(1) სტუდენტი შეძლებს განმარტოს:

• რატომ არის ადამიანის წარმოდგენა ღმერთზე ასე მნიშვნელოვანი?

• როგორ განასხვავებს ის ფაქტი, რომ ღმერთი არის შემოქმედი, ამას სხვა ყველაფრისგან.

• ღმერთის თვისებები, რას ნიშნავს, რომ ის არის პირადი, სული, მარადიული, სამება, ყოვლისშემძლე, ყველგან მყოფელი, უცვლელი, ყოვლისმცოდნე, წმიდა, მართალი და მოსიყვარულე.

• რამდენად მნიშვნელოვანია ღვთის თითოეული თვისება მასთან ურთიერთობისთვის.

• ბიბლიური შეხედულება ღვთის უმაღლესი ძალაუფლების შესახებ.

• მრწამსის აღიარება ღმერთის შესახებ.

(2) სტუდენტი თავიდან აიცილებს თაყვანისცემის ფორმების არასწორად გაგების შეცდომას.

► ერთად წაიკითხეთ ესაიას მე-40 თავი. იმსჯელეთ რას გვეუბნება ეს მუხლები ღმერთზე.

► რატომ არის ასე მნიშვნელოვანი, აქვს თუ არა ადამიანს სწორი წარმოდგენა ღმერთზე?

ვინ არის ღმერთი? ა. ტოზერმა ამ კითხვის მნიშვნელობა აჩვენა, როდესაც მან თქვა: „მე მჯერა, რომ თითქმის არ არსებობს შეცდომა მოძღვრებაში, ან ქრისტიანული ეთიკის გამოყენების წარუმატებლობა, რაც საბოლოოდ არ მიგვიყვანდა ღმერთზე არასრულყოფილ და უმართლო აზრებამდე.”[1] იესომ სამარიტელ ქალს ჭასთან უთხრა, რომ სამარიტელების თაყვანისცემის პრობლემა ის არის, რომ მათ არ იციან ვის სცემენ თაყვანს. ნებისმიერი ადამიანის ყველაზე მნიშვნელოვანი მახასიათებელია მისი წარმოდგენა ღმერთზე. ადამიანის ღმერთზე წარმოდგენა მისი რელიგიის საფუძველია. უფრო სერიოზული შეცდომა არ შეიძლება იყოს, ვიდრე შეცდომა იმაში, თუ ვინ არის ღმერთი.

შედარებები არასაკმარისია ღმერთის სრულად აღსაწერად, რადგან ის ჩვენთვის უსასრულოდ ამაღლებული და მიუწვდომელია. ბიბლიაც კი არ გვაწვდის მის სრულყოფილ აღწერას, მაგრამ ყველგან განგვიმარტავს მის არსსა და ძალას. დაბადების წიგნი მოგვითხრობს, თუ როგორ შექმნა ღმერთმა ცა და დედამიწა; მზე, მთვარე და ვარსკვლავები; მცენარეები და ცხოველთა სამყარო; და ბოლოს ადამიანი. წმინდა წერილის პირველი გაკვეთილი ძალიან ნათელია: ღმერთი არის ყოველივე ქმნილების შემოქმედი. ამრიგად, ის განსხვავდება ყველაფრისგან, რაც არსებობს, რადგან ის არ არის მისი ქმნილების ნაწილი.

მთელ ბიბლიაში მრავალი სხვა დამოწმებაა ღმერთის შესახებ. თეოლოგებმა საგულდაგულოდ შეაჯამეს ბიბლიური მონაცემები ღვთის თვისებების შესახებ ჩამონათვალის სახით. ჩვენ ვერასდროს შევძლებთ მათ ბოლომდე აღქმას ჩვენი არასრულყოფილი გონებით; თუმცა ღმერთის თვისებების მოწიწებით შესწავლა ეს ღირებული სულიერი ვარჯიშია. ამრიგად, ჩვენ განვიხილავთ შემდეგ მოწმობებს ღმერთის შესახებ. ისინი ემყარება მის გამოცხადებას საკუთარ თავზე ბიბლიაში და ამის გამო ვიცით, რომ ისინი სიმართლეს შეესაბამება.

ჩვენ არ განვიხილავთ ღმერთის თვისებების სრულ ჩამონათვალს, არამედ მათ, რომელთა ცოდნაც ყველაზე მნიშვნელოვანია.

