды. Көне Келісімде Құдайдан келген хабарлар «Жаратқан Ие тіл қатып былай деді»[1] деген үлгіде болғандығының 3000-нан аса мәлімдемелері бар. Иса – Көне Келісімді Құдай Рухының жетелеуімен жазылған деп есептеді[2]. Жаңа Келісімді жазушылар – Көне Келісімді Құдайдың берген хабары деп қабылдады[3]. Жаңа Келісімді жазушылар – Жаңа Келісімді Құдай Рухының жетелеуімен жазылған Жазба деп есептеді[4].

Егер адам Киелі кітаптың өзі туралы жариялағандарына сенбейтін болса, онда ол дәлелдерге қарауы керек. Енді сіз қайтадан Киелі кітап туралы ештеңе білмедіңіз деп елестетіңіз. Сіз Құдай – Тұлға екенін және қаласа сөйлей алатындығын білесіз. Сондықтан сіз Құдайдың кітабы бар болуы мүмкін екендігін білесіз. Содан кейін сізге біреу бір кітапты көрсетіп, оны Құдайдың кітабы деп айтады.

► Киелі кітап шынында Құдайдың Сөзі екенін қалай білуге болады? Сіз ол қандай болады деп күттіңіз?

Ізгі хабар уағыздалатын барлық жерлерде адамдар іштей ақиқатпен әшкереленетіндіктерін сезінеді. Олар Ізгі хабарға сеніп, тәубеге келгенде, Құдайдың кешірімін қабылдап, жаңа өмірді бастарынан кешеді. Бұл көпшілік адамдар үшін Киелі кітапқа сенудің – бірінші себебі[5].

Келесі, Құдаймен қарым-қатынасы бар адамға Құдайдың Рухы түсінік бере отырып және әшкерелеп Киелі жазба арқылы сөйлейді. Киелі Рухтың Киелі кітапты қолдануы, Оның – Құдайдың Сөзі екендігін дәлелдейді[6].

Біздің Құдаймен қарым-қатынаста жүруімізде Киелі кітап бізге Құдайдың болмысын және Оның бізбен қалай жұмыс істейтіндігін нақты ашатынын көреміз. Киелі кітап бізге Құдаймен қарым-қатынасты қалай бастау және қалай жалғастыру керектігін көрсетеді. Бұл Киелі кітаптың – Құдайдың Сөзі екендігінің дәлелі[7].

Бірақ, егер сізге жеке рухани тәжірибеңізге негізделмеген дәлел қажет болса ше? Басқа діндердегі адамдардың да ақиқатқа негізделмеген рухани тәжірибелері бар. Біздің тәжірибеміз ақиқатқа негізделгенін қайдан білеміз?

► Киелі кітапта жазылған деректердің дәлдігіне дәлел бар ма?

Киелі кітапты 1500 жыл бойы қырықтан астам, көпшілігі бір-бірімен таныс емес авторлар жазған. Мұндай кітаптан біз әдетте не күтеміз? Біз оның ішінде көптеген қателіктер мен қарама-қайшылықтар бар деп күтеміз. Бірақ Киелі кітап туралы келесі шындықтарды қарастырыңыз. Киелі кітапта аталған мыңдаған географиялық орындар шынымен де бар, Киелі кітапта айтылған мыңдаған тарихи оқиғалар мен тұлғалар тарихпен расталған. Ешқашан ешбір жаңалық Киелі кітаптағы мәлімдемелерге қайшы келмеді; және ешқашан Киелі кітап өзіне-өзі қайшы келмейді. Бұрын-соңды жазылған басқа ешбір кітап осындай болмаған. Дәлелдер Киелі кітаптың Құдай Рухының жетелеуімен жазылғандығын растайды.

Киелі кітаптың Құдайдың Сөзі екенін растайтын дәлелдерді алты тармаққа бөліп қорытындылай аламыз. Біз Киелі кітап шынымен де Құдайдың Сөзі екенін білеміз, өйткені:

• Киелі кітаптағы мыңдаған фактілер расталды.

• Киелі кітаптағы ешбір мәлімдеме теріске шығарылмады.

• Киелі кітап өзіне қайшы келмейді.

• Ізгі хабар өзінің әсерімен дәлелденді.

• Құдайдың Рухы Киелі кітап арқылы сөйлейді.

• Киелі кітап біздің Құдаймен қарым-қатынасымызды бағыттайды.

   

► Киелі кітап Құдай Рухының жетелеуімен жазылған дегенде, біз не айтқымыз келеді?

