(1) Суралцагч нь дараах санаануудыг тайлбарлаж чаддаг болсон байна. Үүнд:

• Тэнгэрэлч нарын мөн чанарын талаарх нарийн ширийн зүйлс.

• Итгэгч хүний амьдрал дахь тэнгэрэлч нарын оролцоо.

• Сатан болон бусад бузар муу сүнснүүдийн уналт.

• Сүнсний ертөнц дэх сүнслэг зөрчилдөөн.

• Бузар муугийн хүчийг ялах Бурхан ба итгэгчдийн эцсийн ялалт.

• Сүнснүүдийн талаарх христэч итгэл үнэмшил.

(2) Суралцагч нь сүнсний ертөнцийг буруу байдлаар сонирхохоос зайлсхийх болно.

► Матай 4:1-11-ийг хамтдаа унших. Энэхүү багц эшлэлд бузар муу сүнснүүдийн талаар юу гэж хэлсэн бэ?

Хүмүүс тэнгэрэлч нарын талаар ярихдаа “Тэд яг ямархуу харагддаг бол” гэсэн асуултыг хамгийн түрүүнд асуудаг. Олон уран бүтээлчид тэднийг бүтээл туурвилдаа дүрслэхийг оролдсон байдаг.

► Тэнгэрэлч нар яг ямархуу харагддаг бол?

Тэнгэрэлч нар далавчтай юу? Исаиагийн харсан серафууд зургаан далавчтай байжээ (Исаиа 6:2). Гэрээний авдар дээр байрлуул гэж Бурхан Мосед хэлсэн херубуудын дүрс далавчтай байсан (Гэтлэл 25:20). Езекиелийн харсан херубууд дөрвөн далавчтай байв (Езекиел 1:6, Езекиел 10:15).

Тэнгэрэлч далавчтай эсэхийг бид нарийн сайн мэдэхгүй. Тэднийг аялан явахад далавч хэрэг болохгүй болов уу. Учир нь тэд сүнснүүд бөгөөд далавчтай нисэхээс хавьгүй илүү хурдаар явах боломжтой. Тэд сүнснүүд тул бие махбодгүй. Тэнгэрэлч нарын хувьд далавч тийм ч шаардлагатай биш юм.

Бидний ихэвчлэн хардаг урлагийн бүтээлүүдээс ялгаатай нь Библид тэнгэрэлч нарыг хүүхэд эсвэл эмэгтэйчүүдээр хэзээ ч дүрсэлдэггүй. Тэд эрэгтэй хүн шиг үзэгдсэн байдаг ч хүнд байдаг шиг хүйс тэдэнд байхгүй. Тэдэнд гэр бүлийн харилцаа, хамаатан садан гэх зүйл байдаггүй (Матай 22:30, унших). Тэнгэрэлч бүр тусдаа бүтээгдсэн.

Тэнгэрэлч нар ихэвчлэн хүмүүст үл үзэгдэх боловч тодорхой шалтгаан зорилгын улмаас гарч ирдэг. Заримдаа тэднийг үзэгдэхэд хүмүүс жирийн хүн гэж боддог байжээ (Эхлэл 19:1-2). Мөн зарим тохиолдолд тэнгэрэлч нар хүмүүсийг айж, газар унахуйц хүчтэй туяа цацруулан үзэгдсэн (Матай 28:2-4). Тэнгэрэлч хэн нэгэнд үзэгдэхдээ тухайн хүнтэй ихэвчлэн “бүү ай” гэж мэндчилдэг байв (Лук 1:13, 30; Лук 2:10, унших).

Тэнгэрэлч нар сүнснүүд (Еврей 1:14)[1] боловч үүнээс нь болж бид тэднийг бодит бус гэж үзэх ёсгүй юм. Библид сүнс нь бие махбодоос илүү хүчтэй гэдгийг хэлсэн байдаг (Исаиа 31:1, 3, унших).

Тэнгэрэлч нарыг тэнгэрлэг биес (Иов 1:6) гэж нэрлэдэг ба Бурханы мөн чанарын зарим зүйлс тэдэнд байдаг ч харин хүмүүстэй адилгүй юм. Одоогоор тэнгэрэлч нар оюун ухаан, хүч чадлын хувьд хүмүүсээс хавьгүй илүү байгаа ч хүмүүс нэгэн цагт тэднээс дээгүүр байх болно (1 Коринт 6:3, унших).

