(1) Библийн хөрвүүлэг хийх үндсэн зарчмуудыг ойлгох.

(2) Бичвэрийг судлахдаа эдгээр зарчмуудыг хэрэгжүүлэх.

(3) Эдгээр зарчмуудыг дагаагүйгээс үүдэх онол сургаалын алдаанаас зайлсхийх.

Энэ хичээлийн зарчмууд нь Бичвэрийг судлах үндэс суурь болдог. Эдгээр нь ухаант мэргэн Библийн багш нарын боловсруулсан судлал хийх зарчмууд юм. Эдгээр зарчим нь таны Библи судлах аргачлалын үндэс байх учиртай. Эдгээр зарчмыг ойлгоход цаг гарган, тэдгээрийг судлалдаа хэрэгжүүлээрэй.

Бичигч уншигчдадаа ямар нэгэн зүйлийг хэлэхийг зорьсон байгаа. Тэрхүү хэлэхийг зорьсон утга нь бичсэн зүйлийнх нь жинхэнэ утга юм. Хөрвүүлэг гэдэг нь бичигчийн хэлэхийг хүссэн мэдээ сургаалыг ойлгохын тулд хийж буй ажил юм. Бид Бичвэрийг бичигчийн хэлэхийг зорьсон утгаас өөр мэдээ сургаалын материал болгон хэзээ ч ашиглаж болохгүй.

Бичвэрийн мэдэгдэл бичигчийн хэлэхийг зорьсноос илүү утга учиртай байж чадна. Абрахам Исаакт "Бурхан хургаар хангана..." гэж хэлэх үедээ (Эхлэл 22:8) Бурхан Абрахамын үгийг Есүсийн ирэлтээр дамжуулан илүү агуу байдлаар биелүүлнэ гэдгийг ойлгож ухаараагүй байж болох юм. Мосе Абрахамын эдгээр үгсийг бичихдээ энэхүү мэдэгдлийн бүрэн утгыг ойлгоогүй ч байж магадгүй. Гэсэн хэдий ч энэ мэдэгдлийг Есүсийн ирэлттэй холбон хэрэглэх нь Мосегийн санаа зорилгоос тэс өөр гэсэн үг биш юм. Харин энэ нь Бурхан бидний авралд хэрэгтэй зүйлийг хангадаг гэсэн зарчмын илүү том, бүрэн дүүрэн утга санаа юм.

Библийг бичсэн хүн бүр анхны уншигчид нь түүний дамжуулж буй сургаалыг практик байдлаар хэрэгжүүлэхийг зорьж байсан. Өнөөгийн бидний сургаалын хэрэгжүүлэлт нь анхны уншигчдын хэрэгжүүлэлтээс өөр байж болох ч, энэ нь ижил зарчмыг баримталдаг. Бид Библийн зарчмыг өөр нөхцөл байдалд хэрэглэж байгаа тул бидний үйлдэл өөр байх боломжтой. Жишээлбэл, израилчуудад хандан байшингийнхаа дээвэр дээр хашлага хийхийг зааварчилсан байдаг (Дэд хууль 22:8). Тэр цаг үеийн байшингийн дээвэр нь хавтгай байсан бөгөөд дээврээ амьдрах талбайнхаа нэг хэсэг болгон ашигладаг байжээ. Хэрэв та дээр нь хүмүүс алхахаар хавтгай дээвэртэй байшинд амьдардаггүй л бол аюулгүй байдлыг хангаж дээвэртээ хашлага хийх шаардлагагүй юм. Гэсэн хэдий ч өмч хөрөнгө маань бусад хүмүүст хохирол учруулахгүй байх зарчмыг бид хэрэгжүүлэх ёстой.

Хөрвүүлэгч нь багц хэсгийн нарийн ширийн зүйлсийг өөрийн төсөөллөөр хөрвүүлэг болгон хөгжүүлж болохгүй. Энд Есүсийн заасан сайн самари хүний тухай түүхийг төсөөллөөрөө хөрвүүлсэн жишээг танилцуулж байна (Лук 10:30-35):

Самари хүн бол сайнмэдээг тунхаглагч, шархадсан хүн бол итгэлд ирсэн нүгэлтэн, харин дэн буудал нь чуулган, харин хоёр зоос нь баптисм болон хайрын зоогийн ёслол юм.

Энэ хөрвүүлэг нь Есүсийн хөршүүдээ хайрлах тухай хэлэхийг зорьсон санааг хайхрахгүй өнгөрөөж байна (Лук 10:27-29, 36-37): Бид тусламж хэрэгтэй хүмүүст хайрыг харуулахын тулд байгаа.