► ღმერთის რომელი თვისებების ჩამოთვლა შეგიძლიათ?

ღმერთი პიროვნებაა.

ეს ნიშნავს, რომ ის არის რეალური, ცოცხალი პიროვნება ინტელექტით, გრძნობებით და ნებით. ის არ არის ბუნების კანონების ერთობლიობა, ან უპიროვნო ძალა, როგორიცაა ელექტროენერგია ან გრავიტაცია. ის ქმნის, მოქმედებს, იცის, ნებავს, გეგმავს და ლაპარაკობს.

► რა განსხვავება იქნებოდა ჩვენთვის, ღმერთი რომ არ ყოფილიყო პიროვნება?

ის ფაქტი, რომ ის პიროვნებაა, საშუალებას გვაძლევს მასთან ურთიერთობა გვქონდეს. ის რომ პიროვნება არ ყოფილიყო, მის მიმართ ვერ ვილოცებდით. ის რომ პიროვნება არ ყოფილიყო, ვერ იქნებოდა კმაყოფილი, ან უკმაყოფილო.

ღმერთი სულია.

"ღმერთი არის სული და მისი თაყვანისმცემლებიც სულითა და ჭეშმარიტებით უნდა სცემდნენ თაყვანს"(იოანე 4:24)

ის ფაქტი, რომ ღმერთი სულია, საფუძველს გვაძლევს მასთან სულიერი ურთიერთობისა და მის თაყვანისცემისთვის. ლოცვა და თაყვანისცემა არ არის დამოკიდებული მატერიალურ საგნებზე, კონკრეტულ ფიზიკურ მდგომარეობაზე, დაგეგმილ პროგრამაზე ან შენობაზე. ეს ყველაფერი შეიძლება დაგვეხმაროს ყურადღების კონცენტრირებაში ღვთისმსახურებასა და თაყვანისმცემლობაზე, მაგრამ თაყვანისცემა მათზე არ არის დამოკიდებული.

ის ფაქტი, რომ ღმერთი სულია, ასევე არის იმის მიზეზი, რომ მან აგვიკრძალა მასზე რაიმე ფიზიკური გამოსახულების გაკეთება. (წაიკითხეთ გამოსვლის 20:4-6). როგორც სული, ღმერთი ჩვენთვის უხილავია (1 ტიმოთეს 1:17). გარდა იმ შემთხვევისა, როდესაც ის ხილული ფორმის მიღებას აირჩევს. (წაიკითხეთ დაბადების 18:1, ესაიას 6:1). იმის გამო, რომ ღმერთზე ჩვენი აღქმა შეზღუდულია, მაშინაც კი, როდესაც ის ხილული ფორმით გამოჩნდება, მართებულია იმის თქმა, რომ ღმერთი სრულყოფილად არავის უნახავს (იოანეს 6:46, იოანეს 1:18, გამოსვლის 33:20).

ღმერთი მარადიულია.

არასოდეს ყოფილა დრო, როდესაც ის არ არსებობდა და არც არასდროს იქნება დრო, როდესაც ის აღარ იარსებებს; ღმერთს არც დასაწყისი აქვს და არც დასასრული. ღმერთმა თავი გამოგვიცხადა თავის სახელში, „მე ვარ, რომელიც ვარ”; (გამოსვლის 3:14). ის იოანეს მიერ აღწერილია, როგორც ყოვლისმპყრობელი, რომელიც იყო, არის და მოვა (გამოცხადების 1:8). მარადიულობიდან მარადიულობამდე ის არის ღმერთი (ფსალმუნის 89:2). ზოგიერთ რელიგიას აქვს მითები იმის შესახებ, თუ როდის დაიბადნენ მათი ღმერთები, მაგრამ ჭეშმარიტი ღმერთი მარადიულია.

ღმერთი სამპიროვანია.