Тэнгэрэлч нарыг бүтээсэн талаар Эхлэл номд дурдаагүй. Тэд газар дэлхийгээс өмнө бүтээгдсэн бөгөөд Бурхан үүнийг бүтээж байгааг хараад тэд баярлан бахдаж байсан (Иов 38:4-7).

Тэнгэрэлч нар хэзээ ч үхдэггүй (Лук 20:36). Тэд газар дэлхийгээс өмнө бүтээгдсэн гэдэг нь бүх тэнгэрэлч нар олон мянган жилийн турш амьдарч, хүн төрөлхтний түүхийг бүхэлд нь ажигласаар ирсэн гэсэн үг юм.

Тэнгэрэлч нар бодгаль чанартай. Тэд ярьж, ярилцах чадвартай (Лук 1:18-20). Тэд Бурханыг мөргөн хүндэтгэдэг бөгөөд энэ нь тэд Бурханы мөн чанарын талаар ямар нэг зүйлийг ойлгодог, үүнд нь бишрэлтэйгээр хариу үйлдэл үзүүлж чадна гэсэн үг юм (Еврей 1:6). Нүгэлтнийг гэмшихэд тэд баярладаг бөгөөд энэ нь тэд сэтгэл хөдлөлтэй болохыг харуулдаг (Лук 15:10, унших). Авралын төлөвлөгөөг ойлгохыг ихэд сонирхож байгаагаас харвал тэд оюуны чадавхитай (1 Петр 1:12, унших). Есүсийг мэндлэх талаарх мэдээг зарлахдаа тэд баярлан тэмдэглэж байсан (Лук 2:13-14).

Тэнгэрэлч нар өөр хоорондоо адилгүй. Зарим нь херуб (Дуулал 80:1), зарим нь серафууд (Исаиа 6:2) гэж нэрлэгддэг. Тэд зэрэг дэвтэй. Библид тэнгэрэлч нарын талаар болон хамгийн багадаа нэг тэргүүн тэнгэрэлчийн тухай дурдсан бол “Диавол болоод түүний тэнгэрэлч нарт” (Матай 25:41) гэж мөн өгүүлсэн байдаг. Дотор ч хаан ширээ, ноёрхол, ноёд гэх зэрэг эрх мэдлийн бүтэц бий (Ефес 6:12; Колоссай 1:16, унших).

Еврей болон христитгэлийн уламжлалд аль алинд нь тэнгэрэлч нарын талаар маш их зүйлийг бичсэн байдаг бөгөөд эдгээр нь Бичвэрээс бидний уншиж мэддэгээс ч хавьгүй их юм.

Тэнгэрэлч нарын ялгааны талаар Бичвэрт тийм ч ихийг илчлээгүй. Тэргүүн тэнгэрэлч гэсэн хэллэг Библид хоёр удаа гардаг. Михаелыг тэргүүн тэнгэрэлч гэж дуудсан байдаг бөгөөд тэрээр Есүсийг эргэж ирэх үед тэргүүн тэнгэрэлчийн дуу хоолой байх болно (1 Тесалоник 4:16; Иуда 9). Тэргүүн тэнгэрэлч нь шууд утгаараа “ахлах тэнгэрэлч” гэсэн утгатай. Хэдэн тэргүүн тэнгэрэлч байдгийг бид мэдэхгүй.

Библийн Исаиа 6-р бүлэгт зөвхөн серафуудын талаар дурдсан байдаг. Тэд зургаан далавчтай байсан. Далавчийг нь эс тооцвол, тэд яг л хүн шиг харагдаж байсан болов уу. Учир нь тэдэнд гар, хөл, нүүр царай байв.

Адам Ева хоёрыг цэцэрлэгээс хөөгдсөний дараа херубууд болон галт илдийг Еден цэцэрлэгт байрлуулжээ (Эхлэл 3:24). Ийнхүү цэцэрлэгт ойртох боломжгүй болгожээ. Езекиел өөрийн харсан херубуудыг дүрсэлсэн байдал нь бидний мэддэг бусад амьтдаас тэс өөр байв. Тэд тус бүрдээ дөрвөн нүүр, дөрвөн далавчтай, хэд хэдэн гартай, гал мэт туяатай, аянгын гялбаа, аянга цахих адил хурдан байжээ (Езекиел 1:5-14, Езекиел 10:15).