Кейде адамдар шабыттанғанда, оларда керемет ойлар туады. Бірақ Киелі кітапқа келгенде, бұдан да үлкенірек нәрсе меңзеледі.

«Киелі жазбалардың бәрі Құдай Рухының жетелеуімен жазылған. Олар тәлім беру, әшкерелеу, түзету әрі әділдікке тәрбиелеу үшін тиімді»[1].

Киелі Жазба адам қолымен жазылса да, осы аят Киелі кітаптың Құдайдан екендігін атап көрсетеді. Сондықтан, ол – оған ілімдер құруға сенімді. Ол адамдар жасаған ең күшті нәрселердің барлығынан да – күшті.

«Себебі бұл пайғамбарлық сөздер ешқашан адам баласының қалауымен пайда болған емес. Қайта, Киелі Рух Құдайға бағышталған адамдарға Оның хабарларын айтуға қозғау салып отырды»[2].

Петірдің 2-хатындағы, бұл аят авторлардың Киелі Рухтың жетелеуінде болғандықтарын айтады. Олардың жазғандарының дәлдігі – олардың жеке білімідеріне тәуелді болмады. Киелі Рухтың оларды жетелеуі – жазудың сенімділігі Құдайға тәуелді болғандығын көрсетеді. Киелі кітап – Құдайдың Өзі сияқты сенімді.

Киелі Рухтың жетелеуі – бұл Құдайдың Өзін ашып, аянды жазбаша түрге келтірген ғажайып жұмыс. Киелі кітап – Құдай Рухының жетелеуінің соңғы өнімі. Киелі кітап – Құдай Рухының жетелеуімен жазылған жалғыз кітап. Киелі кітаптың Құдай Рухының жетелеуімен жазылғандығы, оның – толықтай, соңғы сөзіне дейін, Құдайдың Сөзі екендігін білдіреді.

► Киелі кітапты жазып бастағанға дейін жазушылар Құдайдан ақиқатты қалай алды?

Кейде адамдар Киелі Рухтың жетелеуі қалай болғандығы туралы ойланады. Құдай Өз ақиқаттарын дәл жазылу үшін қалай жеткізді? Құдайдың аяны туралы айта кететін бірінші шындық, оның әртүрлілігі. Ол белгілі бір әдіспен шектелмейді[1].

Кейде Құдай естілетін дауыспен сөйледі, мысалы, Мұсамен сөйлескен кезде[2]. Басқа уақытта ол түстер мен аяндар берді, ал жазушы оларды сипаттады[3]. Мүмкін, тікелей жазылған Жазбаның бір бөлігі – «Құдайдың қолымен жазылған» деп айтылатын Исраилмен келісім болған шығар[4]. Жазбаның басқа бөліктері Құдайдың айтып тұруы арқылы жазылған болуы тиіс; Мысырдан шығу, Леуіліктер мен Руларды санаудағы үлкен үзінділер «Жаратқан Ие Мұсаға тіл қатып былай деді» деген сөздерден кейін жазылған.

Құдай Рухының жетелеуі – Құдай жазушыға сөзді естілетін дауыспен айтқан дегенді білдірмейді. Біз әр түрлі авторлардың, әр түрлі мінезі мен жазу стильдерін көреміз. Мысалы, Пауылдың стилі, Петірдің стилінен өте ерекшеленеді. Біздің Құдай Рухының жетелеуі туралы түсінігіміз – Құдайдың адамдарды қолдануын, олардың жеке ерекшеліктерін, сөздік қорын, жазу стилін, білімін және тарихи жағдайын қамтуы керек.

Құдай Рухының жетелеуіне деген дұрыс көзқарас – бұл жазушының қиялы мен жеке басын қолданып, Құдайдың ақиқатты білдіру үшін, оны ашып қана қоймай, сонымен қатар абсолютті дәлдікті қамтамасыз ету үшін – жазу процесі арқылы адамды толықтай Құдай Рухының жетелегендігі.

Кейбіреулер Құдай жай ғана жеткізгісі келетін ойлары туралы түсінік берді, ал адам, сөзсіз адамша қателіктер жіберіп, оларды мүмкіндігінше түсіндіруге тырысты деп санайды. Мұндай көзқарас Киелі кітаптағы Құдай Рухының жетелеуінің сипаттамасына сәйкес келмейді. Жазу барысында өздерінің атынан жазбағандарын және қателіктер жібермегендерін білуіміз үшін, Киелі кітап авторлардың Құдай Рухының жетелеуінде болғандығын сипаттайды.

