(1) Суралцагч нь дараах санаануудыг тайлбарлаж чаддаг болсон байна. Үүнд:

• Ерөнхий илчлэл ба Онцгой илчлэл.

• Библи бол Бурханы Үг гэдгийн баримт нотолгоо.

• Бичвэр дэх Бурханы амьсгал (онгод).

• Бичвэрийн онгод нь яагаад алдаа мадаггүй болох талаар.

• Онгод оруулагдсан, алдаа мадаггүй, үг бүрчлэн хэмээх нэр томъёо.

• Яагаад Библи бүрэн дуусгавар болсон, үүнийг нэмж өргөжүүлэх боломжгүй талаар.

• Библи хэрхэн онол сургаалын үндсэн эх сурвалж, эцсийн эрх мэдэл болох талаар.

• Библи нь Христэд итгэгч хүний өдөр тутмын амьдралд хэр чухал вэ?

• Библийн талаарх христэч итгэл үнэмшил

(2) Суралцагч нь буруу эрх мэдлийг сонсохоос эсвэл явцуу зорилгоор Библийг судлахаас зайлсхийж сурна.

Ангийн удирдагчийн тэмдэглэл: Хичээл нь ихэвчлэн өмнөх хичээлийн сорил болон өмнөх хичээлийн зорилгыг давтах байдлаар эхэлнэ. Энэ нь анхны хичээл учраас дараах Бичвэрийг уншина уу.

► Дуулал 119:1-16-г хамтдаа унших. Энэ багц эшлэлд Библийн талаар юу гэж хэлсэн бэ?

Дэлхий ертөнцийг бүтээгч Бурхан ийнхүү хэлж байна. Тэрээр Өөрийгөө болон бүтээлийнхээ зорилгыг илчилсэн. Бурханы бидэнд илчилсэн үнэнийг илчлэл гэж нэрлэдэг. Библид “Илчлэл” хэмээх ном байдаг ч Бурханы илчилсэн бүх үнэнийг илэрхийлэхдээ илчлэл гэдэг үгийг мөн ашигладаг.

► Бурхан ямар арга замуудаар бидэнд үнэнийг илчилсэн бэ?

Бурхан үнэнийг өөр өөр аргаар илчилсэн учраас бид Ерөнхий илчлэл ба Онцгой илчлэл гэсэн хоёр ангиллын талаар ярьдаг.

Ерөнхий илчлэл

Бурхан бүтээлээрээ дамжуулан Өөрийнхөө тухай бидэнд харуулсныг Ерөнхий илчлэл гэдэг. Орчлон ертөнцийн зүй тогтлоос бид Бурханы гайхалтай оюун ухаан, хүчийг олж хардаг.

Бурханы хамгийн дээд бүтээл бол хүн төрөлхтөн юм. Хүмүүс хэрхэн бүтээгдсэнийг харахдаа бид Бурханы талаар зарим зүйлийг мэдэж авдаг. Бид сэтгэн бодож, гоо сайхныг үнэлж, зөв бурууг ялгаж чаддаг нь (төгс биш ч гэсэн) Бүтээгч маань эдгээр чадваруудыг илүү өндөр түвшинд эзэмшсэн байх ёстойг харуулдаг. Бидэнд ийм чадварууд байгаа учраас Бурхан сэтгэж, харилцах чадвартай нэгэн байх ёстой гэдгийг бид мэддэг.

Бурхан ярих боломжтой гэдгийг Ерөнхий илчлэл харуулдаг тул Онцгой илчлэл ч байх боломжтойг бид ойлгож чадна. Бурхан ярьж чаддаг учраас Түүнээс ирсэн үг мэдээ, цаашлаад Бурханы ном хүртэл байх боломжтой юм.

Ерөнхий илчлэлээр дамжуулан хүмүүс Бурхан байгааг, Түүнд дуулгавартай байх ёстойг, мөн тэд аль хэдийн дуулгаваргүй болсон гэдгээ ч мэддэг (Ром 1:20-21, унших). Гэвч Ерөнхий илчлэл бидэнд Бурхантай хэрхэн зөв харилцаатай болохыг зааж хэлээгүй. Ерөнхий илчлэл нь хүмүүс Бүтээгчийнхээ өмнө аймшиггүйгээр нүгэл үйлдсэн учраас Онцгой илчлэл хэрэгтэй болсныг харуулдаг ч, үүний шийдлийг бидэнд хэлдэггүй.

Онцгой илчлэл

Бурхан бидэнд онгод оруулагдсан бичвэрүүд болон Түүний хүү Есүсээр дамжуулан Онцгой илчлэл өгсөн. Онцгой илчлэл нь бидний унасан болон гэм буруутай болохыг харуулдаг Ерөнхий илчлэлийн нөхцөл байдлыг тайлбарладаг. Онцгой илчлэл нь Бурханыг тодорхойлж, уналт болон нүглийг тайлбарлан, Бурхантай эвлэрэх арга замыг харуулдаг.