Хоёр херубын дүрсийг Гэрээний авдрын төгсгөлд байрлуулсан бөгөөд тэдний хооронд Өршөөлийн суудал байв.[2] Бурханыг херубуудын дээр залрагч[3] хэмээн дахин давтан дуудсан байдаг. Энэ нь Сүмд мөргөн хүндэтгэдэг Израилын Бурхан гэдгийг тодорхойлж байгаа бөгөөд Түүний зааж өгсөн арга замаас өөр бусад тохиолдолд Түүнд ойртох боломжгүй гэдгийг харуулдаг.

Бурханы сүр жавхлан ба хүч чадал нь Түүнд үйлчлэгчдээс харагддаг. Херубыг харахдаа хүн Бурханыг харлаа гэж бодох, түүнд мөргөхийг завдаж болох ч энэ нь зөвхөн Бурханы үйлчлэгч юм.

Бурханыг үй түмэн тэнгэрэлч хүрээлэн байдаг нь Тэр ямар агуу сүр жавхлантай болохыг харуулдаг. Бурханы сэнтийн эргэн тойрон буй олон тэнгэрэлч нарыг Элч Иохан харахдаа “Тэдний тоо түм түмээрээ, мянга мянгаараа ажээ” (Илчлэл 5:11) гэж илэрхийлсэн байдаг.

Тэнгэрэлч хязгааргүй хүч чадалтай биш. Учир нь Даниелд зориулсан мэдээг дамжуулахдаа тэнгэрэлч зөрчилдөөний улмаас саатсан талаар бид уншдаг (Даниел 10:12-13, унших). Гэсэн хэдий ч тэдэнд даалгасан үүрэг даалгаврын цар хэмжээнээс шалтгаалж, 185,000 цэргийг устгаж байсны адил Бурхан хангалттай хүчийг тэдэнд өгдөг (2 Хаад 19:35).

Тэнгэрэлч нарт үүрэг даалгаврууд оногдсон бололтой. Библид тэднийг авралыг хүлээн авах хүмүүст үйлчлэхээр илгээгдсэн (Еврей 1:14, унших) гэж хэлдэг. Тэнгэрэлч нар Бурханд үйлчилдэг хүмүүсийг хүрээлж, хамгаалдаг (Дуулал 34:7). Олон тэнгэрэлч байнга бидэнтэй хамт байдаг гэж тааварлах боломжтой. Түүнчлэн хүүхдүүдийг харгалздаг тэнгэрэлч байдаг талаар Есүс хэлжээ (Матай 18:10, унших). Тэргүүн тэнгэрэлч Михаелыг Израил үндэстнийг хамгаалдаг ханхүү гэж нэрлэсэн байдаг (Даниел 12:1).

Тэнгэрэлчид хандан залбирах талаар Библид хэзээ ч хэлж байгаагүй. Бид тэдэнтэй харилцаатай байх оролдлого хийх талаар ч Библид юуг ч өгүүлдэггүй. Тэд Бурхан бидний хооронд зуучлагч биш. Тэнгэрэлч нарт мөргөж, өөрсдийнхөө сайн ойлгохгүй сүнсний ертөнцийн юмсад оролцдог хүмүүст сэрэмжлүүлэг өгөгдсөн байдаг (Колоссай 2:18, унших). Хэрэв бид Бурханы хүсээгүй арга замаар тэнгэрэлч нартай холбогдохыг оролдвол Бурханы тэнгэрэлч нар биш, харин бузар муу сүнснүүд бидэнд хариулах болно.

► Бузар муу сүнснүүд хаанаас гаралтай вэ?

Бузар муу сүнснүүд нь Бурханы эсрэг тэрсэлсэн тэнгэрэлч нар юм. Энэ нь хүн төрөлхтөн бүтээгдэхээс өмнө тохиолдсон бөгөөд Библид энэ талаар тийм ч ихийг өгүүлдэггүй. Сатан бослогын удирдагч байсан бөгөөд тэнгэрэлч нарын гуравны нэг нь түүнийг дагажээ (Илчлэл 12:4). Анхны байр сууриа орхисон тэнгэрэлч нарын талаар Иуда өгүүлсэн байдаг (Иуда 6). Тэд аль хэдийн Бурханы шүүлтээр яллагдсан юм (Иохан 16:11; 2 Петр 2:4, унших).