Киелі кітап Құдайдың сөзі болғандықтан, онда қате ештеңе айтылмаған, Өйткені Құдай қателіктер жібермейді[5].

Сондай-ақ, Құдай Өзін негізінен Киелі кітапта жазылған оқиғаларда ашқандықтан, біз Құдайдан сенімді аян алуымыз үшін ұсақ-түйектер дәл болуы керек. Сондықтан, Киелі кітаптағы Құдай Рухының жетелеуінің сипаттамасы арқылы, біз Құдайдың жазу процесін, оның шүбәсіз дәл болуы үшін бағыттағанын білеміз.

Құдай Рухының жетелеуі

Киелі кітаптың Құдай Рухының жетелеуімен жазылғандығы – бізге оның аян арқылы берілген Құдай Сөзі екендігін білдіреді. Бастапқыда бұл термин Киелі кітаптың толық сенімділігі мен дәлдігін қорғауға жеткілікті болды, бірақ қазір кейбір Киелі кітаптың Құдай Рухының жетелеуімен жазылғандығына сенетін адамдар, оның толықтай дәл екендігініне сенбейді. Құдай Рухының жетелеуінің маңызды аспектілерін қорғау үшін келесі терминдер қолданыла бастады.

Мінсіз

Бұл термин «қателеспейді» дегенді білдіреді. Киелі кітап мінсіз деп айтқан кезде, біз оған сене алатындығымызды және ол бізді ешқашан жаңылыстырмайтындығын айтамыз. Киелі кітап өзінің ілімдерінде ғана емес, әр мәлімдемелерінде де мінсіз.

Мүлтіксіз

Бұл термин «қатесіз» дегенді білдіреді. Киелі кітап әрбір мәлімдемесінде дәл. Құдай ешқашан өтірік айтпайды және қателеспейді[1], ал Киелі кітап – бұл Құдайдың Сөзі болғандықтан, біз оның ішінде қателіктер болуы мүмкін емес екендігіне сенімді бола аламыз. Егер адам Киелі кітаптың жазу процесіне адамдар қатысқандықтан, онда қателіктер болуы мүмкін деп айтса, ол Петірдің 2-хаты, 1:21-дегі жазушылардың – Құдай Рухының жетелеуінде болғандықтарын естен шығарады. Киелі кітаптағы Құдай Рухының жетелеуіне деген Киелі кітаптық, тарихи көзқарас – бүкіл Киелі кітап, тіпті әрбір сөз – Құдай Рухының жетелеуімен жазылған, сондықтан онда ешқандай қателіктер жоқ екенін білдіреді[2].

Көшіру кезіндегі қателіктер ше?

Баспаның пайда болуына дейін Жазба қолмен көшіріліп жазылды. Бізде әлі де Пауыл, Ишая немесе Мұса жазған түпнұсқа қолжазбалар жоқ. Грек және еврей тілдерінде қолмен жазылған мыңдаған ежелгі көшірмелердің арасында аздап айырмашылықтар бар, және біз әрқашан түпнұсқада сөйлемнің қандай болғанын біле алмаймыз. Алайда, айырмашылықтар өте шамалы болғандықтан, ешқандай ілімге күмән келтірілуі мүмкін емес. Біз түпнұсқалардың қатесіз екенін білгендіктен және көшірмелердегі айырмашылықтар өте аз болғандықтан, Киелі кітаптың әр сөзіне сене алатынымызды білеміз.

► Киелі кітаптың бірнеше рет қолмен көшіріп жазылғанына қарамастан, біз оның дәл екенін қайдан білеміз?

► Адамдардың Киелі кітапта қателер бар деп санауларының қандай себептері бар?

Кейде адамдар Киелі кітапта қателер бар дейді, өйткені олар Киелі кітаптың мазмұнын түсінбейді.

Киелі кітапта адамдардың әдеттегі ақпарат алмасуларының жазу үлгілері қолданылады. Мысалы, аспанда қозғалатын күн туралы айтатын аят бар. Біз іс жүзінде күн емес, жер айналатынын білеміз. Бірақ осыны білетін адамдар да күн шығып, күн батады деп айтады. Бұл қателік ретінде саналмайды. Бұл жай ғана біздің осы құбылысты қалай көретінімізді сипаттайды.

Сондай-ақ, «төбелер қозы сияқты секірді» немесе «ағаштар шапалақтады» деген сияқты поэтикалық сөздер бар. Бұл әдеби стиль, сондықтан оны сөзбе-сөз, тура мағынада қабылдауға болмайды.

