► Нэг суралцагч Матай 18:2-6, 10-14–ийг ангид уншина. Эдгээр эшлэлээс анхаарах зүйл юу байна вэ? Бурхан хүүхдүүдийг ямар чухал гэж үзэж байгааг та хэрхэн тайлбарлах вэ?

Заримдаа хүмүүс хүүхдүүд манай дараа үе, чуулганы ирээдүй, хожмын удирдагчид учраас маш чухал гэж үздэг. Бүгд үнэн. Гэхдээ хүүхдүүд хүн учраас л хамгийн чухал байгаа юм. Заримдаа томчууд хүүхдүүдийг мөнх амийг авах ёстой хүн, танигдаагүй их нөөц боломж гэдгийг мартах хандлагатай байдаг.

Бурхан эртний Израилтай гэрээ байгуулж, тэднийг ерөөж, халамжилна гэдгээ амласан билээ. Гэхдээ дуулгавартай байх шаардлагыг мөн тавьсан байдаг.

Бурхан бүх үеийнхэнтэй гэрээ байгуулахын хүсдэг. Тэрбээр “Өнөөдөр чамд миний тушааж буй энэ үгсийг чи зүрхэндээ байлгаж, хөвгүүдээ үүгээр хурцлан… ” (Дэд хууль 6:6-7) хэмээн хэлж байна.

Бурханы ерөөлүүд болзолтой бөгөөд хүмүүсийн дуулгавартай байх эсэхээс шалтгаалдаг байсан учраас Бурханы хүслийн дагуу хүүхдүүдийг өсгөж хүмүүжүүлэх нь маш чухал байлаа. Хэрэв дараа үеийнхэн Бурханд үнэнч, дуулгавартай байхыг хүсэхгүй бол Бурхантай харилцах харилцаанаас ирдэг ашиг тусыг алдах болно. Тиймээс хүүхдүүдэд сайтар зааж сургах шаардлагатай.

► Хүүхдүүдээ Бурханыг баталгаатай дагадаг болгохын тулд израилчууд юу хийдэг байсан гэж та бодож байна?

Бурхан тэдэнд хүүхдүүдээ сургах зарим заавар чиглүүлгийг өгсөн байдаг.

Та нар түүнийг хөвгүүддээ зааж, гэртээ сууж байхдаа ч, замд явж байхдаа ч, хэвтэхдээ ч, босохдоо ч түүний тухай ярьж бай. Та нар үүнийг гэрийнхээ хатавчин дээр, хаалган дээр ч бич (Дэд хууль 11:19-20).

Бурханы хэлж байгаа санаа яг юу вэ? Энэ бол хааяа биш, харин хичээнгүйлэн, байнга, тууштай заах ёстой гэсэн санаа юм.

Тэд Бурханы хуулийг сануулагчийг нүдэнд харагдахуйц газар байрлуулах ёстой байв. Тэд хаа сайгүй Бичвэрийг үзэж байх ёстой ба Бурханы зарлигуудыг огтхон ч мартах ёсгүй байлаа.

Байнга заах гэдэг нь Бурханы хуультай зөрчилдөх зугаа цэнгэл, гоёл чимэг, биеэ авч явах байдлаас хол байна гэсэн үг.

Тиймээс эцэг эхчүүд Бурханы заасан үнэ цэнийг байнга, тууштайгаар хүүхдүүддээ зааж, үүний эсрэг үзэл суртал бүхий сургаалаас хамгаалах үүрэгтэй гэдгийг эдгээр эшлэлд онцлон хэлжээ.

► Энэхүү тушаал нь эцэг эхчүүдэд өгөгдсөн. Бид чуулганы үйлчлэлд хэрхэн үүнийг хэрэгжүүлэх вэ?

Нэгдүгээрт, хүүхдийг сургах нь эцэг эхийн үүрэг гэдэг нь ойлгомжтой. Тиймээс чуулган эцэг эхчүүдэд хүүхдүүдээ хэрхэн сургах ёстойг заах учиртай. Эцэг эхчүүд сүнслэг удирдамж өгч чадахгүй учраас үүнийг хүүхдүүд чуулганаас сурах ёстой гэж хэзээ ч бодож болохгүй.