Та Библи байдаг гэдгийг мэдэхгүй амьдарч байна гээд төсөөлөөд үз дээ. Бурхан байдаг гэж та ойлгодог. Бурханы өмнө асуудалтай байгаагаа ч мэддэг. Амьдралын зорилгоо, үхлийн дараа юу тохиолдохыг та мэдэхгүй. Та Бурханд хэрхэн хандахаа мэдэхгүй байна гэж бодъё.

Гэтэл хэн нэгэн танд нэгэн номыг үзүүлж, энэ бүх асуултад хариулахын тулд Бурханаас ирсэн ном гэж хэлж байна гээд төсөөлж үзье. Тэгвэл энэ ном таны хувьд ямар үнэ цэнтэй байх бол?

► Библи өөрийнхөө талаар юу гэж хэлсэн бэ? Библи нь Бурханаас ирсэн гэж тэмдэглэсэн зарим жишээг хэлнэ үү.

Библи өөрийнхөө талаар юу хэлснийг ярилцъя. Дараа нь бид Библи үнэн гэдгийг нотлох баримтуудыг авч үзэх болно. Библи бол Бурханы Үг гэж хэлэгдсэн. Хуучин гэрээнд Бурханаас үг мэдээ ирсэн талаар 3000 гаруй удаа тэмдэглэсэн бөгөөд үүнийг ихэвчлэн “ЭЗЭН… хэлсэн ”[1] хэмээн энгийнээр илэрхийлжээ. Есүс Хуучин гэрээг Бурханы амьсгалаар бичигдсэн хэмээн үзсэн байдаг (Матай 5:17-18; Иохан 10:35; Марк 12:36, унших). Шинэ гэрээг бичигчид Хуучин гэрээг Бурханаас ирсэн гэж итгэдэг ( Үйлс 3:18; 2 Тимот 3:16; 2 Петр 1:20-21, унших). Түүнчлэн Шинэ гэрээний бичигчид Шинэ гэрээний бичвэрүүдийг Бурханы амьсгалаар бичигдсэн гэж тэмдэглэжээ (1 Коринт 14:37; 2 Петр 3:16, унших).

Хэрэв хүн Библи өөрийгөө нотлон хэлж байгааг хүлээн зөвшөөрөхгүй бол бусад нотлох баримтыг харах хэрэгтэй. Та Библийн талаар мэдэхгүй байсан гэж дахин төсөөлж үзье. Бурхан бодгаль болохын хувьд ярьж чадна гэдгийг та мэднэ. Тэгэхээр Бурханаас ирсэн ном байх боломжтойг ч та мэдэж болно. Тэгээд хэн нэгэн танд нэгэн номыг үзүүлээд энэ Бурханаас ирсэн ном гэж хэлж байна.

► Библи нь үнэхээр Бурханы Үг гэдгийг та яаж мэдэх вэ? Энэ нь ямар байгаасай гэж та бодох бол?

Дэлхийн хаана ч байсан, сайнмэдээ номлогдох үед хүмүүс Библийн үнэнийг дотоод итгэл үнэмшлээрээ мэдэрдэг. Тэд сайнмэдээнд итгэж, гэмших үедээ Бурханы өршөөл болон өөрчлөгдсөн амьдралыг амсаж мэддэг. Ихэнх хүмүүсийн хувьд энэ нь Библид итгэх тэдний анхны шалтгаан байдаг (1 Тесалоник 1:5, унших).

Улмаар Бурхантай харилцаатай болсон хүмүүсийн хувьд Бурханы Сүнс бичвэрээр дамжуулан ярьж, ойлголт, итгэл үнэмшлийг өгдөг. Ариун Сүнс Библийг ашиглаж байгаа арга зам нь энэ бол Бурханы Үг гэдгийг баталж байгаа юм (Ефес 6:17, унших).

Бид Бурхантай харилцах харилцаан дотор алхахдаа Библи Түүний мөн чанарыг болон Тэр бидэнтэй ажилладаг арга замыг зөвөөр илчилдэг болохыг олж хардаг. Библи бидэнд Бурхантай харилцах харилцааг эхлүүлэх болон Түүнтэй үргэлжлүүлэн харилцах арга замыг зааж өгдөг. Энэ нь Библи бол Бурханы Үг гэдгийн нотолгоо юм (Дуулал 119:1-2, унших).

Гэхдээ та өөрийн сүнслэг туршлага дээр үндэслээгүй нотлох баримтыг хүсэж байвал яах вэ? Бусад шашны хүмүүст мөн сүнслэг туршлага байгаа хэдий ч тэдний энэхүү туршлага нь үнэнд тулгуурладаггүй. Тэгвэл бидний туршлага үнэн дээр үндэслэсэн гэдгийг бид яаж мэдэх вэ?

► Библид бичсэн зүйлс нь үнэн зөв гэдгийг батлах нотолгоо бий юу?