Жазу стильдерінде айырмашылықтар бар. Басқа авторлардың, соның ішінде Құдай Рухының жетелеуінде болмаған адамдардың дәйексөздері бар. Мұның ешбірі Құдай Рухының жетелеу ілімі үшін мәселе емес. Құдай соңғы өнім – Оның Сөзі болатынына көз жеткізу үшін жазу процесін бағыттады.

Кейде адамдар Киелі кітаптан қарама-қайшылықтарды көреміз деп ойлайды, бірақ олар сол жерлерді мұқият қарастыруы керек. Мысалы, Лұқа, 8:26-27 және Марқа, 5:1-2-де жын соққан, кейін Исаның күшімен жыннан арылған бір адам туралы айтылады. Матай, 8:28-де жын соққан екі адамның жыннан босатылғандары туралы айтылады. Бұл қарама-қайшылық емес. Лұқа мен Марқа бұл бір адам деп мәлімдемейді, бірақ олар сол жерде танымал болған адамға назар аударуды жөн көрді. Егер адамға Киелі кітапта айқын қарама-қайшылықтар болып көрінетін жерлер болса, тұжырым жасауға асықпау керек, керісінше контекстті түсіну үшін уақыт бөлу қажет.

► Мәсіхшілер Киелі кітапты қалай пайдаланулары керек?

Киелі кітап – бізге берілген Құдайдың заңы. Заң бізді құтқармайды, бірақ ол Құдайдың біздің қалай өмір сүруімізді қалайтынын көрсетеді. Құдайдың заңы бізге Құдайдың болмысын көрсетеді. Біз Құдай сияқты болғымыз келетіндіктен, Оның заңына бағынуымыз керек. Біз Құдайды жақсы көретіндіктен, Оның заңын да жақсы көруіміз керек. Забур жырлары 118-тарау – Құдайға сиынушының Құдай заңынан қалай ләззат алу керектігін сипаттайды. Құдайды сүйетін адам Жаратушы Иеге өзінің жүрегін, Оның еркіне сай өзгерту үшін дұға етеді. Құдайды сүйетін адамның Құдайға қалай ұнамды болу керектігі жайында алаңдамауы мүмкін емес.

Құдайдың Сөзі – Нұр. Елші Петір әлемнің рухани қараңғылықта екенін, ал Құдайдың Сөзі – бізді бағыттайтын Нұр екенін айтады[1]. Бұл бізді жолымызда бағыттайтын – Нұр. Адам ешқашан Құдай Сөзіне қайшы келетін ойлар мен сезімдерге ермеуі тиіс. Киелі Рух ешқашан адамды Киелі кітап дұрыс емес деп атайтын нәрсені жасауға шақырмайды.

Құдайдың Сөзі – біздің рухани азығымыз. Жақсы тәбет – денсаулықтың белгісі, ал мәсіхші сәбидің сүтке шөліркегеніндей[2] Құдай Сөзін қалайтын болады. Мәсіхші өскен сайын, баланың қою тамақты жеуге үйренетініндей, Құдайдың ақиқатын түсінуге және қорытуға көбірек қабілетті болады[3]. Мәсіхші күн сайын өзін Құдай Сөзімен қоректендіруі керек.

Киелі кітап – біздің шайтаннан қорғанышымыз. Біз өзімізді рухани қарумен жабдықтауымыз керек. Бізге Киелі Рух ұсынатын семсер – Құдай Сөзі[4]. Иса шайтанның азғыруларына Киелі жазбадағы сөздермен жауап берді[5].

Құдайдың Сөзі – біз жауап беруге тиіс ақиқат. Иса оны себілген тұқымдармен салыстырды[6]. Кейбір тұқымдар жер дайын болмағандықтан өспеді. Біз Киелі кітапты оқығандықтан, оның ақиқаттарына сай әрекет етіп, Өзінің Сөзі арқылы біздің өмірізде жемістер жетілдіруі үшін, Құдайға сиынуымыз керек.

Киелі кітап – Құдайдың Сөзі болғандықтан...

• Ол – ешқашан ескірмейді және өзекті болуын тоқтатпайды. Ол – барлық адамдарға, барлық жерлерде және барлық уақытта қолдануға жарамды.

• Бұл – Құдайдың еркін білуге арналған нұсқаулық, өйткені Құдай ешқашан ойларын өзгертпейді және Өзіне қайшы келмейді.

• Бұл – өмірден ең жақсыны алуға арналған нұсқаулық, өйткені Құдай – біздің Жаратушымыз, бізге осы нұсқауларды берді.