Төсөөллийн хөрвүүлэгт гурван асуудал байдаг:

1. Тэдгээр нь хөрвүүлэгчийн үзэл бодлоос урган гарсан.

2. Тэдгээр нь сайн хөрвүүлгийн зарчимд суурилаагүй.

3. Тэдгээрийг үндсэн, ойлгогдохуйц аргачлалаар цэгнэж үзэх боломжгүй.

Билгүүн хүрэх газраа олохын тулд газрын зургийг харсан ч дараа нь тэр "Энэ газрын зураг буруу байна" гэж хэлэв. Түүнтэй хамт явсан аялагч "Газрын зураг буруу гэдгийг чи яаж мэдэж байна вэ?" гэхэд Билгүүн итгэлтэйгээр "Би явах замыг мэднэ. Газрын зураг буруу байна" гэж хариулав. Хэдэн цагийн дараа тэд бүрэн төөрч, Билгүүн ч ялагдлаа хүлээн, газрын зургийг ойлгож дагахыг хичээж эхлэв. Түүний алдаа юу байсан бэ? Тэр дүгнэлтээс эхэлсэн. Өөрийнх нь хариулт зөв гэж тэр баттай байсан учраас газрын зураг өөр хариулт өгөхөд сонсохоос татгалзжээ.

Зарим хүмүүс Библийг ийм байдлаар уншдаг. Нэгэн номлогч өөрт нь таалагдаагүй Бичвэрийн эшлэлийг уншсан байна. Тэр "Энэ юу гэсэн утгатайг би мэдэхгүй, гэхдээ хэлсэн утгатай нь адилгүй байна" гэж хэлжээ. Тэр дүгнэлтээс эхэлж ("Би энэ сургаалтай санал нийлэхгүй байна"), улмаар Бичвэрийг уншжээ. Түүний дүгнэлт Бичвэртэй нийцэхгүй байгаа учраас тэрээр Бичвэрийг үл ойшоохоор шийдсэн байна ("Хэлсэн утгатай нь адилгүй байна").

Бичвэрийг хөрвүүлэхийн тулд бид Бичвэрээс эхэлж, дараа нь дүгнэлтээ гаргах ёстой. Бидэнд бүгдэд маань тодорхой таамаглал бий. Бид тодорхой үзэл бодлоос эхэлдэг. Энэ нь зүгээр. Харин бидний таамаглал Бичвэрийн тодорхой сургаалыг үл тоомсорлоход хүргэх үед асуудал үүсдэг. Бид дүгнэлтээс бус, харин текстээс эхэлж байгаагаа шалгах хэрэгтэй. Бидний таамаглал текстийг үл ойшоохыг бид зөвшөөрч болохгүй.

Жишээ

“Тиймд тэнгэрлэг Эцэг чинь төгс байдаг шиг та нар мөн төгс бай” (Матай 5:48).

Зарим хүмүүс "Хэн ч төгс биш!" гэж хэлдэг. Тиймээс тэд Есүсийн тушаалыг үл ойшоодог. Тэд өөрсдийн дүгнэлтээс эхэлдэг ("Хэн ч төгс биш!") бөгөөд Есүс юу гэж хэлэхийг зорьж байгааг ойлгохыг хичээдэггүй.

Матай 5:48 эшлэлийг судлахдаа бид "Есүсийн 'төгс' гэж хэлсэн нь ямар утгатай вэ? Бид ямар байдлаар тэнгэрлэг Эцэг шигээ байх ёстой вэ?" гэж асуух хэрэгтэй. Матай 5:48-ын өмнөх эшлэлүүд хариултыг өгдөг: Бид тэнгэр дэх Эцэг шигээ дайснуудаа хайрлаж, тэдэнд сайн зүйл хийх ёстой. “Тэрээр муу хүн дээр ч, сайн хүн дээр ч нараа мандуулдаг” (Матай 5:45).

Хэрэв бид энгийн зохиолчийн номыг уншвал энэ нь тодорхой хэмжээнд өөртэйгөө зөрчилдөж байгааг харах боломжтой. Хоёр зохиолчтой ном бол зарим асуудлаар бие биетэйгээ зөрчилдөх магадлалтай. Гэсэн хэдий ч Библи бол Бурханы Үг бөгөөд энэ нь өөртэйгөө зөрчилддөггүй.