Библийг 1500 жилийн хугацаанд 40 гаруй бичигчид бичсэн бөгөөд тэдгээр хүмүүсийн ихэнх нь бие биеэ танихгүй хүмүүс байв. Ийм номоос бид ихэвчлэн юу хүлээх вэ? Энэ нь бүх төрлийн алдаа, зөрчилтэй ном байх нь гарцаагүй гэж таамаглах болов уу. Гэвч Библийн талаарх дараах баримтууд өөр зүйлийг өгүүлдэг. Библид дурдагдсан мянга мянган газарзүйн байрлал, газруудыг нээж олсон; Библид тэмдэглэгдсэн олон мянган түүхэн үйл явдал, хувь хүмүүс бодит түүхэн байсан нь батлагдсан; Библийн мэдэгдлийг үгүйсгэсэн ямар ч нээлт хэзээ ч болж байсангүй; Түүнчлэн Библи өөртэйгөө хэзээ ч зөрчилддөггүй. Ийм бичвэрийг агуулсан ном урьд өмнө хэзээ ч байгаагүй юм. Тэгэхээр баримт нотолгоо нь Библи Бурханы амьсгалаар бичигдсэн гэдгийг баталж байна.

Библи нь Бурханы Үг гэдгийг батлах нотолгоог бид дараах зургаан санаагаар дүгнэх боломжтой. Библи бол үнэхээр Бурханы Үг гэдгийг бид мэддэг. Учир нь:

• Библийн мянга мянган баримтууд батлагдсан.

• Библийн ямар ч мэдэгдэл үгүйсгэгдэж байгаагүй.

• Библи өөртэйгөө зөрчилддөггүй.

• Сайнмэдээ нь түүний нөлөөгөөр нотлогддог.

• Бурханы Сүнс Библиэр дамжуулан ярьдаг.

• Бурхантай харилцах бидний харилцааг Библи чиглүүлдэг.

► Библи Бурханы амьсгалаар бичигдсэн гэдэг нь юу гэсэн утгатай вэ?

Бурханы амьсгал гэдгээр Бурхан Өөрийгөө илчилснийг, тэрхүү илчлэлийг бичгийн хэлбэрт оруулсан ер бусын ажлыг хэлж байна. Библи нь онгод оруулагдсан эцсийн бүтээгдэхүүн юм. Библи нь бусад номтой адил онгодоор бичигдээгүй. Библи дэх Бурханы амьсгал нь Библийн үг бүр нь, бүхэлдээ Бурханы Үг гэсэн утгатай.

Заримдаа хүмүүс, тэдэнд гайхалтай санаа төрөх үед онгодоор хөглөгдсөн мэт мэдэрдэг. Гэхдээ Библи нь Бурханы амьсгалаар бичигдсэн гэдэг нь үүнээс илүү утга учиртай.

Бичвэр бүр Бурханы амьсгалснаар бөгөөд заахуй, зэмлэхүй, залруулахуй, зөвд чиглүүлэхүйд тустай (2 Тимот 3:16).

Хэдийгээр бичвэр нь хүний гар дахь бэхээр урсаж байсан ч Библи нь Бурханаас ирсэн болохыг энэ эшлэлд онцолжээ. Библи нь Бурханаас ирсэн учраас онол сургаалын хувьд найдвартай. Энэ нь хүний хийж чадах хамгийн сайн зүйлээс ч илүү дээр юм.

Бичвэрийн нэг ч эш үзүүллэг эш үзүүлэгчийн өөрийнх нь тайлбараар ирээгүйг юуны түрүүнд мэдэгтүн. Учир нь нэг ч эш үзүүллэг хэзээ ч хүний хүслээр гарсангүй, харин Ариун Сүнсээр хөдөлгөгдсөн хүмүүс Бурханаас айлджээ (2 Петр 1:20-21).

2 Петр захидлын эдгээр эшлэлд бичигчдийг Ариун Сүнс дагуулсан талаар хэлж байна. Библийг бичигчдийн алдаагүй зөв байдал нь тэдний мэдлэгээс хамаардаггүй. Тэднийг Ариун Сүнс хөдөлгөж, дагуулсан нь бичвэрийн найдвартай байдал эцсийн дүндээ Бурханаас хамааарч байсныг харуулдаг. Библи нь Бурхан адил найдвартай.

► Бурханы үгийг бичихээсээ өмнө Библийг бичигчид ямар арга замаар Түүний үнэнийг хүлээн авсан бэ?

Заримдаа хүмүүс энэхүү онгод хэрхэн ажиллаж буйд гайхдаг. Бурхан Өөрийн үнэнийг хэрхэн таниулж, тэдгээр нь үнэн зөв тэмдэглэгдсэн эсэхийг баталгаажуулсан бэ? Бурханы илчлэлийн хэв маягийн талаар бидний анхаарах ёстой хамгийн эхний баримт бол энэ нь олон янз байдаг юм. Тэр тодорхой арга барилаар хязгаарлагддагүй (Еврей 1:1, унших).