სამების შესახებ სწავლება ბიბლიის მიხედვით ემყარება იმ ფაქტს, რომ არსებობს ერთი ღმერთი, მაგრამ ამავე დროს ის სამ განსხვავებულ პიროვნენად მოიხსენიება. არის მხოლოდ ერთი ღმერთი, მაგრამ მის ბუნებაში სამი პიროვნებაა. მართალია, ბოლომდე ვერ ვწვდებით სამების ფენომენს, მაგრამ ეს არ არის ალოგიკური, რადგან არ ვამბობთ, რომ ეს სამი პიროვნება ერთი და იგივეა. არსებობს ერთი ღმერთი, რომელიც წარმოდგენილია სამ პიროვნებად. იმის გამო, რომ მამა, ძე და სულიწმიდა ერთად ფლობენ ღვთაების ყველა თვისებას, თითოეულ მათგანს შეიძლება სწორად ეწოდოს ღმერთი და თაყვანს ვცემდეთ და ვემსახურებოდეთ როგორც ღმერთს.

ღმერთი ყოვლადძლიერია.

მას შეუძლია მოიმოქმედოს ყველაფერი, რასაც მოისურვებს. "ხოლო ჩვენი ღმერთი ზეცაშია; ყოველივე, რაც სურდა, მოიმოქმედა” (ფსალმუნის 113:11). მას არ აქვს საზღვრები, გარდა იმისა, რომ ის არასდროს მოქმედებს მისი წმიდა ბუნების საწინააღმდეგოდ და ყოველთვის აკეთებს იმას, რასაც შეპირდა. ღმერთისთვის არაფერი წარმოადგენს სირთულეს და გამოწვევას. " გამეფდა ჩვენი უფალი, ღმერთი ყოვლისმპყრობელი” (გამოცხადების 19:6).

► რა მნიშვნელობა აქვს ჩვენთვის იმის ცოდნას, რომ ღმერთი ყოვლისშემძლეა?

[1] ეს გამამხნევებელია, რადგან ჩვენ ვიცით, რომ ჩვენი ბრძოლების ფონზე "მას, ვისაც ჩვენში მოქმედი ძალით შეუძლია განუზომლად მეტის კეთება, ვიდრე ჩვენ ვთხოვთ ან ვფიქრობთ” (ეფესელთა 3:20). მაშინაც კი, თუ ყველაფერი უკონტროლო ჩანს, ჩვენ ვიცით, რომ შესრულდება ღმერთის დიდი გეგმა. შეგვიძლია დარწმუნებით ვილოცოთ, რომ ღმერთს შეუძლია ჩაერიოს ნებისმიერ სიტუაციაში.

ღმერთი ყველგანმყოფელია.

არ არსებობს ადგილი, სადაც ის არ არის და არაფერი ხდება, რასაც ის ვერ ხედავს. ასე ამბობს უფალი: “ცა ჩემი ტახტია, დედამიწა კი ჩემი კვარცხლბეკი” (ესაიას 66:1). ის სამყაროს ღმერთია და მისი ძალა არ შემოიფარგლება რომელიმე რეგიონით. " თუ ვინმე დაიმალება სამალავში, განა მე ვერ დავინახავ მას?” - სიტყვა უფლისა, - “განა ცა და ქვეყანა ჩემით არ არის სავსე?" (იერემიას 23:24). ეს გვარწმუნებს, რომ ღმერთმა იცის ჩვენი მდგომარეობა და პრობლემები. ეს ასევე მოწმობს, რომ არცერთი ქმნილება არ არის დაფარული მისი ხედვისგან, არამედ ყოველივე გაშიშვლებული და ღიაა მის თვალთა წინაშე, ვისაც ვაბარებთ ანგარიშს. (წაიკითხეთ ებრაელთა 4:13).

ღმერთი უცვლელია.

არ ყოფილა დრო, როდესაც ის ღმერთად იქცა და არც არასოდეს იქნება დრო, როდესაც ის შეწყვეტს ღმერთობას. (წაიკითხეთ იაკობის 1:17). არსებობს რელიგიები, რომლებიც თვლიან, რომ ღმერთი განვითარების პროცესშია, მაგრამ ბიბლია გვასწავლის, რომ მისი არსებითა და ბუნებით, თვისებებითა და მიზნებით ღმერთი არასოდეს იცვლება. (წაიკითხეთ მალაქიას 3:6). მას ყოველთვის უყვარს სიმართლე და ყოველთვის სძულს უმართლობა. მარადიული ღმერთი, რომელიც გამოეცხადა მოსეს, როგორც „მე ვარ“, არის იგივე ღმერთი „მე ვარ“ დღევანდელობაში, უსასრულო, მარადიული და უცვლელი მის არსებაში, სიბრძნე, ძალა, სიწმინდე, სამართლიანობა, სიკეთე და ჭეშმარიტება. ის ყოველთვის იგივეა და მისი წლები არ დასრულდება (ფსალმუნის 101:27).