Сатаны уналтын талаар эш үзүүллэгийн номууд дахь хоёр хэсэгт дурдсан байдаг (Исаиа 14:12-17 болон Езекиел 28:12-19). Хэсэг бүр нь хүн төрөлхтөн, газар дэлхийн хааны тухай өгүүлдэг ч хаадын уналтыг Сатаны уналттай харьцуулсан бололтой.

Сатан бардам болж, Бурханаас хараат бус байхыг хүссэн байж магадгүй юм. Хүн бардам болж, чөтгөртэй адил ялд унах боломжтой талаар Элч Паул сэрэмжлүүлсэн байдаг (1 Тимот 3:6, унших). Энэ нь Адам Ева хоёрыг “Бурхан шиг болж” хэмээн уруу татсан Сатаны сорилттой адил юм. Энэ нь Бурханы эрх мэдлийг үгүйсгэж, өөрийгөө бурхан болгох сорилт юм.

► Сатаны талаар бидний мэдэх зарим зүйл юу вэ?

Сатан Бурханы эсрэг тэрслэлийг одоо ч удирдсаар байна. Түүнийг агаарын хүчний ноёрхогч (Ефес 2:2) гэж дууддаг. Мөн Сатаныг ертөнцийн захирагч гэж нэрлэдэг. Учир нь энэ дэлхийн хүмүүс ихэвчлэн Бурханыг эсэгүүцдэг (Иохан 12:31). Тэрээр дэлхийн хаанчлалуудыг эзэмшдэг гэдгээ, түүнчлэн хүссэн хүндээ тэдгээрийг түр хугацаагаар олгодог гэдгээ илэрхийлдэг (Лук 4:4-6). Нүгэлтнүүд сайнмэдээг хүлээн зөвшөөрөхгүйн тулд тэр тэдний оюун бодлыг сохолдог (2 Коринт 4:4, унших). Гэмшдэггүй нүгэлтнүүд нь түүний хоригдлууд юм (2 Тимот 2:26). Тэр Бурханы Үгийг хүмүүсийн оюун бодлоос зайлуулдаг бөгөөд ингэснээр энэ нь үр нөлөөгүй болдог (Марк 4:15, унших). Тэрээр чуулган болон Ариун Сүнсний өмнө худал ярих төлөвлөгөөг Ананиа, Сапфир хоёрын зүрхэнд суулгаж (Үйлс 5:3), Есүсээс урвах гэсэн хүсэлдээ хөтлөгдсөн Иудаст шүглэжээ (Лук 22:3). Тэр шашны буруу онол сургаалыг сэдэж, тэдгээрийг хүмүүс заахыг хөхүүлэн дэмждэг (1 Тимот 4:1, унших).

Сатан Бурханыг үзэн яддаг учраас хүмүүсийг ч үзэн яддаг. Учир нь хүмүүс Бурханы дүр төрхөөр бүтээгдсэн бөгөөд хамгийн агуу тааллыг Түүнээс хүлээн авдаг. Сатан аль болох олон хүнийг Бурханы эсрэг тэрслэхэд нь нөлөөлж, өөрт оногдсон ял шийтгэлийнхээ дор авчрахыг зорьдог.

Дэлхий дээр хамгийн их мэхлэгдсэн хүмүүс бол Сатанд ухамсартайгаар үйлчилдэг хүмүүс юм. Учир нь тэдний тэрслэл хэзээ ч амжилт олохгүй бөгөөд тэднийг үзэн яддаг, зөвхөн алж сүйрүүлэх сонирхолтой эзэнд тэд үйлчилдэг (1 Петр 5:8). Тэр биелүүлж чадахгүй гэдгээ мэдэж байгаа тийм амлалтуудыг өгдөг (Иохан 8:44).