Заримдаа Бурхан Мосетэй ярьж байсны адил сонсогдохуйц дуу хоолойгоор ярьдаг байсан (Гэтлэл 33:11). Бусад үед Тэрээр зүүд эсвэл үзэгдэл өгсөн бөгөөд бичигчид тэдгээрийг дүрсэлсэн байдаг.[1] Бурханаас шууд ирсэн Бичвэрийн хэсэг нь Бурханы мутраар бичигдсэн Израилтай хийсэн гэрээ байх боломжтой (Дэд хууль 9:10). Гэтлэл, Леви, Тооллого номын гол хэсгүүдэд “Тэгээд ЭЗЭН, Мосетэй ярин…” гэснээс үзвэл Бичвэрийн зарим хэсгүүдийг хэлж бичүүлжээ.

Бичвэрийн онгод нь Бурхан тэдгээр үгсийг бичигчид сонсогдохуйц байдлаар хэлсэн гэсэн үг биш юм. Бид янз бүрийн бичигчдийн бодгаль чанар, бичлэгийн хэв маягийн ялгааг олж хардаг. Жишээлбэл, Паулын бичлэгийн хэв маяг Петрийнхээс эрс ялгагддаг. Бид Бичвэрийн онгод гэдэг ойлголтод Бурхан хүмүүн бичээчдийн бодгаль чанар, үгсийн сан, бичлэгийн хэв маяг, боловсрол, түүхийн судалгаа зэргийг хэрхэн ашигладаг болохыг хамааруулж үздэг.

Бичвэрийн онгодын талаарх зөв үзэл баримтлал нь Бурхан хүмүүн бичээчийн төсөөлөл, бодгаль чанарыг ашиглан тэнгэрлэг үнэнийг илэрхийлэхдээ зөвхөн үнэнийг илчлээд зогсохгүй энэхүү бүх үйл явц алдаагүй зөв явагдахад хүмүүн бичээчийг хөтөлж, түүнийг бүхэлд нь онгодоор хөглөсөн явдал юм.

Зарим хүмүүс Бурхан зүгээр л хэлэхийг хүссэн санаагаа өгч, хүмүүн бичээч тэдгээрийг чадахаараа тайлбарласан бөгөөд энэ явцад хүн нарийн ширийн зүйлс дээр алдаа гаргах нь гарцаагүй гэж үздэг. Энэ үзэл нь Бурханы амьсгалын талаар Библид бичигдсэнтэй тохирдоггүй. Бичигч нарыг Библид Ариун Сүнсээр хөтлөгдсөн гэж тэмдэглэсэн тул тэд алдаа гаргаагүй, өөрсдийн дураар бичээгүй гэдгийг бид мэддэг.

Библи нь Бурханы Үг учраас энэ нь буруу зүйлийг хэлдэггүй. Учир нь Бурхан алдаа гаргадаггүй (Сургаалт үгс 30:5, унших). Бурхан Библид тэмдэглэгдсэн түүхэнд Өөрийгөө илчилсэн тул үүний нарийн ширийн зүйлс хүртэл алдаагүй, үнэн зөв байх ёстой. Ингэснээр Бурханы илчлэлд бид найдаж чадна. Иймд, Бичвэрийн онгодын талаарх Библийн тодорхойлолтоос Бурхан үүнийг бичих үйл явцыг бүхэлд нь үнэн зөв байхаар удирдан чиглүүлсэн болохыг бид мэддэг.

Онгод оруулагдсан (Бурханы амьсгал)

Библи нь Бурханы амьсгалаар бичигдсэн, бүхэлдээ Бурханы Үг бөгөөд үүнийг бичихэд ашиглагдсан үгс нь хүртэл тийм юм. Энэхүү хэллэг нь Библийг бүрэн найдвартай, үнэн зөв гэдгийг батлахад анх хангалттай байсан бол одоо Бичвэрийн онгодод итгэдэг гэж хэлдэг хүмүүсийн дунд үүнийг бүхэлдээ үнэн зөв биш хэмээн үгүйсгэж байна. Дараах үг хэллэгүүд нь Бичвэрийн онгодын чухал талуудыг хамгаалахад ашиглагддаг.

Алдаа мадаггүй

Энэ хэллэг нь “бүтэлгүйтэх боломжгүй” гэсэн утгатай. Библи алдаа мадаггүй гэж хэлэхдээ бид үүнд итгэж болно, хэзээ ч биднийг төөрөгдүүлэхгүй гэсэн утгыг агуулдаг. Библи нь зөвхөн онол сургаалын үгсээрээ төдийгүй үүнд хэлэгдсэн үг бүрээрээ алдаа мадаггүй юм.