Бурхан өөрчлөгддөггүй (Иаков 1:17). Тиймээс Түүний Үг хэдэн зуун жилийн туршид олон хүмүүн бичигчдээр бичигдэж ирсэн ч найдвартай хэвээр байдаг. Бурханы Үг өөртэйгөө зөрчилддөггүй.

Энэхүү зарчим нь Бурханы амьсгалтай холбоотой онол сургаалын зайлшгүй үр дүн юм: "Бичвэр бүр Бурханы амьсгалснаар байгаа..." (2 Тимот 3:16-17). Хэрэв Бичвэрийн бүрэн дүүрэн эх сурвалж нь Бурхан өөрөө бол Библи өөртэйгөө зөрчилдөх боломжгүй. Энэ нь Библийн сайн хөрвүүлэгт чухал юм. Хоёр багц хэсэг бие биетэйгээ зөрчилдөж байгаа мэт санагдах үед бид Бичвэрийн аль нэгийг нь буруу ойлгосон эсэхээ шалгах хэрэгтэй. Бид эшлэл бүрийг бүрэн гүйцэд ойлгох үед хоёр эшлэл аль аль нь үнэн гэдгийг харах болно.

Жишээ

“Хүн хуулийн үйлсээр бус харин итгэлээр зөвтгөгддөг гэж бид үздэг” (Ром 3:28).

“...хүн хуулийн үйлсээр бус, харин Христ Есүст итгэх итгэлээр зөвтгөгддөг” (Галат 2:16).

“Хүн зөвхөн итгэлээр бус, үйлсээр зөвтгөгддөгийг та нар харж байна” (Иаков 2:24).

Зарим уншигчид Паул, Иаков хоёр итгэл, үйлсийн үүрэг оролцооны тал дээр санал зөрөлдсөн гэж үздэг. Паул, хүн хуулийн үйлсгүйгээр зөвтгөгддөг гэж батлан хэлдэг. Иаков, хүн зөвхөн итгэлээр бус харин үйлсээр зөвтгөгддөг хэмээн бичжээ.

Эдгээр эшлэлийн хам сэдвийг харахгүй бол Иаков Паултай зөрчилдөж байна гэж бодоход хүрнэ. Гэсэн хэдий ч эшлэл тус бүрийн хам сэдэв Паул, Иаков нар юуны талаар өгүүлж буйг харуулдаг. Паул хүн хэрхэн аврагдаж, зөвтгөгдөх тухай ярьж байна. Хүн итгэлээр зөвтгөгддөг. Иаков хүн аврагдсанаа хэрхэн харуулдаг талаар өгүүлж байна. Хүн зөвтгөгдсөнөө үйлсээрээ харуулдаг. Паул, Иаков хоёулаа хүн итгэлээр зөвтгөгдөж, дараа нь үйлсээрээ зөвтгөгдсөнөө харуулдаг гэдэгтэй санал нийлэх байсан.

Энэ зарчим нь өмнөх зарчимтай нягт холбоотой. Бичвэр өөртэйгөө зөрчилддөггүй тул бид утга нь тодорхой бус багц хэсгийг ойлгохын тулд энгийн утгатай багц хэсгийг ашиглах боломжтой. Бид тайлбарлахад төвөгтэй эшлэлийг хөрвүүлэхдээ утга санаа нь тодорхой эшлэлийг ашигладаг. Бид тайлбарлахад илүү төвөгтэй эшлэлийн хөрвүүлэгт тохируулж, энгийн утгатай эшлэлийг гуйвуулдаггүй.

Хөрвүүлгийн сурах бичигт үүний талаар хэлэхдээ: “Библийн аль нэг хэсэгт бүдэг байгаа зүйл нь өөр нэг хэсэгт ихэвчлэн тодорхой байдаг.”[1] Бид Бичвэрийг бүхэлд нь судалснаар энгийн утгатай багц хэсгүүд нь тайлбарлахад төвөгтэй багц хэсгүүдийг гэрэлтүүлэх боломжийг олгодог.

Жишээ

“Тийм биш бол үхэгсдийн төлөө баптисм хүртэгч нь юу хийж байгаа хэрэг вэ? Хэрэв үхэгсэд огт амилуулагдахгүй юм бол юунд тэдний төлөө хүмүүс баптисм хүртдэг вэ?” (1 Коринт 15:29).