Хоёрдугаарт, чуулган аль болох гэр бүлийнх нь хүрээнд хүүхдүүдэд үйлчлэх ёстой. Эцэг эхэд нь туслах замаар хүүхдүүдэд үйлчил. Сайнмэдээг түгээхдээ гэр бүлээр нь чуулган руу хандуулахыг хичээгээрэй.

Итгэгч бус гэр бүлээс гаралтай хүүхдүүд чуулганд ирж итгэгч болдог тал бий. Тийм үед чуулган аль болох гэр бүлд нь хүрч үйлчлэхийг хичээх хэрэгтэй. Харин эцэг эх нь сайн хариу өгөхгүй байгаа тохиолдолд чуулган л уг хүүхдийн сүнслэг гэр бүл болно. Чуулганы гишүүд сүнслэг халамж үзүүлдэг, садан төрлүүд мэт хандах учиртай.

► Аливаа чуулганы хүүхдийн үйлчлэлийн амжилтыг та хэрхэн үнэлэх вэ?

Хүүхдийн үйлчлэлд:

• Багш нар чинь онцгой чадвартай

• Хүүхэд, багш нарын тоо өсдөг

• Хүүхдүүд Библийн мэдлэгийг авдаг

• Багш нар сайн чанартай материал хэрэглэдэг

• Хүүхдүүд цуглаандаа дуртай

гэх мэт шинжүүд байлаа гээд амжилттай үйлчилж байна гэсэн үг биш юм.

Амжилттай хүүхдийн үйлчлэлд эдгээр шинжүүд бий. Хэрэв үйлчлэл эдгээрээр юм уу, заримаар нь дутвал мэдээж асуудал гарна. Гэхдээ эдгээрийг бүгдийг нь эсвэл заримыг нь хэрэгжүүлж чадлаа ч үйлчлэл амжилтгүй болж болно.

Хүүхдийн үйлчлэлд дараах шинж чанар байвал амжилттай. Үүнд:

• Хүүхдүүд итгэж, авралын баталгаатай болсон бол

• Хүүхдүүд аажмаар сүнслэг тал дээр төлөвшиж байвал

• Хүүхдүүд том болох тусмаа христитгэлийн зарчмуудыг дагаж байвал гэх мэт.

Танай хүүхдийн үйлчлэлд ийм хүүхдүүд байвал амжилтгүй байна гэсэн үг. Үүнд:

• Христийн дагалдагч биш

• Дэлхийлэг зүйлийг үлгэр дуурайл болгодог

• Том болох тусмаа зугаа цэнгэл, элдэв харилцааг дагадаг

• Бурханы хүслийг үл тоож, хувийн ашиг сонирхлоо хөөдөг гэх мэт.

Амьдралаа Бурханы үнэнд нийцүүлэх нь дагалдагчийн хийх ажил. Итгэгч хүн Есүсийн төлөвшсөн дагалдагч болохоор хөгжих ёстой. Христийг хүлээж авлаа гээд хүний бодол санааны хэвшил, хандлага, ойлголт, амьдралын хэв маяг нь шууд автоматаар Бурханы үнэнтэй нэгдчихнэ гэсэн үг биш. Үүнийг сурахад цаг хугацаа шаардлагатай бөгөөд энэ л жинхэнэ дагалдагчийн үүрэг юм.

► Хүүхдүүдэд үйлчлэхэд хамгийн түрүүнд юу хэрэгтэй гэж та бодож байна?

Хэдэн хүүхэд, томчуудыг оролцуулан бүлэг байгуулаад хүүхдийн үйлчлэлийг хурдан хугацаанд нээж болно. Ер нь аливаа бүлэгт төрөлхийн удирдагч, албан ёсоор томилогдоогүй ч зан чанараараа бусдад нөлөөлдөг хүмүүс байдаг. Томчуудын дунд ч, хүүхдийн дунд ч энэ адилхан.

Эерэг сүнслэг уур амьсгалтай, христитгэлийн орчныг бий болгох нь үйлчлэлийн хамгийн эхний шаардлага болдог. Тийм орчинд оюун ухаан, бие бялдар, сүнслэг болон нийгмийн хувьд төлөвшөөгүй итгэгчдийг хүмүүжүүлэх боломжтой.