Үг бүрчлэн

Энэ хэллэг нь “алдаагүй” гэсэн утгатай. Библид хэлэгдсэн үг бүр нь үнэн зөв байдаг. Бурхан хэзээ ч худал хэлдэггүй, алдаа гаргадаггүй тул (Тит 1:2, унших), мөн Библи нь Бурханы Үг учраас энэ нь алдаагүй гэдэгт бид итгэлтэй байж болно. Хэрэв хэн нэгэн Библийг бичихэд хүмүүс оролцсон учраас алдаатай байж магадгүй гэж хэлбэл тэр хүн 2 Петр 1:21-д бичигчид нь “Ариун Сүнсээр хөдөлгөгдсөн” гэдгийг мартсан байна. Бичвэрийн онгодын талаарх Библийн дагуух, түүхэн үзэл баримтлал нь Библи бүхэлдээ онгод оруулагдсан, тэр ч байтугай үг бүр нь хүртэл тийм гэж үздэг. Тиймээс алдаа мадаггүй байгаа юм (Матай 5:18, унших).

Хуулбарлах явцад гарсан алдааг юу гэх вэ?

Хэвлэх машин бий болохоос өмнө Бичвэрийг оролцуулаад бүх баримт бичгийг гараар хуулдаг байжээ. Мосе, Исаиа, Паул нарын бичсэн эх гар бичмэлүүд бидний гар дээр байхгүй. Грек, еврей хэл дээр буй олон мянган эртний гар бичмэл дунд бага зэргийн ялгаа байдаг бөгөөд анхны үг хэллэг нь ямар байсныг яг таг мэдэх боломжгүй юм. Гэсэн хэдий ч энэхүү ялгаа нь маш өчүүхэн тул тэдгээрийн улмаас аль нэг онол сургаал эргэлзээтэй байдалд орохгүй. Учир нь эх гар бичмэл зөв найдвартай байсан, түүнчлэн хуулбаруудын ялгаа маш бага байгаа зэргээс Библид бичигдсэн бүх зүйлсэд итгэж болно гэдгийг бид мэддэг.

► Библийг гараар олон удаа хуулсан ч энэ нь үнэн зөв байсан гэдгийг яаж мэдэх вэ?

► Библи алдаатай гэж боддог зарим хүмүүсийн гаргаж тавьдаг шалтгаанууд юу вэ?

Заримдаа хүмүүс Библи алдаатай гэж хэлдэг. Учир нь тэд Библийн мөн чанарыг ойлгодоггүй.

Хүмүүсийн нийтлэг харилцааг Библид ашигласан. Тухайлбал, тэнгэрт нар хөөрч эргэлдэж буй талаар өгүүлсэн байдаг. Ихэнх эрдэмтэд нар эргэлдэж байгаа бус, харин дэлхий эргэж байна гэж үзэх нь ойлгомжтой ч тэд мөн нар мандлаа, жаргалаа хэмээн ярьдаг. Өөрөөр хэлбэл тэд зүгээр л харж байгаа шигээ дүрсэлж байна гэсэн үг.

Библид мөн шүлэг яруу найргийн хэллэг бий “Толгод хонины хурга мэт цовхчсон” (Дуулал 114:4), “Талын бүх мод алга ташицгаана” (Исаиа 55:12). Энэ бол утга зохиолын хэв маяг бөгөөд мэдээж шууд утгаар нь ойлгох боломжгүй.

Заримдаа бичигчид бусад хүмүүс, тэр дундаа онгод оруулагдаагүй хүмүүсээс эш татсан нь бий (Жишээ нь, Иовын найзуудын талаар Бурхан тэд зөвийг ярьсангүй гэж хэлсэн ч тэдний хэлсэн үгсийг Бичвэрт тэмдэглэсэн байдаг (Иов 42:7).

Эдгээрийн аль нь ч онгодын талаарх онол сургаалын хувьд асуудал биш юм. Эцсийн бүтээгдэхүүн нь Бурханы Үг байсан гэдгийг бататгахын тулд үүнийг бичих үйл явцыг Бурхан удирдан чиглүүлсэн.

Заримдаа хүмүүс Библид зөрчилддөг зүйлс бий гэж боддог. Харин үүнийг илүү нухацтай авч үзэх хэрэгтэй. Жишээлбэл, Марк 5:1-2 болон Лук 8:26-27-д чөтгөрт эзэмдүүлсэн хүнийг Есүс чөлөөлсөн тухай өгүүлдэг. Матай 8:28-д чөтгөрт эзэмдүүлсэн хоёр хүнийг чөлөөлсөн талаар хэлсэн байдаг. Энэ нь зөрчилдөх зүйл биш юм. Лук, Марк хоёр тэнд ганцхан хүн байсан гэж хэлээгүй. Харин тухайн газар оронд танигдсан, үүх түүхтэй нэг хүнийг онцолж бичсэн байдаг. Хэрэв хэн нэгэн Библи дэх өөр хоорондоо зөрчилдсөн хэсгүүдийг олж харвал яаран дүгнэлт хийлгүй, харин нөхцөл байдал, хам сэдвийг ойлгоход цаг зарцуулах хэрэгтэй юм.

► Христэд итгэгчид Библийг ашиглах ямар арга замууд байдаг вэ?