ღმერთი არის ყოვლისმცოდნე.

"მისი გონიერება განუზომელია” (ფსალმუნის 146:5). არ არსებობს სწავლის პროცესი ღმერთისთვის, რადგან მან ყველაფერი იცის. ღმერთს არასდროს არავისგან უსწავლია და ვერავინ მისცემს მას რჩევას. (წაიკითხეთ ესაიას 40:13-14). ღმერთმა იცის მომავალი და ამიტომ არასდროს უკვირს და მოუმზადებელი არ ხვდება მოვლენებს (ფსალმუნის 138:4).

► რა მნიშვნელობა აქვს ჩვენთვის იმის ცოდნას, რომ ღმერთი ყოვლისმცოდნეა?

ღმერთის ცოდნა ასოცირდება ღმერთის სიბრძნესთან, რომელიც გამოიხატება ქმნილებაში და განსაკუთრებით ხსნის გეგმაში. (წაიკითხეთ ფსლმუნის 103:24, რომაელთა 11:33). რადგან მან იცის და ესმის ყველაფერი, მან ყოველთვის იცის რა უნდა გააკეთოს. ღვთის ნება ყოველთვის საუკეთესოა ჩვენთვის, რადგან ღმერთს კარგად ესმის ყველა სიტუაცია და იცის, რა შედეგები მოჰყვება თითოეულ მოქმედებას.

ღმერთი წმიდაა.

ღმერთი პირველ რიგში თავის თავის აღწერს, როგორც წმიდას. ესაია წინასწარმეტყველი არაერთხელ მოიხსენიებს ღმერთს, როგორც „ისრაელის წმიდა.“ ანგელოზები განუწყვეტლივ შესძახიან „წმიდა არს, წმიდა არს, წმიდა არს“ (ესაიას 6:3). ღვთის სიწმინდე თაყვანისცემის საბაბი იყო „ისინი აქებენ შენს სახელს, დიდსა და საშიშს, - წმიდაა იგი” (ფსლმუნის 98:3). ის არის მორალური სრულყოფილების აბსოლუტური სტანდარტი. მის ქმედებებში აღინიშნება ყველა სიკეთის არსებობა და ყოველგვარი ბოროტების არარსებობა და სხვაგვარად ვერასოდეს იქნება. ღვთის სიწმიდე ცხადყოფს, რომ ადამიანს არ შეუძლია ემსახუროს და თაყვანი სცემს მას, სანამ წინასწარ არ გარდაიქმნება მადლის მეშვეობით. (წაიკითხეთ ესაიას 6:5). ღმერთს სურს, რომ ჩვენც ისეთივე წმიდა ვიყოთ, როგორიც ის არის. "არამედ თვითონაც იყავით წმიდები ყოველ საქციელში, როგორც წმიდაა იგი, ვინც თქვენ მოგიწოდათ. რადგან სწერია: “იყავით წმიდები, რადგან წმიდა ვარ მე” (1 პეტრეს 1:15-16).

ღმერთი მართალია.

ღმერთის მოქმედება ყოველთვის სწორია. მისი მოქმედებები მისი წმიდა ბუნებიდან გამომდინარეობს. (წაიკითხეთ მეორე რჯულის 32:4). მისი ბუნება არის სიმართლის სტანდარტი. ის ყოველთვის ასრულებს სიტყვას და არასდროს ამბობს ტყუილს (რიცხვთა 23:19, 2 მეფეთა (სამუელი) 7:28).

► რატომ არის ჩვენთვის მნიშვნელოვანი, რომ ღმერთი მართალია?

მისი სიმართლე საფუძვლად უდევს მის რჯულს, რომელიც სრულყოფილი სტანდარტია ჩვენი მოვალეობებისა მის წინაშე. ის სამართლიანად ასრულებს თავის კანონს, აჯილდოებს მათ, ვინც მას ემორჩილება და სჯის მათ, ვინც არღვევს მას. ის ნუგეშს აძლევს ტანჯულებსა და დაჩაგრულებს, მაგრამ ასევე გვაფრთხილებს, რომ ვერასდროს ვერავინ გაექცევა სასჯელს ცუდი საქმეების კეთების გამო. "შიში უფლისა წმიდაა, მარადიული. უფლის განსჯანი ჭეშმარიტია, ყველა სამართლიანია” (ფსალმუნების 18:9). ის „რომელიც ყოველს თავისი საქმეების მიხედვით მიუზღავს“ (რომაელების 2:6). "ჩვენ ხომ ყველანი წარვდგებით ღვთის სამსჯავროს წინაშე" (რომაელების 14:10).