• Онда біздің құтқарылуымыз және Құдаймен қарым-қатынаста болуымыз үшін білуіміз қажет керектінің барлығы бар.

Біз көп нәрсені бағушы мен қауымның дәстүрлерінен үйренетін болсақ та, Киелі жазбаға қайшы келетін ешқандай ойды қабылдамауымыз қажет, өйткені Киелі жазба – бұл түпкілікті бедел.

Киелі Рух бізге Құдайдың Сөзін ашып, Оған мойынсұнуымыз үшін жетелейді.

► Құдай әлі де сөйлейді, бірақ біз Киелі кітапқа бір нәрсе қосылуы мүмкін деп күтуіміз керек пе?

Соңғы елші қайтыс болғаннан бері қауым Киелі кітапты толық аяқталған кітап ретінде қарастырды. Қауым жай ғана арнау хаттарды таңдап, оларды Жазба деп атай салған жоқ, бірақ ол белгілі бір хабарлардың Құдай Рухының жетелеуімен жазылып, Жазбаның беделіне сай болғанын түсінді. Жазба ретінде танылған хабарлар – кейінгі жазбалар сәйкес келмеген талаптарға сәйкес келді.

Көне Келісім кітаптары үшін қауым Исраилдің жазба ретінде сақтаған хабарларын таңдады. Жаңа Келісім келесі талаптарға сәйкес келді: елшілермен тарихи байланыс, анықтылық, қауымның бірауызды қабылдауы, Көне Келісімді құрметпен қолдану және адасушылыққа қарсы тұрудың пайдасы.

Құдай әлі де сөйлейді, бірақ қазір Киелі кітапқа бір нәрсе қосуға болады ма? Ешбір жаңа хабар бастапқы Жазбаларға енгізуге қойылатын талаптарға сәйкес келмейді. Мысалы, ешқандай жаңа хабардың елшілермен байланысы бола алмайды, өйткені ол кісілер қазір жоқ. Сондай-ақ, бүкіл әлемдегі қауымдар ешқандай хабарды бірауыздан қабылдамайды.

Киелі жазба – құтқарылу мен мәсіхшілік өмір үшін толық, әрі жеткілікті[1]. Жазбаға ешқандай маңызды және қажетті нәрсені қосу мүмкін емес, өйткені онда бізге қажеттінің бәрі бар. Құдайдан жаңа аян алғысы келетін адамдар, алдымен уақыттарын Құдай берген аянды зерттеуге жұмсағандары жөн. Олар сол жерден қажеттінің бәрін табады және бұл оларды қателік жасаудан сақтайды.

Студенттер келесі ақпаратқа түсініктеме бере алады.

Киелі кітаптың беделімен ымыраға келу

Сіздің түпкілікті беделіңіз не? Көптеген мәсіхшілер олардың беделі – Киелі кітап дер еді, бірақ шын мәнінде олар өз сезімдеріне көбірек сенеді. Дұрыс емес әрекеті үшін өзін кінәлі сезінбегендіктен, адам осы әрекеттерді істесе болады деп санауы мүмкін. Мұндай адам Киелі кітапты емес, өзінің сезімдерін түпкілікті беделге айналдырады.

Кейде адам басқалардың айтқанымен жүргендіктен, Киелі кітапқа дұрыс мән бермейді. Жазбада ол бағынбайтын өсиет бар, өйткені өздерін мәсіхшіміз деп атайтын басқа адамдар оған бағынбайды. Ол танымал мәсіхшілік түрін ұстанады, бірақ Киелі кітаптағы мәсіхшілік әдетте танымал болмайды.

Киелі кітапты шектеулі мақсатпен зерттеу

Киелі кітап ілімдердің негізгі көзі болып табылады. Ол кез-келген ілімдік сұрақ үшін түпкілікті бедел. Алайда, бір мәселе бар – бұл адамдардың Киелі кітапты тек өз ілімдерін дәлелдеу үшін зерттеуі. Олар Киелі кітапты рухани азық ретінде пайдаланбайды. Олар тек өздерінің ойларының дұрыс екенін біреуге қалай дәлелдеуге болатынын ойлайды. Біз үшін Жазбаны қолдана отырып, өз ілімдерімізді дамыту және қорғау дұрыс. Алайда, бұл Киелі кітапты қолданудың жалғыз мақсаты болса, онда біз Құдаймен жеке қарым-қатынасымызда Киелі кітапты қолданудан алатын қуанышымызды жоғалтамыз.