Библи нь Бурханы хуулийг танилцуулдаг. Хуулийг сахиснаар бид аврагдахгүй ч Бурхан биднийг хэрхэн амьдраасай гэж хүсдэгийг хууль харуулдаг. Бурханы хууль нь Бурханы мөн чанарыг харуулдаг. Бид Бурхантай адил байхыг хүсдэг учраас үүнийг дагах ёстой. Бид Бурханыг хайрладаг учраас Түүний хуулийг хайрлах ёстой юм. Дуулал 119-д Бурханыг дээдлэн хүндэлдэг хүн хэрхэн Бурханы хуульд баярлах ёстой талаар дүрсэлсэн байдаг. Бурханыг хайрладаг хүн зүрх сэтгэлээ Бурханы хүсэлд нийцүүлэхийн тулд өөрчлөлтийн төлөө Бурханд залбирах болно. Бурханыг хайрладаг хүн Бурханыг баярлуулахгүй амьдрах боломжгүй.

Бурханы Үг бол гэрэл юм. Элч Петр, дэлхий ертөнц сүнслэг харанхуйд байгаа бөгөөд Бурханы Үг бидний явах ёстой замыг удирдан чиглүүлэх гэрэл мөн хэмээн хэлсэн ( 2 Петр 1:19-21, унших; мөн Дуулал 119:105-ыг үз). Хүн Бурханы Үгтэй зөрчилдөж буй санаа, мэдрэмжийг хэзээ ч дагах ёсгүй. Ариун Сүнс Библид буруу гэж хэлсэн зүйлийг хийлгэхээр хүнийг хэзээ ч хөтөлж дагуулахгүй.

Бурханы Үг бол бидний сүнслэг хоол юм. Хооллох дуршил сайтай байх нь эрүүл байгаагийн шинж бөгөөд Христэд итгэгч хүн нялх хүүхэд сүүг хүсдэг шиг Бурханы Үгийг хүсэх болно (1 Петр 2:2). Христэд итгэгч хүн төлөвших тусам хүүхэд бор хоол идэж сурдаг шиг Бурханы үнэнийг илүү ойлгож, шингээх чадвартай болдог (1 Коринт 3:2). Христэд итгэгч хүн өдөр бүр өөрийгөө Бурханы Үгээр сүнслэг байдлаар тэжээх ёстой.

Библи нь Сатаны эсрэг бидний хамгаалалт болдог. Өөрсдийгөө сүнслэг хуяг дуулгаар зэвсэглэхийг бидэнд тушаасан. Ариун Сүнсний бидэнд өгдөг сэлэм бол Бурханы Үг юм (Ефес 6:17). Есүс чөтгөрийн уруу татлагыг Бичвэрээр хариулсан байдаг (Матай 4:3-4).

Бурханы Үг нь биднээс хариу үйлдлийг шаарддаг үнэн юм. Есүс үүнийг таригдсан үртэй зүйрлэж хэлсэн (Лук 8:11-15). Хөрс нь бэлтгэгдээгүйгээс зарим үр нь сайн ургаагүй. Бид Библийг уншихдаа үүний үнэнд хариу үйлдэж, Бурханаас Үгээрээ бидний амьдралд үр жимс авчрахын төлөө залбирах ёстой.

Библи нь Бурханы Үг учраас...

• Энэ нь хэзээ ч хуучирч, ач холбогдолгүй болохгүй. Энэ нь бүх газар орон, бүх цаг үеийн, бүх хүмүүст хамаатай.

• Бурхан хэзээ ч бодлоо өөрчлөхгүй, Өөртэйгөө зөрчилдөхгүй тул энэ нь Түүний хүслийг ялган таних хөтөч юм.

• Биднийг Бүтээгч Бурхан үүнийг бидэнд заавар болгон өгсөн тул энэ нь амьдралаас хамгийн сайн сайхныг олж авах хөтөч болдог.

• Энэ нь аврагдаж, Бурхантай харилцаатай алхахын тулд бидний мэдэх ёстой бүх зүйлийг агуулдаг.

Хэдийгээр бид чуулганы уламжлал болон пастораасаа суралцдаг ч Бичвэртэй зөрчилдөх ямар нэгэн санаа, сургаал заагдвал эцсийн эрх мэдэл нь Бичвэр учраас бид үүнийг хүлээн зөвшөөрөх боломжгүй юм.

Ариун Сүнс Бурханы Үгийг бидэнд ойлгуулахын тулд гэрэлтүүлж, үүнийг дуулгавартай дагахад чиглүүлдэг.

► Бурхан ярьсаар байгаа нь бид Библи дээр юуг ч нэмж болно гэсэн үг үү?