ღმერთი სიყვარულია.

ეს თვისება განსაკუთრებით მნიშვნელოვანია. წარმოიდგინეთ, რა საშინელი რამ იქნებოდა ღმერთისთვის, რომ ყოფილიყო ყოვლისშემძლე და ყოვლისმცოდნე და არ ვყვარებოდით ჩვენ! რა იქნებოდა, თუ ის წმიდა და მართალი იქნებოდა, მაგრამ არ ვეყვარებოდით? მაგრამ მის აბსოლუტურ ძალასა და სიწმიდესთან ერთად ღმერთს ვუყვარვართ. (წაიკითხეთ ლუკას 18:19, ფსალმუნების 118:68). ღმერთი ზოგადად აკურთხებს მის შემოქმედებას (დაბადების 1:22, 28. ) მან განსაკუთრებით აკურთხა კაცობრიობა ცხოვრებისეული სიკეთეებით და შექმნა სამყარო, როგორც ადგილი, სადაც მათ სიხარულით შეეძლოთ ცხოვრება.[2] მათთვის, ვისაც უყვარს ღმერთი და ემსახურება მას, ის ცხოვრების ყველა ასპექტს კურთხევად აქცევს (რომაელების 8:28). მისი მადლი, წყალობა, მოთმინება და მშვიდობა გვაკურთხებს მისი სიყვარულის გამო. (წაიკითხეთ გამოსვლის 34:6; ეფესელთა 1:7, 2:4-5).

ვინაიდან ისე შეიყვარა ღმერთმა ქვეყნიერება, რომ მისცა თავისი მხოლოდშობილი ძე, რათა ყოველი მისი მორწმუნე არ დაიღუპოს, არამედ ჰქონდეს საუკუნო სიცოცხლე (იოანეს 3:16). ჩვენი ცოდვისა და აჯანყების მიუხედავად, იგი მოწყალებით მოგვმართავს და გვპატიჟებს, რომ მასთან მივიდეთ იესოს მეშვეობით, რომელიც მან შესწირა ჩვენი ცოდვების გამოსასყიდად (1 იოანეს 2:2). ჯვარზე ღმერთი გვიჩვენებს მის გულს, რომელიც ჩვენს მიმართ სიყვარულითა და თანაგრძნობით არის სავსე. “იმაში ჩანს სიყვარული, რომ ჩვენ კი არ შევიყვარეთ ღმერთი, არამედ მან შეგვიყვარა და მოავლინა თავისი ძე, ჩვენი ცოდვების გამოსასყიდ მსხვერპლად” (1 იოანეს 4:10). ღმერთს უყვარს ყველა ადამიანი, მათი რასის, ბუნებრივი შესაძლებლობების ან მიწიერი სტატუსის გავლენის გარეშე და ყველას პატიებას სთავაზობს. (წაიკითხეთ რომაელების 2:11; იაკობის 2:1-5). ამიტომ, ღმერთს სურს, რომ გვიყვარდეს ყველა ადამიანი და მზად ვიყოთ ყველას პატიებისთვის, ვინც არასწორად გვექცევა. სიყვარული და პატიება ღვთის შვილების ნიშნებია. (წაიკითხეთ მათეს 5:43-45).