Зарим хүмүүс нүгэлтэй амьдралаар амьдрахыг сонгохдоо Сатаныг мэдэлгүйгээр дагадаг (Ефес 2:2-3). Тийм ч учраас тэр уруу татахад болон хуурч мэхлэхэд их эрч хүч, цаг хугацааг зарцуулдаг (2 Коринт 4:4, 2 Коринт 11:3, 14). Тэр хүмүүсийг Бурханд итгэх итгэлээсээ няцаж, Бурханыг мөргөн хүндлэхийн оронд бүтээгдсэн зүйлсийг шүтээн болгохыг хүсдэг (Ром 1:25). Түүний сорилтууд нь хууран мэхлэх явдал юм. Учир нь түүнд Бурханы бүтээсэн зүйлийг гажуудуулахаас өөр бүтээж чадах зүйл үгүй. Чөтгөр ямар ч баяр хөөр, таашаалыг бүтээдэггүй. Харин Бурхан энэ бүгдийг бүтээсэн юм. Чөтгөр зөвхөн Бурханы хүслээс гадуурх хүчирхийлэл хэлбэрийн таашаалуудыг л өгч чадна. Үнэндээ Сатан юуг ч бүтээж чадахгүй. Тэр зөвхөн Бурханы бүтээсэн сайн сайхныг гажуудуулж чадна.

Зарим бузар муу сүнснүүд тодорхой газарзүйн бүс нутаг эсвэл хүмүүсийн бүлэгт анхаарлаа хандуулдаг байж магадгүй юм. Михаел тэнгэрэлчийг Израилыг хамгаалагч ханхүү гэж нэрлэдэг байсан шиг Перс, Грекийн ноёд гэж нэрлэгддэг бузар муу сүнснүүд ч байсан (Даниел 10:13, 20). Зарим сүнснүүд улс үндэстний бурхад болсон.

Сатан мөргөл хүндэтгэлийг хүсдэг (Матай 4:9, унших). Бузар муу сүнснүүд хуурамч шашнаар дамжуулан ажилладаг. Хүмүүс шүтээн шүтэх үедээ чөтгөрүүдийг мөргөн хүндэлж байдаг гэж Библид хэлсэн (Дэд хууль 32:17; 1 Коринт 10:20-21, унших). Чөтгөрүүд юуг шүтэж байгаагаа мэддэггүй тийм хүмүүсийн мөргөлд хариу үйлдэл үзүүлдэг. Бурханыг мөргөн хүндэлдэг хүн Бурхантай илүү адил болж, ариун байдлыг таашаадаг шиг, бузар муу сүнснүүдэд мөргөгч нь улам бүр бузар муу болж, бузар мууг таашаадаг. Хүмүүс өөрсдийн үр хүүхдүүдээ чөтгөрүүдэд тахил болгон өргөж байснаас илүү ёрын муу мөргөл гэж байхгүй биз ээ (Дуулал 106:37-38, унших).

Сатан ба бусад чөтгөрүүд хүмүүсийн оюун бодол, зан үйлийг бүрэн хянахыг оролдож байдаг. Үүнийг “чөтгөрт эзэмдүүлэх” гэж хэлдэг. Зарим хүмүүс ухамсартайгаар ийм төрлийн эзэмдүүлэлтэд буулт хийдэг байж болох юм. Харин бусад нь юу хийж байгаагаа мэдэхгүйгээр зөвшөөрдөг байж болно. Зарим хүмүүс өөрийн зорилгодоо хүрэх эрх мэдлийг олж авлаа гэж бодон, алхам алхмаар ийм байдалд ордог. Чөтгөрт эзэмдүүлсэн хүн бузар муу сүнснүүдийн боол болж, өөрийгөө сүйрүүлэхэд хөтлөгдөн, оюун бодол, сэтгэл зүйн аймшигт тарчлалыг амсдаг (Марк 5:2-5, унших). Зөвхөн Есүс л хүнийг ийм боолчлолоос чөлөөлж чадна.

Сайнмэдээ өргөнөөр тунхаглагдсан улс орнуудад бузар муу сүнснүүдийн үйл ажиллагаа ихэвчлэн өнгөлөн далдлагдсан байдалтай байдаг. Хамгийн хачирхалтай нь эдгээр “соёл иргэншил хөгжсөн” орнуудын хүмүүс нь хамгийн шашингүй, аливаа ер бусын зүйлийг доог тохуу болгосон, сүнс байдаг гэдгийг үгүйсгэдэг. Ийм орчинд бузар муу сүнснүүд ил тод байдлаар ажилладаггүй. Учир нь тэд сайнмэдээг сонссон хүмүүсийг айлгачихвал тэдгээр хүмүүсийн олонх нь Бурханд эргэж, Түүнээс аврал, хамгаалалтыг хүсэх болно.