Энэ эшлэлээс болж зарим хүмүүс баптисм хүртээгүй нас барсан хүмүүсийн төлөө амьд хүмүүс баптисм хүртэх ёстой гэж боддог. Гэсэн хэдий ч Библийн аль ч хэсэг ингэж хийх талаар бидэнд хэлдэггүй. Паул уншигчдынхаа хэрэгжүүлж байсан ёс заншлыг дурдсан боловч, энэ заншил нь яг юу байсныг бид мэддэггүй.

Бичвэр нь Бичвэрийнхээ хамгийн сайн хөрвүүлэгч юм. Энэ зарчим нь 1 Коринт 15:29 эшлэлийг хөрвүүлэх чиглүүлгийг бидэнд өгдөг. Бид Матай 28:19, Үйлс 2:41, Үйлс 8:12, Үйлс 19:5 эшлэлүүдийг уншихдаа баптисм нь амьд итгэгчдэд зориулж хийдэг байсныг олж хардаг. 1 Коринт 15:29 эшлэлд нас барагсдын төлөө баптисм хийхийг тодорхой тушаагаагүй бөгөөд нэгэнт анхны чуулган амьд итгэгчдэд баптисм хийх тогтсон ёсыг үйлдэж заншсан байсныг бусад эшлэлүүд харуулдаг. Тэгэхээр 1 Коринт 15-р бүлэгт хэлснийг нас барагсдад баптисм хийх тушаал гэж үзэх шалтгаан байхгүй юм.

Бурханы Үгийн утгыг хөрвүүлгийн энгийн аргыг ашиглан өөрөөс нь олж болно. Бурханы Үгийг нууц кодоор бичээгүй.

Чуулганы эхэн үеэс сайнмэдээний бүх үнэн зөвхөн чуулганы онцгой гишүүдэд бус бүх хүнд нээлттэй байдлаар илчлэгдсэн юм. Зөвхөн дагалдагч нарт зориулсан нууц сургаал гэж байхгүй гэдгийг Есүс хэлж байсан (Иохан 18:20). Элч Паул Тимотод Паулын олон нийтэд заасан үнэнийг бусдад заахыг даалгасан (2 Тимот 2:2). Хэрэв хүмүүс үнэнийг харж чадахгүй байгаа бол энэ нь зориудаар нуусных биш, харин Сатан тэднийг сохолсон учраас тэр юм хэмээн Паул тайлбарлажээ (2 Коринт 4:1-6). Чуулганы үүрэг даалгавар нь Бурханы үнэнийг нээлттэй хуваалцах явдал байсаар иржээ.

Бичвэрийн ихэнх хэсгийн утгыг олж мэдэхийн тулд сайтар судлах шаардлагатай нь үнэн боловч, түүний үнэн биднээс нуугдмал байдаггүй. Бичвэрийн үндсэн үнэнүүд утга нь тодорхой бус эшлэлүүдэд нуугдаж хоцроогүй юм. Дуулаач, “Таны үг миний хөл дэх дэнлүү, Миний зам дахь гэрэл” (Дуулал 119:105) хэмээжээ. Бурханы Үгийн зорилго нь биднийг чиглүүлэх болохоос үнэнийг нуух явдал биш юм.

Бурханы Үгийн мэдээ сургаалыг тайлахын тулд ямар нэгэн онцгой түлхүүр шаардлагагүй. Библийн нууц кодыг тайлж байна гэж хэлдэг номуудад бүү итгэ. Бид Түүний Үгийг ойлгож чадахын тулд Бурхан ярьсан.

Жишээ

Хэдэн жил тутамд хэн нэгэн "Есүс ирэх жил ирнэ гэдгийг Бурхан надад илчилсэн" гэж олонд зарладаг. 1987 онд хэвлэгдсэн алдартай номд 1988 онд Есүс ирнэ хэмээн урьдчилан таамаглажээ. Зохиолч нь эртний еврей үндэстний баяруудыг судалснаар энэ баримтыг олж мэдсэн хэмээн мэдэгдэж байв. Үүнийг бичсэн зохиолч дараа жил нь 1989 онд шүүрэлт болохыг урьдаас өгүүлсэн ном бичсэн байна. Библийг тайлах нууц эсвэл чухал сургаалууд нь далд аргад үндэслэгддэг гэж ярьдаг хүмүүст бид итгэж болохгүй. Есүс хэлэхдээ, “Харин тэр өдөр, цагийг хэн ч эс мэднэ. Тэнгэрэлч нар ч, Хүү ч мэдэхгүй. Зөвхөн Эцэг л мэднэ” (Матай 24:36).

Энэ зарчим нь хэрэв Бурхан тушаавал үүнд нь дуулгавартай байх боломжийг ч Тэр олгодог гэдгийг хэлж байна.