ღმერთმა თავისი ხატების მსგავსად შეგვქმნა. მიუხედავად იმისა, რომ ჩვენს ცხოვრებას დასასრული აქვს, ხოლო ის უსასრულოა, ჩვენ უფრო ვგავართ მას, ვიდრე სხვა ნებისმიერი მისი ქმნილება. მან ისე შეგვქმნა ჩვენ, რომ შეგვძლებოდა მისი შეცნობა, თაყვანისცემა და სიყვარული. მან ჩვენ თავისთვის შეგვქმნა და, როგორც ნეტარი ავგუსტინე შეგვახსენებს, ჩვენ ვერასოდეს მოვისვენებთ, ვიდრე მასში არ ვპოვებთ სიმშვიდეს. ღმერთისგან განსხვავებით, ყველაფერი მიწიერი უმნიშვნელოა და მხოლოდ ის არის ღირსი ჩვენი სრული ერთგულებისა. სამუდამო კმაყოფილებას ღმერთის გარდა ვერსად ვნახავთ. მისი წყალობით, ჩვენ შეგვიძლია მივიღოთ გამოსყიდვა და შესაძლებლობა, თაყვანი ვცეთ მას ყველაფერზე მეტად, ვენდოთ მას, როგორც ჩვენს ზეციერ მამას და შევასრულოთ მისი ნება ჩვენი ცხოვრების ყველა სფეროში.

შენიშვნა კლასის ლიდერისთვის: ინფორმაციის შემდეგი მონაკვეთი („ღმერთი უზენაესია“) შეიძლება განმარტოს კლასის წევრმა.

ღმერთი ფლობს როგორც აბსოლუტურ ძალაუფლებას, ასევე აბსოლუტურ ხელისუფლებას. როგორც სამყაროს მმართველს, მას შეუძლია შეასრულოს ის, რასაც ინებებს (ფსალმუნის 113:1; ფსალმუნის 134:5-6).

ის ყველაფერს საკუთარი ნების შესაბამისად აკეთებს, არ სჭირდება სხვისი მითითება (ეფესელთა 1:11). რის გაკეთებასაც ის განიზრახავს, ეს აუცილებლად აღსრულდება, რადგან მას ვერავინ შეაჩერებს და არც ისეთი სიტუაცია იარსებებს, რაც მისთვის შეუძლებელს გახდის მისი განზრახვის სისრულეში მოყვანას. (წაიკითხეთ ესაიას 46:9-11). ის აკონტროლებს მიწიერი მმართველების მოქმედებებს, როცა სურს (დაბადების 50:20; საქმეების 4:27-28).

მაგრამ ღმერთმა ადამიანებს თავისუფალი ნება მისცა. მათ შეუძლიათ აირჩიონ სიკეთეებისგან, მაგრამ ასევე შეუძლიათ არჩევანი გააკეთონ კეთილსა და ბოროტს შორის. მათ შეუძლიათ აირჩიონ დაემორჩილონ ღმერთს ან არ დაემორჩილონ მას. მის მიერ შექმნილმა პირველმა ადამიანებმა აირჩიეს ცოდვა. მას შემდეგ თითოეულმა ადამიანმა გააკეთა არჩევანი და მიუხედავად იმისა, რომ ზოგიერთმა სწორი არჩევანი გააკეთა, ყველამ ისევე შესცოდა ამაში.

თუ ღმერთი ყველაფერზე უფლობს, როგორ ასრულებს იგი თავის ნებას სამყაროში, სადაც მილიარდობით არსება თავად აკეთებს არჩევანს?

ღმერთის ნებაა, რომ მას ჰყავდეს ქმნილებები, რომლებიც რეალურ არჩევანს აკეთებენ. ეს ნიშნავს, რომ ის მათ არჩევანს მათ ნაცვლად არ გააკეთებს. ეს ასევე ნიშნავს, რომ რასაც ისინი აკეთებენ, რეალური შედეგები უნდა მოჰყვეს; წინააღმდეგ შემთხვევაში, ისინი რეალურ არჩევანს არ გააკეთებდნენ. თუ ღმერთი როგორმე გააკონტროლებდა ადამიანის ქმედებების შედეგებს ისე, რომ არანაირი ბოროტება არ მომხდარიყო, მაშინ იგი ართმევდა ამ ადამიანს ბოროტების არჩევის შესაძლებლობას.

ღვთის სამართლიანობა, ჭეშმარიტი სამართლიანობაა, რადგან ის განსჯის ხალხს მათი ნებაყოფლობითი ქმედებების გამო. (წაიკითხეთ გამოცხადების 20:12-13). თუ ღმერთი გააკონტროლებდა ყველა მოქმედებას, მისთვის აზრი არ ექნებოდა, პიროვნებას დასჯიდა, თუ დააჯილდოვებდა.