Үүгээрээ насанд хүрэгчид нь оюун санааны хувьд үлгэр дуурайл болохуйц хүмүүс байдаг гэж хэлэх гээгүй юм шүү. Тиймээс та жинхэнэ итгэгч биш хүнийг хүүхдийн үйлчлэлд авч болохгүй. Таны дамжуулж байгаа сайнмэдээнээс татгалзахад хүргэж чадах хүчтэй сөрөг нөлөө үзүүлдэг хүүхдүүдийг мөн бүлэгтээ оруулах хэрэггүй.

Хэрэв дараах шинжүүд байгаа бол танай хүүхдийн үйлчлэл хэдийн бүтэлгүйтжээ. Үүнд:

• Үйлчлэлд тусалж байгаа насанд хүрэгчид онцгой чадвар, эсвэл өөр ямар нэг шалтгааны улмаас тэнд байгаа боловч сүнслэг тал дээр сайн үлгэр дуурайл болж чадахгүй байгаа бол,

• Сүнслэг зүйлийг сонирхдоггүй хүүхдүүд гол яриаг удирдан өрнүүлж, бүлэг дотор нийгмийн харилцаа давамгайлж байвал,

• Сүнслэг үйл ажиллагааг зөвхөн томчууд удирдаж, хүүхдүүдийн оролцоо бага байвал,

• Цөөхөн хүүхэд сүнслэг хэрэгцээг сонирхож, хамтран ажилладаг боловч тэднийг бусад нь хүлээн зөвшөөрдөггүй бол гэх мэт.

  Хүүхдийн бүлгээ хараад дараах асуултыг өөрөөсөө асуугаарай. Хэрэв танай хүүхдийн бүлэгт шинэ хүү ирж эхэлбэл тэр хүү ямар хүүхдийг илүү дагаж нөхөрлөх бол? Хэрэв танай хүүхдийн бүлэгт шинэ охин ирдэг боллоо гэхэд тэр охин ямар хүүхдийг илүү дагах бол? Тэд сайн нөлөө авах уу, муу нөлөө авах уу?

Тиймээс эелдэг христитгэлийн орчныг бүрдүүлэх нь хүүхдийн үйлчлэлийн хамгийн эхний шаардлага юм. Энэхүү эхний хэрэгцээг бий болгохоос үйлчлэл эхэлнэ. Хэрэв ийм орчин байхгүй бол, ямар нэг байдлаар үүнийг дахин бий болгох ёстой. Эс бөгөөс зорилгодоо хүрч чадахгүй.

Бурханы мэдлэг харилцаагаар дамжуулан ирнэ.

Бурхан Иаковтай ярьж, Өөрийгөө мэдүүлэх үедээ “Би ертөнцийн Эзэн” эсвэл “Би энэ дэлхийг бүтээсэн Бурхан” гэж хэлээгүй. Хэдийгээр аль аль нь үнэн боловч Тэрбээр “Би бол ЭЗЭН, чиний эцэг Абрахамын Бурхан, Исаакийн Бурхан байна.” (Эхлэл 28:13) гэж хэлсэн байдаг. Бурхан Өөрийгөө хүмүүсээр дамжуулан илэрхийлдэг.

Абрахам итгэлийн хүн болж, бусад нь Абрахамаар дамжуулан Бурханд итгэсэн юм. Тиймээс Абрахамын зарц Елиезер “Миний эзэн Абрахамын Бурхан” гэж залбирсан байдаг (Эхлэл 24:12).

Таны итгэлийн улмаас Бурханыг илүү ихээр мэдэхийг хүсдэг хүмүүс гарч ирэх учиртай. Заримдаа бид хүмүүст мэдэх ёстой, хийх ёстой зүйлийг нь хэлж өгөх нь л дагалдуулалт гэж боддог. Тийм биш. Юуны өмнө та тэдэнд дагалдагч болохыг хүсмээр амьдралыг харуулах ёстой. Хэрэв тэд тан шиг амьдрахыг хүсэж байгаа бол таны хэлэх үг, зааврыг дагах болно.