Сүүлчийн элч нас барсан цагаас Библийг дуусгавар болсон ном хэмээн чуулган үздэг. Чуулган Бичвэр гэж нэрлэхийн тулд л гар бичмэлүүдийг сонгосон юм биш, харин үүний оронд Бурхан онгод оруулсан, маш тодорхой эрх мэдэл үүнд байгаа гэдгийг хүлээн зөвшөөрсөн юм. Бичвэр хэмээн хүлээн зөвшөөрөгдсөн номууд нь хожмын өөр ямар ч зохиол бүтээлтэй тохируулах боломжгүй тийм шаардлагыг хангасан байдаг.

Израилчуудын хадгалж хамгаалж ирсэн Хуучин гэрээний бичвэрүүдийг чуулган хадгалсаар иржээ. Эцэст нь Шинэ гэрээний номуудыг дараах шалгуураар Бичвэр хэмээн хүлээн зөвшөөрсөн байдаг:

• Элч нартай түүхэн харилцаа хамааралтай эсэх

• Өөрийгөө нотлох чанар

• Чуулган санал нэгтэй хүлээн зөвшөөрсөн байдал

• Хуучин гэрээнд хүндэтгэлтэй хандсан (ашигласан)

• Тэрс үзэл, сургаалыг эсэргүүцэх ашиг тустай байдал

Бурхан ярьсан хэвээр байгаа ч хэн нэгэн өнөө цагт Библи дээр ямар нэг зүйлийг нэмж болох уу? Эх бичвэрт шинэ тэмдэглэл оруулах шаардлагыг хангахгүй тул энэ нь боломжгүй юм. Жишээлбэл, элч нар бидэнтэй хамт байхгүй тул ямар ч шинэ бичвэр тэдэнтэй хамааралтай байж чадахгүй нь ойлгомжтой. Түүнчлэн ямар ч шинэ бичвэрийг дэлхий даяар нэгэн зэрэг хүлээн зөвшөөрөх боломжгүй.

Бичвэр нь авралд болон христитгэлийн амьдралд хангалттай бөгөөд бүрэн дүүрэн юм (2 Тимот 3:14-17). Бичвэр нь бидэнд хэрэгтэй бүх зүйлийг нэгэнт агуулсан учраас чухал, шаардлагатай ямар ч зүйлийг үүнд нэмж оруулах боломжгүй. Шинэ илчлэл хүлээн авч байна гэж ярьдаг хүмүүс Бурханы аль хэдийн өгсөн илчлэлийг судлахад цаг заваа зориулах хэрэгтэй юм. Тэд тэндээс хэрэгтэй бүхнээ олж, алдаанаас хамгаалагдах болно.

Ангийн удирдагчийн тэмдэглэл: Ангийн хоёр гишүүн энэ болон дараагийн хэсгийг тайлбарлана уу.

Библийн эрх мэдлийг сулруулах

Таны хувьд эцсийн эрх мэдэл нь юу байдаг вэ? Олон Христэд итгэгчид Библи тэдний эрх мэдэл гэж хэлдэг ч үнэндээ тэд өөрсдийн мэдрэмждээ хамгийн их итгэдэг. Хүн аливаа үйлдлийг хийхдээ буруутай мэдрэмжийг тээхгүй л бол тухайн үйлдэл зүгээр гэж хэлдэг. Ийм хүний хувьд эцсийн эрх мэдэл нь Библи биш, харин түүний мэдрэмж байдаг.

Хүмүүс Библийг нухацтай авч үзэхгүй байх олон шалтгаан бий. Тэдний хүндэлж явдаг хэн нэгэн хүн Библийн илэрхий сургаалыг үл тоомсорлоход энэ нь тэднийг ч мөн адил үйлдэхэд өөгшүүлж байдаг. Магадгүй тэд Библид хориглодог зүйлийг хийсэн буруутай учраас өөрсдийнхөө үйлдлийг зөвтгөх арга замыг хайж байж болох юм. Магадгүй тэд зүгээр л Библийн сургаалыг мэддэггүй ч байж болно. Бид Библийг ойлгож, түүний эрх мэдэлд захирагдахын тулд бүх хүчин чармайлтыг гаргах ёстой юм.

Явцуу зорилгоор Библийг судлах

Библи бол онол сургаалын үндсэн эх сурвалж юм. Энэ нь аливаа онол сургаалтай холбоотой асуултын эцсийн эрх мэдэл байдаг. Гэсэн хэдий ч хүмүүс зөвхөн өөрсдийн онол сургаалдаа нотолгоо олохын тулд Библийг судлавал энэ нь асуудалтай. Тэд Библийг сүнслэг хоол хүнс болгон ашигладаггүй. Тэд зүгээр л өөр хэн нэгнийг буруутай гэдгийг харуулахыг зорьдог. Бид онол сургаалаа Бичвэрээр боловсруулж, хамгаалах нь мэдээж зөв зүйтэй. Гэхдээ, хэрэв энэ нь Библийг ашиглах цорын ганц зүйл болж хувирвал Бурхантай харилцах хувьчилсан харилцаандаа үүнийг хэрэглэдэг тэрхүү баяр хөөрөө алдах болно.