“Хүү минь, намайг баярлуулахын тулд хоёр минутын дотор хоёр километр гүйгээд ир” гэж хэлэх эцэг хүн байна гээд төсөөлж үзье. Хэсэг хугацаанд хүү нь чадах чинээгээрээ хичээж магадгүй, гэхдээ тэр эцгийнхээ хүлээлтийг хэзээ ч биелүүлж чадахгүй. Эцэст нь хүү урам хугарч, оролдохоо болино. Энэ хүн сайн эцэг мөн үү?

Зарим хүмүүс Бурханыг ийм бодит бус эцэг гэж төсөөлдөг. Бурхан "ариун байгтун”[1] гэж хэлэхэд тэд "Бид түүний тушаалыг биелүүлж чадахгүйг Тэр мэднэ шүү дээ" гэж хэлдэг.

Жон Калвин бид "...хүмүүсийн хүчийг Бурханы [тушаалаар] хэмжиж чадахгүй" гэж хэлсэн байдаг.[2] Бурхан хүний хүчээр биелүүлж чадахгүй тушаалыг өгдөг бөгөөд аврагдсан хүмүүстээ дуулгавартай байх хүчийг ч өгдөг хэмээн Калвин итгэдэг байжээ. Жон Веслей Бурханы Үгэнд хэлэгдсэн тушаал бүрийг амлалт гээд үүгээр Бурханы хүч итгэгчийн дотор биелэх болно хэмээн заасан.

Хүн Бурханы тушаалыг өөрийн төрөлх хүчээр биелүүлж чадахгүй. Харин бид Бурханы тушаалыг Түүний хүчээр биелүүлж чадна. Хайр энэрлээр дүүрэн тэнгэрлэг Эцэг маань хүүхдүүддээ тушаалыг нь биелүүлэх хүчийг өгдөг. Хайр энэрлээр дүүрэн Эцэг хүүхдүүддээ боломжгүй тушаалыг өгч урмыг нь хугалдаггүй. Бичвэрийн тушаал бүрийг тушаалыг биелүүлэх нигүүлсэл дагалдаж байдаг.

Есүс "Чи Эзэн Бурханаа бүх зүрх, бүх сэтгэл, бүх оюун ухаанаараа хайрла" гэж тушаасан (Матай 22:37). Энэ нь тушаал ба амлалт аль аль мөн. Бурханыг хуваагдаагүй зүрхээр хайрлах тушаал нь хэрэв бид Түүнд итгэж найдвал хуваагдаагүй зүрхийг бидэнд өгнө гэсэн Түүний амлалтыг илэрхийлж байна.

Жишээ

“Тиймд тэнгэрлэг Эцэг чинь төгс байдаг шиг та нар мөн төгс бай” (Матай 5:48).

Есүс бүх талаараа төгс байх тухай биш, харин хайрлах талаар хэлж байгааг бид хам сэдвээс нь ойлгодог. Энэ нь өөрсдийн хүчин чармайлтаар биелүүлдэг зүйл ч биш гэдгийг бид ухаардаг. Биднийг төгс байхыг тушаадаг Бурхан бол тушаалаа биелүүлдэг Бурхан мөн. Дуулаач “Хүч чадлаар намайг бүсэлдэг Бурхан замыг минь төгс болгодог” (Дуулал 18:32) хэмээн гэрчилжээ.

Есүсийн тушаалыг зөвөөр ойлгох учиртай. Үүнийг Есүсийн сургаалын ойрын хам сэдэв болон төгс (хуваагдаагүй) зүрх, ариун (тусгаарлагдсан) хүмүүсийн талаарх Библийн сургаалын гэрэлд унших ёстой. Үүнийг ойлгосны дараа Есүсийн тушаал нь хүний хэрээс хэтэрсэн стандарт бус, харин нигүүлслийн амлалт болохыг хардаг.

Эвангелийн Христэд итгэгчдийн хувьд бид Библийг онол сургаал болон практикийн эцсийн эрх мэдэл хэмээн хүлээн зөвшөөрдөг. Авралд шаардлагатай бүх мэдлэгийг Библи агуулдаг.

Гэсэн хэдий ч бид уншсан зүйлээ янз бүрийн утгаар хөрвүүлдэг гэдгээ ялгадаг байх нь чухал. Ихэнх эвангелчүүдийн хувьд Библийг гурван линз ашиглан уншдаг. Эдгээр линз нь Бичвэрийн эрх мэдлийг ямар ч байдлаар орлуулдаггүй. Харин тэдгээр нь зүгээр л Бичвэрийг уншиж, ойлгох арга зам юм.