Дагалдуулна гэдэг нь амьдралын туршид байх харилцаа юм. Амьдралын хэв маяг, хүсэл эрмэлзэл, үнэт зүйл бүгд дагалдуулагчаас дагалдагч руу шилждэг зүйлс.

Багш хүн амьдралынхаа хэв маяг, сэдэл, гол үнэт зүйлсээ сурагчдаа суулгаж өгснөөр дагалдуулалт бий болдог гэж амьдралаа шилжүүлэх зарчимд заажээ.

Нэгдүгээр зууны еврей рабби нар дагалдуулалт гэдэг бол амьдралаа шилжүүлэх үйл хэрэг гэдгийг ойлгодог байжээ. Нэгэн залуу рабби дээр очиж шавь болохыг хүсжээ. Хэрэв рабби зөвшөөрвөл амьдралаа хуваалцаж эхэлнэ гэсэн үг. Шавь нь үргэлж хамт байж, зөвхөн сургаалыг нь суралцаад зогсохгүй мөн амьдралд хандах хандлагыг нь бас суралцдаг байв.

Харин Есүс дагалдагч болох хүсэлт гаргаагүй хүмүүсийг сонгосноороо тэр үеийн багш нараас ялгаатай байлаа. Гэхдээ амьдралаа шилжүүлэх зорилгоор хамтдаа байж, суралцдаг тэр үеийн заншлыг дагасан юм.

Есүсийн үхэл амиллын дараа зарим дагалдагчид баривчлагдаж, Есүсийг яллаж байсан тэр шүүхийн өмнө очсон байдаг. Есүсийг л зайлуулчихвал бүх асуудал шийдэгдэнэ гэж иудейн зөвлөлийнхөн бодсон бололтой. Тэд Есүсийн дагалдагчдыг айлгаж, дуугүй болгоход цөөн хэдэн заналхийлэл хангалттай гэж тааварласан. Тэд дагалдагчдыг шалгах явцад дагалдагчдыг өндөр боловсролгүй, шүүхийн гишүүдээс доогуур боловсролтой хүмүүс гэдгийг харсан биз. Гэхдээ тэднийг Есүстэй хамт байсныг зөвлөлийнхөн мэдсэн тухай Библид дурдаж байна (Үйлс 4:13). Есүс Өөрийнхөө амьдралыг тэдний дээр тамгалсан байв.

Зөвлөлийнхөн дагалдагчдаас Есүсийн юуг олж харсан бэ? Хэв маяг, эсвэл хэлж ярих арга барил байв уу? Магадгүй юм. Гэхдээ үүнээс ч илүү зүйлийг олж харсан. Тэд тэнгэрлэг дуудлагыг ухаарахад ирдэг эр зоригийг олж харсан юм. Тэд ямар ч үнээр хамаагүй үнэний төлөө тууштай зогсож байхыг нь харсан. Түүнчлэн эрх мэдэлд хүндэтгэлтэй ханддаг ч буулт хийх, хоёр нүүр гаргахаас татгалзаж байгааг нь олж харсан юм. Авилгад автсан улс төрчид, хоёр нүүрт шашны удирдагчид асуудал дөнгөж эхэлж байгааг мэдээд чичирч байсан биз. Есүс тийнхүү дагалдагчдаараа дамжуулан нөлөөгөө өсгөж, мөнхжүүлжээ.

Доктор Паул Брэнд анагаах ухааны чиглэлээр суралцаж буй залуу оюутнууд нь Энэтхэгийн нэгэн эмнэлэг дээр үзлэг, оношлогооны дадлага хийж байхыг ажиглаж байв. Нэгэн оюутан өвчтөнүүдтэй тун эелдэг харилцаж байх бөгөөд нүүрэнд нь тодорч байгаа илэрхийллийг хараад Паул эмч маш их гайхжээ. Тэрхүү нүүрний илэрхийлэл нь Паул Брэнд эмчийг Англид сургаж байсан Доктор Пилчерийн нүүрний илэрхийлэлтэй тун адилхан байлаа. Пилчер эмч хэзээ ч Энэтхэгт ирж байгаагүй учраас дадлагын оюутан яагаад түүнтэй ийм адилхан үйлдэл хийж байгааг гайхан асуужээ. Эцэст нь дадлагажигч оюутнуудын нэг нь “Бид Пилчер эмчийг мэдэхгүй боловч Брэнд эмч таныг мэднэ. Таны нүүрний илэрхийлэл тийм байдаг” гэж хэлжээ.”[1]

Үүгээр заах гэж оролдоогүй үедээ заадаг үйл хамгийн үр дүнтэй байдаг нь харагдаж байна. Та юуг ч заах гэж оролдоогүй үедээ хамгийн ихийг зааж байдаг. Нэг хүн “Та үгээрээ бага зэрэг, үйлдлээрээ маш ихийг заадаг” гэж хэлсэн байдаг.