ღმერთს სურს, რომ ხალხმა სწორი არჩევანი გააკეთონ, მაგრამ ყველაზე მეტად მას სურს, რომ მათ რეალური არჩევანი გააკეთონ. ამიტომ სამყარო ისეთია, როგორიც არის. სამყარო არის ღმერთისგან მიღებული სიკეთეების, ადამიანთა კარგი და ცუდი მოქმედებების შედეგებისა და იმ სიკეთის ნაზავი, რაც ღმერთს გამოაქვს თუნდაც ადამიანების ცუდი ქმედებებიდან.

ჩვენ ვხედავთ ღმერთის პრიორიტეტებს ხსნის გეგმაში. ის ყველას ხსნას სთავაზობს და სურს, რომ ყველა გადარჩეს. იგი თითოეულ ადამიანს აძლევს ძალას, მიიღონ სახარება, მაგრამ ამას არ აიძულებს. ამიტომ წმინდა წერილებში გამოიყენება მოწვევები, შეთავაზებები და დარწმუნება.[1] ღმერთი სთავაზობს ხალხს არჩევანს და აღწერს მათ შედეგებს.

ჩვენ ვქადაგებთ სახარებას სრული დარწმუნებით, იმაში რომ ყოველი ადამიანის გადარჩენა შეიძლება. ჩვენი მისიაა სულიწმიდასთან თანამშრომლობით,

დავარწმუნოთ ხალხი, დაემორჩილონ ღმერთს. (წაიკითხეთ 2 კორინთელთა 5:11).

► კლასმა ორჯერ მაინც უნდა წაიკითხოს „მრწამსის აღიარება.”

არსებობს ერთი ღმერთი, რომელმაც შექმნა სამყარო და არის უფალი ყველაფერზე. ის არის მარადიული, უცვლელი სული. ის არის ყოვლისშემძლე, ყოვლისმცოდნე და ყველგანმყოფელი. ის აბსოლუტურად წმიდაა თავისი ბუნებით და მართალია ყველაფერში, რასაც აკეთებს. ის აკურთხებს თავის ქმნილებას და უყვარს ყველა ადამიანი, სთავაზობს პატიებას და ურთიერთობას მასთან.

(1) წმიდა წერილის შესასწავლი ადგილების დავალება: თითოეულ სტუდენტს უნდა დაევალოს ქვემოთ ჩამოთვლილთაგან ერთ–ერთი ადგილი. შემდეგი გაკვეთილის წინ მან უნდა კლასში წაიკითხოს ეს ადგილი და დაწეროს აბზაცი იმის შესახებ, თუ რას ამბობს ის, ამ გაკვეთილში მთავარი განხილვის საგანთან დაკავშირებით.

• ესაიას 46,

• იგავების 9:10,

• ფსალმუნების 138:1-4,

• გამოცხადების 4:9-11,

• იონას 1:3

(2) ტესტი: შემდეგ მეცადინეობას დაიწყებთ მე-2 გაკვეთილის ტესტით. მოსამზადებლად კარგად შეისწავლეთ ტესტის საკითხები.

(3) სწავლების დავალება: არ დაგავიწყდეთ, რომ დაგეგმოთ და აცნობოთ თქვენი კლასის გარეთ ჩატარებული გაკვეთილების დრო.

(1) რომელია მამაკაცის ყველაზე მნიშვნელოვანი მახასიათებელი?

(2) რომელია ყველაზე სერიოზული შესაძლებელი შეცდომა?

(3) რომელია წმინდა წერილის პირველი გაკვეთილი ღმერთთან დაკავშირებით?

(4) დაასახელეთ ღმერთის თვისება, რომელიც ემთხვევა თითოეულ დებულებას:

• ჩვენ ვერ აღვწერთ, თუ როგორ გამოიყურება ღმერთი.

• ღმერთი ყოველთვის არსებობდა.

• ღმერთი არ არის უპიროვნო ძალა.

• ღმერთის ბუნება უცვლელია.

• ღმერთს შეუძლია გააკეთოს ის, რასაც თავად აირჩევს.

• ღმერთი ხედავს ყველაფერს.

• ღმერთმა თავისი ძე წარმოგზავნა, რომ შევეწყალებინეთ.

• ღმერთი თავისი ბუნებით სამპიროვანია.

• ღმერთი ზნეობრივად აბსოლუტურად სრულყოფილია.

• ღმერთის მოქმედება ყოველთვის მართებული და სამართლიანია.