Бичвэрийг бүрэн ойлгохын тулд бид гурван линзийг бүгдийг нь ашиглах ёстой. Хэрэв аль нэг линзийг үл ойшоовол бид Бичвэрийг буруу хөрвүүлэх боломжтой. Эдгээр линзийг ашиглан Библийг унших нь Бурханы Үгийн мэдээ сургаалыг илүү сайн ойлгоход тусалдаг.

Эдгээр линз Библитэй хэрхэн холбоо хамааралтай болохыг харахад дараах зураг танд тусалж болох юм. Бид линзээр дамжуулан Библийг хардаг.[1]

Линз 1: Уламжлал

Бичвэрийг харах эхний линз бол уламжлал юм. Уламжлалын линз нь "Түүхийн туршид итгэгчид энэ Бичвэрийг хэрхэн ойлгож ирсэн бэ?" гэж асуудаг. Уламжлал нь түүхийн туршид бусад Христэд итгэгчдэд байсан ойлголттой харьцуулан, бидний текстийг ойлгох ойлголтыг шалгадаг.

Уламжлал нь анхны чуулганы итгэлийн тунхгууд, өнгөрсөн цаг үед итгэгчдийг нэгтгэж байсан агуу онол сургаалууд болон өмнөх үеийн сургаалуудыг тус тус багтаадаг. Уламжлал нь чуулганы түүхийн туршид Библи хэрхэн хөрвүүлэгдэж ирснийг харуулдаг.

Чуулганы уламжлал нь бүх асуудлын талаар санал нийлэхгүй байж болно. Хамгийн найдвартай уламжлал бол хаа сайгүй, бүх цаг үеийн туршид чуулганы зааж сургаж ирсэн зүйл юм. Бие даасан урсгал чиглэлийн уламжлалыг ч үүнд авч үздэг. Гэхдээ үүнийг даяар чуулганы уламжлалтай адил тэнцүү эрх мэдэлтэйд тооцдоггүй.

Бурхан өөрийн Үгийг ойлгоход бидэнд туслахын тулд уламжлалаар дамжуулан ярьдаг. Хэрэв таны хөрвүүлэг хэний ч харж байгаагүй утга санааг Бичвэрт тулгаж байвал та алдаа гаргажээ гэж үзэх хэрэгтэй!

Линз 2: Учир шалтгаан

Учир шалтгаан бол бидний ашигладаг хоёр дахь линз юм. Энэ линз нь "Энэхүү Бичвэрийн хамгийн үндэслэлтэй ойлголт нь юу вэ?" гэж асуудаг. Учир шалтгааны линз нь Бичвэрийг уншихдаа ойлгохын тулд оюун ухаанаа ашиглахыг биднээс хүсдэг. Бичвэр нь оюун ухаанаар учир шалтгааны үүднээс ойлгогддог гэдгийг энэ нь харуулдаг. Бид Бичвэрийг ойлгохын тулд учир шалтгааныг ашигладаг. Гэхдээ бид учир шалтгааныг ашиглан үнэнийг баталж чадахгүй ч үүнээс болж Бичвэрийн үнэнийг үгүйсгэх ёсгүй юм. Олон хүн гайхамшгийг учир шалтгааны эсрэг зүйл гэж боддог учраас Библид бичигдсэн гайхамшгийг үгүйсгэдэг. Гэсэн хэдий ч гайхамшиг нь учир шалтгааны эсрэг биш бөгөөд Бурхан гайхамшиг үйлдэх хүчтэй гэдгийг бид оюун ухаанаараа ойлгодог.

Зарим итгэгчид учир шалтгааныг ашиглахыг эсэргүүцдэг. Нүглийн уналтаас болж бидний оюун ухаан ч гажуудсан тул бид Бурханы Үгийг ойлгохын тулд оюундаа найдаж болохгүй гэж тэд мэтгэлцдэг. Хүний оюуны чадавхи хэмжээ хязгаартай нь үнэн. Гэсэн хэдий ч Паулын жишээг харвал, тэр мэтгэлцэхдээ учир шалтгааныг тогтмол ашиглажээ. Жишээлбэл, Ром номд Паул уншигчдыг авралын агуу үнэний талаарх логик ойлголт руу хөтлөх хэд хэдэн асуултыг тавьсан байдаг. Хэдийгээр бидний учир шалтгаан хэзээ ч эцсийн эрх мэдэл болохгүй ч, Бичвэрийн учир шалтгааны үндэслэлийг үл ойшоох ёсгүй.