Зарим хүмүүс Библийг зөвхөн урам зориг авахын тулд уншдаг. Харин Библийн зорилгод заах, зэмлэх, залруулах зэрэг багтдаг гэдгийг бид санах хэрэгтэй (2 Тимот 3:16). Бид Библийн тушаалуудыг алгасаж, бидэнд илүү сайхан мэдрэмж өгдөг амлалтуудыг эрэлхийлэх ёсгүй юм. Магадгүй Бурхан өнөөдөр биднийг зэмлэх юм уу залруулахыг, эсвэл бидэнд ямар нэгэн зүйлийг зааж өгөхийг хүсэж байх боломжтой.

Зарим шашны бүлгүүд Библид итгэдэг гэж хэлдэг ч өөр зүйлийг өөрсдийн эцсийн эрх мэдэл болгодог. Тэд зөвхөн өөрт байгаа илчлэл эсвэл тусгай тогтолцоог ашиглан Библийг тайлбарлаж чадна гэж итгэдэг. Тэд хамгийн чухал онол сургаалыг Библиэс нотлох боломжгүй гэж үздэг.

Тэд Библиэс гадна бичвэр болгон ашигладаг өөр нэмэлт номтой байж ч магадгүй. Библийг орчуулах болон хуулбарлах явцад алдаа гарсан учраас найдвартай биш гэж тэд хэлж болох юм.

Эдгээр санаа нь Библи бол Бурханы Үг байхаар бүрэн гүйцэд биш гэсэн утгатай. Тэдгээр хүмүүсийн хувьд өөр зүйлс эцсийн эрх мэдэл нь болдог.

► Итгэлээ шалгах хэсгийг хамгийн багадаа хоёр удаа хамтдаа уншаарай.

Библи бол Бурханы Үг юм. Библийг бичигчдийг алдаа гаргахгүйн тулд Бурхан тэднийг хөдөлгөсөн. Гэм нүглээс аврагдаж, Бурхантай харилцахын тулд бидний мэдэх ёстой бүх зүйлийг Библид багтаасан байдаг. Библи нь бидний онол сургаалын үндсэн эх сурвалж бөгөөд эцсийн эрх мэдэл юм. Христэд итгэгч хүн Бурханыг илүү танин мэдэж, Бурханаар удирдуулан, сүнслэгээр тэжээгдэж, утга учиртай, баяр хөөр дүүрэн амьдрахын тулд Библийг өдөр бүр судлах ёстой.

(1) Эшлэл унших: Суралцагч тус бүр дараах эшлэлүүдээс нэгийг сонгоно. Дараагийн хичээл эхлэхээс өмнө эшлэлийг уншиж, энэхүү хичээлийн сэдвийн талаар тус эшлэлд юу гэж хэлснийг багцлан бичнэ.

• Дуулал 119:33-40

• Дуулал 119:129-136

• Сургаалт үгс 30:5-6

• Матай 5:17-19

• 2 Тимот 3:15-17

• 2 Петр 3:15-16

• Илчлэл 22:18-19

(2) Сорил: Дараагийн хичээлийг 1-р хичээлийн сорилоор эхэлнэ. Сорилд бэлтгэж, асуултыг сайн судлаарай.

(3) Бусдад заах: Энэхүү курсын туршид та хамгийн багадаа гурван удаа ангиас гадуур хүмүүст нэг хичээлийг эсвэл хичээлийн хэсгээс заана. Хичээлийг чуулганы анги, Библи судлах гэрийн бүлэг, гэр бүлийн уулзалт эсвэр өөр орчинд заах боломжтой. Та эдгээр боломжийг бий болгож, ангийн удирдагчид тайлагнах үүрэгтэй.

(4) Дараагийн хичээлд бэлэн байхын тулд хичээлээ урьдчилж уншихаа битгий мартаарай.

(1) Ерөнхий илчлэл гэж юу вэ?

(2) Бурханы Онцгой илчлэл нь ямар хоёр хэлбэрээр өгөгдсөн бэ?

(3) Ерөнхий илчлэлийн хийж чадахгүй ямар гурван зүйлийг Онцгой илчлэл хийдэг вэ?

(4) Библи өөрийнхөө талаар юу гэж хэлсэн бэ?

(5) Библи бол Бурханы Үг гэдгийг бид мэдэх зургаан шалтгааныг жагсаана уу.

(6) Библи нь яагаад заах, зэмлэх, залруулах, зөвд чиглүүлэхэд тустай вэ? (2 Тимот 3:16).

(7) Бичигчдийг алдаа гаргахаас хамгаалсан гэдгийг батлах онгодын талаар Библид юу гэж тодорхойлсон бэ?

(8) Бурхан онгод оруулахдаа ашигласан дөрвөн аргыг жагсаана уу?

(9) Библи дэх Бурханы амьсгал гэж юуг хэлэх вэ?

(10) Библи алдаа мадаггүй гэдэг нь юу гэсэн утгатай вэ?

(11) Библи зөв найдвартай гэдэг нь юу гэсэн утгатай вэ?