Өөрийнхөө үлгэр дуурайлын нөлөөнөөс болгоомжил. Та үргэлж зааж байна. Та амьдралын хэв маягаараа бусдыг дагалдуулдаг. Та асуудалд яаж хандаж байгаа байдлаараа дагалдагчдаа асуудалд хэрхэн хандах замыг зааж өгдөг. Хүүхэдтэй ажиллахад эелдэг байдал, тэвчээр, маш чухал. Зарим хүн хүүхдүүдэд бусдаас илүү эелдэг, халамжтай, тэвчээртэй хандах чадвартай байдаг.

Хэрэв та бүрэн анхаарлаа хандуулж чадвал тухайн хүнд үнэ цэн өгч байна гэсэн үг. Хүнтэй ярихдаа яарах хэрэггүй. Нүүр буруулах, дараагийн хийх юм руугаа яарах, ярьж байх үед нь юм хийх, эсвэл анхаарлаа өөр хүн рүү хандуулах зэрэг биеийн хэлэмжээ анзаарч байгаарай.

Сайн сонсох дадал зуршлыг хэвшүүлээрэй. Нүдээрээ харилцах, анхаарлаа төвлөрүүлэх, анхаарал сарниулах зүйлийг үл тоомсорлох, илтгэгчийн хошигнол болон бусад сэтгэл хөдлөлд хариу үйлдэл үзүүлэх зэрэг нь сайн сонсож байгаагийн шинж тэмдэг юм.

Хэрэв үнэхээр яарч байгаа бөгөөд сонсоод байж чадахгүй бол түүнийгээ тайлбарлаж болно. Хэрэв та хүмүүст анхаарлаа ихэвчлэн хандуулдаг бол таны үйлдэл тэднийг гомдоохгүй. Харин та цаг гаргая гэвч дэндүү завгүй, мөн бусдаар хийлгэх хэрэгтэй гэж боддог бол та хэсэг зогсосхийгээд, таны жинхэнэ ажил юу вэ гэдгийг бодож үзээрэй.

► Ямар хүүхдүүд таны амьдралд байна вэ? Тэдэнд чухал гэдгийг нь харуулах ямар арга замууд байдаг вэ? Танд өөрчлөх ёстой зарим нэг зуршил байна уу?

Бурханд цаг гаргах нь бүхий л чадвараас илүү чухал юм. Бурханд авьяас чадвараас маань илүүгээр бидний анхаарал хэрэгтэй. Түүний дуудлагыг биелүүлэх чадварыг Бурхан хүнд өгдөг.

Залуу хүмүүс олон зүйл дээр тогтвортой байж чаддаггүй. Нэг өдөр сүнслэг, нөгөө өдөр тэрслүү мэт, эсвэл өгөөмөр сэтгэлтэй эсвэл хувиа хичээсэн зантай юм шиг, мөн төлөвшсөн ч юм шиг эсвэл хүүхэд ч юм шиг болж хувирч байдаг. Энэ бол хоёр нүүр гаргаж байгаа хэрэг биш. Харин хөгжиж байгаа нь тэр бөгөөд зан чанар нь тогтвортой биш байна гэсэн үг.

Хэдийгээр залуу хүмүүс тогтворгүй байдаг ч та тэдэнд тууштай хандах ёстой. Тэднийг бүтэлгүйтэх үед та үнэ цэнийг нь унагах юм хэлбэл тэдний өөртөө итгэх итгэлийг унагана. Тэд хэн болохоо хараахан мэдээгүй байгаа учраас таны үнэлгээ тэднийг ямар хүн болоход нөлөө үзүүлнэ.