Линз 3: Туршлага

Туршлага бол сүүлчийн линз юм. Энэ линз нь "Миний ойлголт бусад итгэгчдийн туршлагатай нийцэж байна уу?" гэж асуудаг. Хувийн туршлагыг туйлын үнэнээс дээгүүр тавьж итгэж болохгүй. Гэхдээ туршлага нь уламжлал, учир шалтгаантай тэнцвэржих үед үнэ цэнтэй болдог.

Эдгээр линз тус бүр чухал юм. Хэрэв бид зөвхөн уламжлалыг ашиглавал, чуулганы сургаалыг эрх мэдлийн хувьд Бичвэртэй тэнцүү гэж үздэг Ромын католикчуудын алдааг давтах болно. Хэрэв бид зөвхөн учир шалтгааныг ашиглавал, оюун ухааныг эцсийн эрх мэдэл гэж үзэх боломжтой. Хэрэв бид зөвхөн туршлагыг ашиглавал, бидний хөрвүүлэг хязгаарлагдмал байх бөгөөд хувь хүний мэдрэмж, харах өнцөг, үзэл бодолд суурилах болно. Эдгээр линз нь Бичвэрийг ойлгоход туслах арга хэдий ч Бичвэрийн эрх мэдэлтэй зөрчилдөх хэмжээнд тэдгээрийг ашиглах ёсгүй юм.

Жишээ

“Иймд би Эцэгийн өмнө өвдөг сөгдөж… Та нар Бурханы бүх дүүрлээр бялхах болтугай” (Ефес 3:14, 19).

Паул Ефесийн итгэгчдийг Бурхантай харилцах харилцаандаа илүү гүнзгий өсөхийн төлөө залбирчээ. Тэр тэдний төлөө "Бурханы бүх дүүрлээр бялхах болтугай" хэмээн залбирсан. Хэрэв бид энэхүү залбирлыг дээрх гурван линзийн тусламжтай уншвал юу олж мэдэх вэ?

Уламжлал. Бурхан итгэгчдэд илүү дотно харилцаа алхааг амладаг болохыг бүх цаг үеийн Христэд итгэгчид зааж сургасаар иржээ. Бурхан итгэгчдийн төлөө энэхүү зорилгоо хэрхэн биелүүлдэг талаарх нарийн ширийн зүйлс дээр бүх итгэгчид санал нийлдэггүй ч чуулганы түүхийн туршид олон янзын чуулганы төлөөлөл болсон итгэгчид Бурхан өөртэйгөө илүү дотно харилцаатай байлгахаар хүүхдүүдээ дууддаг гэдэгтэй санал нийлдэг.

2-р зуунд Irenaeus бидний төлөөх Бурханы зорилгын талаар "бид Бурханы дүр төрхөөр, Түүнтэй адил байхаар бүтээгдсэн" хэмээн бичжээ.”[2] Irenaeus итгэгч бүр Бурханы бүх дүүрлээр бялхаж чадна гэж итгэдэг байжээ. 4-р зуунд Ниссагийн Грегори зэрэг Дорнодын зохиолчид итгэгч хүн Бурханы бүх дүүрэн байдлаар улам бүр дүүрсээр байх ёстой хэмээн сургажээ. 17-р зуунд Францын католик Франсуа Фенелон Бурханы нигүүлслийн хүчээр бид "Есүс шиг амьдрах, Түүн шиг бодох" чадвартай гэж бичжээ.”[3] Бурханы нигүүлслээр бид Түүний дүр төрхтэй нийцэж чадна.

Учир шалтгаан. Паулын залбирлыг уншихдаа бидний учир шалтгаан "Энэ залбирлыг хөрвүүлсэн миний хөрвүүлэг Бичвэрийн бусад багц хэсэгтэй нийцэж байна уу?" гэж асуудаг. Энэ залбирлыг итгэгчдийн гүн гүнзгий амьдралын амлалт гэж хөрвүүлэх нь үндэслэлтэй юу? Бусад Бичвэрээс Ром 12:1, 1 Тесалоник 5:23 болон бусад текстэд гүн гүнзгий амьдрал нь итгэгчдийн төлөө боломжтой болохыг бид олж хардаг. Бурханы бүх дүүрлээр бялхах нь үндэслэл бүхий юм.