Кейбір адамдар Киелі кітапты тек жігер алу мақсатында оқиды. Біз Киелі кітаптың мақсаты – әшкерелеу мен түзетуді қамтитынын естен шығармауымыз керек. Біз өзімізді жақсы сезінуге көмектесетін уәделерді ғана іздеп, Киелі кітаптың бұйрықтарын ескерусіз қалдырып кетпеуіміз керек. Өйткені, бүгін Құдай сізді әшкерелегісі немесе түзеткісі келуі мүмкін.

Кейбір діни топтар Киелі кітапқа сенеміз деп жариялайды, бірақ өздері үшін басқа нәрсені түпкілікті бедел етеді. Олар Киелі кітапты аян арқылы немесе тек оларда бар арнайы жүйені қолдана отырып түсіндіре алатындықтарын жариялайды. Олардың ең маңызды ілімдері Киелі кітаппен расталына алмайды.

Олардың Киелі кітаптан басқа, Жазба ретінде пайдаланатын тағы басқа кітаптары болуы мүмкін. Олар Киелі кітапты аударма немесе көшіру қателеріне байланысты сенімсіз деп айтулары мүмкін.

Бұл ойлардың барлығы Киелі кітап – толық Құдайдың Сөзі емес дегенді білдіреді. Сондықтан мұндай адамдар үшін қандай да бір басқа нәрсе түпкілікті беделге айналады.

Студенттер сенім ұстанымын кем дегенде екі рет бірге оқулары керек.

Киелі кітап – Құдайдың Сөзі. Құдайдың Рухы жазушыларды жетелегендіктен, олар Жазбаны қатесіз жазды. Киелі кітапта күнәдан тазаруымыз бен Құдаймен қарым-қатынаста болуымыз үшін білуіміз керектінің барлығы бар. Киелі кітап – біздің ілімдеріміздің негізгі көзі және түпкілікті беделі. Мәсіхшілер Құдайды жақсы білу, бағыт-бағдар алу және рухани қоректенулері үшін Киелі кітапты күн сайын оқып-зерттеулері керек.

(1) Оқу және жазу tапсырма: Әрбір студентке төменде көрсетілген үзінділердің бірі тағайындалады. Келесі сабақтың алдында үзіндіні оқып, осы сабақтың тақырыбы туралы не айтылғаны туралы абзац жазу керек.

• Забур жырлары, 118:33-40;

• Забур жырлары, 118:129-136;

• Нақыл сөздер, 30:5-6;

• Аян, 22:18-19;

• Матай, 5:17-19;

• Тімотеге 2-хат, 3:15-17;

• Петірдің 2-хаты, 3:15-16.

(2) Тест: Келесі сабақты 1-сабақ бойынша тесттен бастайсыз. Дайындық кезінде тест сұрақтарын мұқият зерттеңіз.

(3) Оқыту тапсырмасы: Студент осы курсты өту кезінде кем дегенде жеті рет, курсқа қатыспайтын адамдарға осы сабақты немесе сабақтың бір бөлігін үйретуі керек. Бұл сабақ қауым тобында, үй тобының кездесуінде немесе басқа ортада өтілуі мүмкін. Сіз бұл мүмкіндіктерді жасауға және сынып жетекшіңізге есеп беруге жауаптысыз.

(4) Келесі сабаққа дайындалу үшін әрқашан келесі сабақты оқуды ұмытпаңыз.

(1) Жалпы аян деген не?

(2) Құдай ерекше аянды қандай үлгілерде көрсетті?

(3) Қандай ерекше аянмен ашылған ақиқаттар, жалпы аянмен ашылмады?

(4) Киелі кітап өзі туралы нені жариялайды?

(5) Қандай алты себеп бойынша, біз Киелі кітапты – Құдайдың Сөзі деп қабылдаймыз?

(6) Неліктен Киелі кітап «тәлім беру, әшкерелеу, түзету әрі әділдікке тәрбиелеу үшін тиімді»?

(7) Киелі кітапта жазушылардың қате жібермегендеріне сендіретін Құдай Рухының жетелеуі туралы қандай сипаттама берілген?

(8) Құдай Рухының жетелеуі үшін Құдай қандай әдістер қолданды?

(9) Киелі кітаптың Құдай Рухының жетелеуімен жазылғандығы нені білдіреді?

(10) Киелі кітап мінсіз деген ұстаным нені білдіреді?

(11) Киелі кітап мүлтіксіз деген ұстаным нені білдіреді?