Хүүхдүүдийн амьдралд зориулсан Бурханы онцгой төлөвлөгөөний талаар их ярь. Бурхан хүн бүрд онцгой чадвар өгсөн гэдгийг хэл. Бурханы хүслийг олбол сэтгэл ханамжтай болдог тухай ярьж өгч байгаарай.

Удирдах чадвартай залуу хүн олон санаатай байж болох ч муу хүнээс салж чаддаггүй тал бий. Сайн мууг ялгах нь төлөвшлийн нэг тал учраас мэргэн ухаанд суралцахад нь түүнд тусал. Гэхдээ гаргасан санааг нь мохоож болохгүй.

Хамгийн гол нь хүн бүрд зориулсан Бурханы төлөвлөгөө гэж бий бөгөөд Тэрбээр үүний төлөө ажилласаар байна. Хүүхдүүдийг хөгжүүлэх Бурханы төлөвлөгөөний дагуу ажиллаж чадахын төлөө залбираарай. Залуусын амьдралд Бурханы зөв чиглүүлэг, хангамж, гайхамшгууд байхын төлөө залбир.

► Сайн заах арга ямар ямар хэв шинжийг агуулдаг вэ? Та хичээл зааж байгаа хүнийг хараад сайн багш гэдгийг нь яаж мэдэх вэ?

Багш хүн заах аргыг хянаж авч явдаг. Хичээлээ төлөвлөх үедээ нарийн анхаарах ёстой хэд хэдэн тал бий.

(1) Заавар өгөх хэмжээ

Хүмүүс нарийхан хүзүүтэй ваар шиг байдаг. Шингэнийг хэт хурдан асгавал зарим нь орохгүй.Хүн шинэ мэдээлэл олж авахдаа үүнийгээ өмнө нь мэддэг зүйлтэйгээ холбож ойлгодог. Түүнчлэн шинэ мэдээлэл нь амьдралд ямар хамаатай болохыг бас багш бодох ёстой. Ер нь ​​мэдээллийг хүлээж авах хүний хурд хязгаартай.

Мартаж болох олон санааг нэг дор багтааж хэлэх гэснээс нэг санааг мартагдахааргүй арга барилаар хэлж өгсөн нь дээр. Хүүхдүүд ач холбогдолгүй олон тооны мэдээллийг сонссоноос нэг чухал ойлголтыг хэрхэн хэрэгжүүлэх талаар сурах нь илүү дээр.

(2) Бүлгийн хэлэлцүүлэг

Ихэнх хүмүүс сурч байхдаа бусадтайгаа ярилцах, асуулт асуух, сурч байгаа зүйлээ өөрийнхөө үгээр давтан хэлэх шаардлагатай байдаг. Хэрэв багшийн заах арга барил нь сонсогчдод харилцах боломжийг өгөхгүй бол тэд тийм ч их зүйлийг сурч чадахгүй.

Та “Энэ яагаад чухал вэ?” эсвэл “Таны мэдэх ёстой хамгийн чухал зүйл юу вэ?” гэх мэт асуултаар сэдвээ эхэлж болно. Танилцуулах хэсэгт их цаг үрэлгүйгээр сонирхол татах аргуудыг ашиглах хэрэгтэй.

Хэсэг мэдээлэл өгсний дараа тухайн ойлголтыг өөр өөрийнхөө үгээр тайлбарлах боломжийг олгох үүднээс багш асуулт асууж болно. Жишээлбэл: “Энэ түүх дээрх хүн ямар алдаа гаргасан бэ?” эсвэл “Энэ яагаад бидэнд чухал вэ?” гэх мэтээр “Тийм, үгүй” гэх хариулт биш, харин тайлбартай хариулт өгөх асуултуудыг асуу. Асуултууд ихэвчлэн хүүхдүүдээс хангалттай хариулт авч болохуйц хялбар байх ёстой. Хэрэв хариулт нь дандаа буруу байвал хүүхдүүд оролцох сонирхолгүй болдог.

• Суралцагчийг хувийн зүйлээ хуваалцаж ярихыг шахаж болохгүй. Үүний оронд өөрөө чөлөөтэй хуваалцах уур амьсгалыг бүрдүүлээрэй.