Туршлага. Түүхийн туршид итгэлийн агуу амьдралаар амьдарсан хүмүүсийн туршлага нь гүн гүнзгий амьдралын төлөөх тэдний цангааг харуулдаг. Христийг бүрэн дагадаг итгэгч хүн бүр Бурханыг илүү ихээр хүсэмжилдэг. Итгэгчдийн агуу амьдралын гэрчлэл нь Бурханы нигүүлслээр тэрхүү цангаа тайлагддаг гэдгийг харуулдаг.

Чуулгануудын дунд өөрөөр тайлбарлагддаг, заримдаа найзуудын дунд маргаан үүсгэдэг Бичвэрийн багц хэсгүүд байдаг. Та эдгээр багц хэсгээс аль нэгийг харахдаа зөвхөн өөрийн үзэл бодлыг хамгаалахын оронд дараах асуултуудыг асууж үзээрэй:

• Би дүгнэлтээс эхэлж байна уу? Би Бичвэрийг уншихаасаа өмнө Бичвэр юу гэж өгүүлж байгаа талаар бодож шийдвэрээ гаргасан уу?

• Энэ Бичвэрийн талаарх миний хөрвүүлэг бусад Бичвэрийн хэсгүүдтэй зөрчилдөж байна уу?

• Бусад эшлэлүүд энэ хэсгийг илүү тодорхой ойлгоход ойлголтыг өгч байна уу?

• Миний хөрвүүлэг далд утга санаа сургаалд үндэслэгдсэн үү эсвэл би энэ хэсгийг аль болох тодорхой байдлаар хөрвүүлж байна уу?

• Энэ багц хэсэгт тушаал байна уу? Хэрэв тийм бол тушаалаар илэрхийлэгдэж буй амлалт нь юу вэ?

• Христийн чуулганы үе дамжин зааж ирсэн уламжлал энэ хэсгийн талаар юу гэж хэлдэг вэ?

• Энэ багц хэсгийн тодорхой, учир шалтгааны үндэслэлтэй ойлголт юу вэ?

• Бусад итгэгчдийн туршлага энэ багц хэсгийн талаар юу гэж хэлдэг вэ?

Эдгээр асуулт нь багц хэсгийн талаарх таны хөрвүүлэгтэй бүрэн санал нийлэх баталгааг өгөхгүй ч, эдгээр нь хөрвүүлэгтэй санал нийлэх хэсгийг олоход тусалж болох юм. Хэрэв үгүй бол, эдгээр асуулт нь Бурханы Үгийн эрх мэдэлд үнэнч, чин сэтгэлээсээ дагадаг итгэгчдэд Бичвэрийн зарим хэсгийг хөрвүүлэхдээ санал нэгдэхгүй байх шалтгааныг ч тодруулахад тус болж магадгүй юм.

Хичээл бүрийн гол санаанууд

(1) Библийн хөрвүүлгийн үндсэн зарчмуудыг ойлгосноор та судлах явцдаа буруу дүгнэлт хийхээс сэргийлнэ.

(2) Дүгнэлтээс биш, текстээс эхлэх. Өөрийн урьдач таамаглалаас болж текстийг үл ойшоохгүй байх.

(3) Бичвэр нь Бичвэртэйгээ зөрчилддөггүй. Хэрэв хоёр багц хэсэг хоорондоо зөрчилдөж байгаа мэт санагдвал та тэдгээрийн аль нэгийг буруу ойлгосон эсэхээ шалгаарай.

(4) Бичвэр нь Бичвэрийнхээ хамгийн сайн хөрвүүлэгч юм. Энгийн утгаар ойлгогдох багц хэсгүүдийг төвөгтэй хэсгийг хөрвүүлэхэд ашиглаарай.

(5) Бичвэр нь ойлгогдохоор бичигдсэн. Текстийн энгийн утгыг хайж олох.

(6) Библийн тушаал нь Библийн амлалтыг илэрхийлдэг. Тушаалыг өгсөн Бурхан биднийг дуулгавартай байхад хүчирхэгжүүлдэг.

(7) Авралд шаардлагатай бүх мэдлэгийг Библи агуулдаг.

(8) Бид Бурханы Үгийг ойлгоход туслах гурван линзээр Бичвэрийг хардаг:

• Уламжлал: түүхийн туршид бусад Христэд итгэгчдэд байсан ойлголт

• Учир шалтгаан: текстийн утгыг учир шалтгаанд үндэслэн ойлгох

• Туршлага: Итгэгчдийн сүнслэг туршлага