Сайнмэдээ бага тархсан газар орнуудад бузар муу сүнснүүд илүү нээлттэй ажилладаг. Тийм газрын хүмүүс Христэд хандаж, чөлөөлөгдөж чадна гэдгээ мэддэггүй тул чөтгөрүүдийн хүч тэднийг айлган сүрдүүлж, хүлцэнгүй байдалд оруулдаг. Хүмүүс сүнснүүдэд дуртай, хүсэлтэйдээ биш, харин айдастайгаар үйлчилдэг. Сайнмэдээ нь чөлөөлөлт, эрх чөлөөний гайхалтай мэдээ болон ирдэг.

Чөтгөрийн байнгын дайралтын улмаас бид сүнслэг тулаанд байгаа юм. Бидний тулаан бол бие махбодын дайснуудын эсрэг биш, харин сүнсний ертөнцөд болж байдгийг санаарай хэмээн анхааруулсан байдаг (Ефес 6:12, унших). Бид өөрсдийгөө хамгаалахын тулд сүнслэг хуяг дуулгаа өмсөх ёстой гэж хэлсэн (Ефес 6:13). Бид энэ тулаанд ялна гэдэгтээ итгэлтэй байж болно. Учир нь бидний дотор байгаа Бурханы хүчийг чөтгөр эсэргүүцэж чадахгүй бөгөөд бид чөтгөрийг эсэргүүцэх үед тэр биднээс зугтан оддог (Иаков 4:7).

► Чөтгөр Бурханы эсрэг тал мөн үү?

Чөтгөр одоогийн мөнх бус байдалд буй хүнтэй харьцуулбал хамаагүй илүү хүчтэй. Гэхдээ түүний хүчийг Бурханыхтай харьцуулах ямар ч боломжгүй. Түүнийг хүч чадлын хувьд Бурхантай адил тэнцүү хэмжээнд эсрэгцүүлж үзэж болохгүй юм. Зарим философичид дэлхий дээрх сайн муугийн хүч тэнцүү гэж үздэг. Энэ нь үнэнээс хэт хол байна. Сатан хаа сайгүй оршдоггүй, бүх зүйлийг мэддэггүй, алдаа гаргадаг. Харин Бурхан бол сүнснүүдийг Бүтээгч бөгөөд тэд Түүнийг ялж чадахгүй. Хүнийг шалгах сорилтын хугацаа дуусгавар болоход бүх бузар муу сүнснүүд нүгэлт хүмүүсийн хамт шүүгдэж, хоригдон, шийтгэгдэх болно.

Сатаны ялагдлыг эртнээс амласан байдаг. Бурхан могойн толгойг бяцлахын тулд Аврагчийг илгээнэ гэж амласан (Эхлэл 3:15). Есүс чөтгөрийн ажлыг устгаж, нүглийн дээгүүрх ялалтыг бидэнд өгөхөөр ирсэн (1 Иохан 3:8, унших). Есүс үхэл ба амиллаараа Сатанд үхлээс дээгүүрх эрх мэдэлтэй байхыг зөвшөөрөөгүй юм (Еврей 2:14; Илчлэл 1:18). Сатан болон бусад бузар муу сүнснүүдийн эцсийн бөгөөд мөнхийн хувь тавилан бол галт нуур билээ (Матай 25:41, унших).

Сатаны хийж чадах зүйлийг Бурхан аль хэдийн хязгаарласан (Иов 1:12, Иов 2:6). Энэ нь Сатан бидэнд юу ч хийж магадгүй гэсэн айдастай амьдрах шаардлагагүй гэсэн үг юм. Бурхан зөвшөөрөхгүй л бол юу ч тохиолдохгүй бөгөөд Тэр бидний хаа хүртэл явж чадахыг мэддэг (1 Коринт 10:13).

Бид Сатаны дайралтаас хамгаалагдсан төдийгүй Бурханы хаанчлалыг Сатаны хаанчлалын эсрэг тэлэх хүч бидэнд бий. Есүс зөвхөн элч нарт бус дагалдагч нартаа бузар муу сүнснүүдийг зайлуулах хүчийг өгсөн юм (Лук 10:17, унших). Бид сайнмэдээг номлох үед Бурхан Өөрийн үнэнд хүч өгч, сайнмэдээнд хариу үйлдэх хүмүүсийг Сатанаас чөлөөлдөг.

Ангийн удирдагчийн тэмдэглэл: Ангийн нэг гишүүн энэ хэсгийг тайлбарлана уу.