• Зарим суралцагчийг ганцааранг нь яриулаад байж болохгүй. Тиймээс чимээгүй байгаа суралцагчаас “Чарльз, чи юу гэж бодож байна?” гэх мэтээр асуух юм уу, “Та нар юу гэж бодож байна?” гэх мэтээр бусдынх нь оролцоог хангах ёстой.

• Ангид бусдыг үл тоомсорлон өөрийнхөөрөө хэлэлцүүлгийг хийх гэж зүтгэдэг хүмүүсийг бүү яриул.

• Ярьж буй хүүхдийн яриаг таслахыг хэнд ч зөвшөөрөх ёсгүй.

• Санал сэтгэгдэл бүрийг шүүмжлэх бус, харин ямар нэг байдлаар эхлээд бататгаж өг. Хэрэв залруулах шаардлагатай бол сэдвийг өргөтгөх замаар залруулж өгөх нь зүйтэй.

(3) Хамаарал

Өөрөөсөө үргэлж “Энэ материал яагаад чухал вэ?” гэж асуу. Хэрэв та яагаад гэдгийг мэдэхгүй бол тэд ч бас мэдэхгүй. Тэдэнд ямар өөрчлөлт авчрах вэ? Амьдралдаа хэрэгжүүлж болох онцгой зүйл байна уу? Хэрэв та энэ бүхний алийг нь ч олж харахгүй байгаа бол тэд ч бас олж харахгүй.

Хэрэв хүүхдүүд тухайн сэдэв өөрсдөд нь хамаатайг мэдвэл сайн сонсоно. Ангиа хяналтдаа авахын тулд сахилга батаас илүүгээр сонирхолтой талыг нь хангах ёстой.

(4) Ач холбогдол

Зааж буй үнэн сургаалынхаа үр дүнг харуул. Хүмүүс үүнийг мэдэж, дагаж мөрдвөл юу болох вэ? Хүмүүс энэ үнэнийг үгүйсгэвэл яах вэ?

Тэдэнд гайхалтай сэдвүүдийг заагаарай. Жижиг асуудалд хэт их цаг зарцуулахаас зайлсхий. Таны хуваалцаж буй үнэн сургаалын дагуу амьдарч байсан бусад хүмүүсийн тухай түүхийг ярьж өг. Тэд таны хичээлийн тоймыг санахгүй ч ярьсан түүхийг чинь санах болно.

Тэдэнд баатруудыг танилцуул. Хүүхдүүд биширч дуурайх хүмүүсийг хайж байдаг. Итгэлийн баатруудын тухай болон агуу гайхамшгуудыг харсан хүмүүсийн тухай, мөн Бурханы хүчээр агуу үйлсийг хийсэн хүмүүсийн тухай ярь. Сайнмэдээ тарааж, дагалдагч бэлтгэх нь чуулганы хамгийн эрхэм зорилго бөгөөд дэлхий дээрх хамгийн том хүч сорьсон бас сэтгэл хангалуун ажил гэдгийг ойлгоход нь туслаарай.

(5) Үзүүлэх материал

Боломжтой бол түүх ярихдаа өнгөлөг зураг ашигла. Ухагдахуун ойлголтын талаар ярихдаа гол үг, үндсэн санааг самбар дээр бичээрэй. Хүүхдүүд харж, сонссон юмаа сайн санадаг.

(6) Үйлдэл

Хүмүүс хийж байж сурдаг. Хүүхдүүд ямар нэгэн зүйл хийх эсвэл түүхийг жүжигчлэн тоглох замаар сурдаг. Багш заасан Библийн түүхээ ашиглан жүжиг тоглуулж болно. Үүнд цаг хугацаа их шаарддаг тул бүтэн түүхийг хичээл бүр дээр тоглуулаад байж чадахгүй. Тиймээс хичээл бүр дээр үйлдлээр хийх ажлыг бодож олоорой.

► Чуулганы зарим гишүүд сүүлийн үеийн хичээл, заасан номлолоо танилцуулж, эдгээрийг хэрхэн илүү сайн хэрэгжүүлэх талаар тайлбарлаж болно. Зарим нь эдгээр зарчмыг хэрэгжүүлэхийн тулд юу хийснээ ярьж болох юм.