Зарим хүмүүс сүнсний ертөнцийг ихэд сонирхдог. Тэд тэнгэрэлч нарыг судалж эхлэх, тэдэнтэй харилцахыг оролдож болох юм. Харин Библид тэнгэрэлч нарт хандан залбирах эсвэл тэдэнтэй харилцахыг хичээх талаар ямар ч зүйлийг хэлдэггүй. Тэднийг мөргөн хүндэтгэх эсвэл ойлгох чадвараас илүүг мэдэхийг оролдох хэрэггүй гэж Библи анхааруулдаг (Колоссай 2:18).

Хэрэв хүн бузар муу сүнснүүдийг хэт их сонирхдог бол энэ нь илүү аюултай. Зарим хүмүүс тэдний хүч чадал, хийж буй зүйлд нь татагддаг. Сүнстэй харьцдаг тоглоомууд ч бий. Сүнснүүдээс мэдээлэл авах аргатай хүмүүс ч байдаг. Бид Бурханы хүчээр тэднийг эсэргүүцэхээс бусад тохиолдолд бузар муу сүнснүүдтэй хэзээ ч холбогдох ёсгүй юм (Иаков 4:7, 1 Петр 5:8-9).

Зарим хүмүүс сүнсний ертөнцийн талаар болон энэ нь хэрхэн ажилладаг тухай нарийн ширийн, цогц тайлбарыг боловсруулсан байдаг. Гэсэн хэдий ч сүнсний ертөнцийн талаар бидний мэдэх ёстой бүх зүйлийг Бурхан Библид илчилсэн билээ.

► Итгэлээ шалгах хэсгийг хамгийн багадаа хоёр удаа хамтдаа уншаарай.

Бурхан бүх сүнснүүдийг бүтээсэн. Ариун тэнгэрэлч нар Бурханыг мөргөн хүндэлж, итгэгчдийг хамгаалдаг. Тэнгэрэлч нь үхэшгүй мөнх, сэтгэн бодож, ярилцаж, мөргөн хүндэтгэх чадвартай бодгаль юм. Тэд ёс суртахууны сонголт гаргадаг. Сатан болон бусад тэнгэрэлч нар нүгэл үйлдэж, Бурхан болон хүн төрөлхтөнд дайсагнах болжээ. Бурхан Сатаны хүчийг хязгаарлаж, мөнхийн шийтгэл өгөхөөр ялласан юм.

(1) Эшлэл унших: Суралцагч тус бүр дараах эшлэлүүдээс нэгийг сонгоно. Дараагийн хичээл эхлэхээс өмнө эшлэлийг уншиж, энэхүү хичээлийн сэдвийн талаар тус эшлэлд юу гэж хэлснийг багцлан бичнэ.

• Матай 12:43-45

• Лук 8:27-35

• Үйлс 12:7-11

• 2 Коринт 11:13-15

• 1 Петр 5:8-9

(2) Сорил: Дараагийн хичээлийг 6-р хичээлийн сорилоор эхэлнэ. Сорилд бэлтгэж, асуултыг сайн судлаарай.

(3) Бусдад заах: Ангиас гадуур заах хуваарь гаргаж, тайлагнахаа мартуузай.

(1) Тэнгэрэлч нар ихэвчлэн бие махбодгүй байдгийг бид хэрхэн мэдэх вэ?

(2) Тэнгэрэлч нарыг хэзээ бүтээсэн бэ?

(3) Тэнгэрэлч нар үхдэг үү?

(4) Тэнгэрэлч нар бодгаль шинжтэй гэдгийг мэдэх дөрвөн арга замыг нэрлэнэ үү.

(5) Библид тэнгэрэлч нарыг нэрлэсэн дөрвөн нэрийг нэрлэнэ үү.

(6) Бурханд үйлчилдэг хүмүүсийн төлөө тэнгэрэлч нар юу хийдэг вэ?

(7) Бузар муу сүнснүүд хаанаас гаралтай вэ?

(8) Шүтээн шүтэгч нь яг үнэндээ юуг мөргөн хүндэлдэг вэ?

(9) Сатан болон бусад бузар муу сүнснүүдийн эцсийн хувь тавилан юу вэ?

(10) Итгэгч хүн Сатаны дайралтаас өөрийгөө хамгаалахын тулд юу хийх хэрэгтэй вэ?