Хуудас бүр нь үггүй, харин өнгийн цаастай, цаас бүр нь сайнмэдээний хэсэг агуулгыг илэрхийлдэг ном бий.

Хуудас бүрийн дагалдах агуулгыг доор хураангуйлан оруулав. Та Үггүй номыг ашиглах үедээ илүү их тайлбарлан ярьж, хүүхдүүдэд асуулт асуух, харилцан ярилцах боломжийг олгоорой.[1]

Тэмдэглэл: Зарим хүн эхлээд алтан, тэгээд хар, дараа нь энд жагсаасны дагуу бусад өнгийн хуудсаар үргэлжлүүлдэг.

Хар: Хар өнгө бидний хийсэн нүгэл, муу муухайг сануулдаг. Хүн бүр нүгэл үйлдсэн гэж Библид бичигдсэн байна. Нүглээс болж бидэнд хэцүү асуудлууд тулгарсан (Энэ үед та тухайн хүүхдээс нүгэлт хүн гэдгээ хүлээн зөвшөөрч буй эсэхийг нь асуух хэрэгтэй).

Улаан: Бурханы Хүү Есүс бидний төлөө амиа өргөж, бидэнд уучлалыг авчирсан сайнмэдээ бий. Улаан өнгө Есүсийн цусыг төлөөлнө. Есүс үхсэн, гэхдээ үхлээс амилсан бөгөөд бидэнд тэнгэрийн улсыг бэлтгэж байна.

Цагаан: Бурхан биднийг уучилж, бидний зүрх сэтгэлийг цагаан болгодог. Тэрбээр бидний хийсэн нүглийг арчиж цэвэрлэсэн. Та залбирч, Бурханаас уучлал гуйж болно. Хэрэв та нүгэлдээ харамсаж байгаа бол Бурхан таныг уучлахад бэлэн байна.

Алтан: Алт бол бидний төлөө Бурханы бэлтгэж байгаа тэнгэрийн улсыг төлөөлнө. Бидний амьдрал дуусах үед бид Бурхантай хамт тэнгэрийн улсад амьдрах болно. Тэнд уйтгар гуниг, өвчин, муу муухай гэж үгүй.

Ногоон: Та уучлагдсан учраас одоо та Бурханы хүүхэд болсон. Та Бурхантай харилцах харилцаандаа өснө. Ногоон өнгө өсөлтийг төлөөлдөг. Та Бурханы тухай болон таныг Бурхан хэрхэн амьдраасай гэж хүсэж байгаа тухай илүү ихийг мэдэж болно. Библийг өдөр бүр уншиж, өдөр бүр залбирч, Бурханд ойрхон амьдрах талаар мэддэг хүмүүсийг сонсох хэрэгтэй.

(1) Та энэ хичээлийн “Амин харилцааны зарчим” гарчгийн доорх хэсгийг дахиж хараарай. Зөвхөн хичээл зааж байгаагаа биш, харин хүүхдүүдтэй харилцах харилцаагаа, тэдэнтэй тааралдах бүрдээ ямар байдгаа анзаараарай. Та юуг өөрчлөх хэрэгтэй байна? Таныг сайн мэддэг хүнтэй ярилцаарай. Түүнд материалуудаа үзүүлж, өөрийнхөө үнэлгээг тайлбарлаарай. Тэдний шударга саналыг асуу. Тэгээд энэ даалгаврыг хийхдээ үүнийгээ тайлагнаарай. Гэхдээ өөрийнхөө үнэлгээний талаар дэлгэрэнгүй оруулах эсэхээ өөрөө шийдээрэй.

(2) Хүүхдэд зориулсан хичээл юм уу, номлол бэлтгэ. Үүндээ зургаан төрлийн хэв шинжийг ашиглан нямбай бэлтгээрэй. Хэрхэн төлөвлөсөн талаараа тайлбараа мөн бэлдээрэй.

(3) Үггүй ном худалдаж авах, эсвэл хийх арга ол. Танилцуулан ярих аргыг сурч, хамгийн багадаа гурван хүнд тайлбарлаж өгөөрэй. Тэгээд туршлагынхаа талаар цогцолбор бичээрэй.