(1) სტუდენტი შეძლებს განმარტოს:

• რამდენიმე დეტალი ანგელოზების ბუნების შესახებ.

• ანგელოზების ჩართულობა მორწმუნის ცხოვრებაში.

• სატანის და სხვა ბოროტი სულების დაცემა.

• სულიერი კონფლიქტი, რომელიც არსებობს სულიერ სამყაროში.

• ღმერთისა და მორწმუნეების საბოლოო გამარჯვება ბოროტ ძალებზე.

• ქრისტიანული მრწამსის აღიარება სულიერების შესახებ.

(2) სტუდენტი თავს აარიდებს არასწორ ინტერესს სულიერი სამყაროს მიმართ.

► წაიკითხეთ ერთად მათეს 4:1-11. რას გვეუბნება ეს მუხლები ბოროტი სულების შესახებ?

როდესაც ადამიანები ანგელოზებზე საუბრობენ, პირველი კითხვა ასეთია: „როგორ გამოიყურებიან ანგელოზები?” ბევრი მხატვარი ცდილობდა მათ აღწერას.

► როგორ გამოიყურებიან ანგელოზები?

აქვთ ანგელოზებს ფრთები? სერაფიმებს, რომლებიც ესრაიამ იხილა, ექვსი ფრთა ჰქონდათ (ესაიას 6:2). ქერუბიმებს, რომელთაც ღმერთმა მოსეს უთხრა, რომ აღთქმის კიდობანე დაესვათ, ფრთები ჰქონდათ (გამოსვლის 25:20). ქერუბიმებს, რომლებიც ეზეკიელმა იხილა, ოთხი ფრთა ჰქონდათ (ეზეკიელის 1:6, 10:15).

ჩვენ არ ვიცით, ანგელოზებს ზოგადად აქვთ, თუ არა ფრთები. მათ არ სჭირდებათ ფრთები გადაადგილებისთვის, რადგან ისინი სულები არიან და გაცილებით დიდი სიჩქარით მოძრაობენ, ვიდრე ფრთების გამოყენებით ფრენისას. როგორც სულებს, მათ ასევე არ ექნებოდათ ფიზიკურ სხეულები. ანგელოზებისთვის ფრთები საჭირო არაა.

ხელოვანების დიდი ნაწილის საპირისპიროდ, ბიბლია არასდროს აღწერს ანგელოზებს, როგორც ქალებსა და ბავშვებს. ისინი გამოჩნდნენ მამაკაცის ფორმაში, მაგრამ არ აქვთ სქესი ადამიანური გაგებით. მათ არაფერი აქვთ ქორწინების, ან ოჯახური ურთიერთობის მსგავსი. (წაიკითხეთ მათეს 22:30). თითოეული ინდივიდუალურადაა შექმნილი.

ანგელოზები, როგორც წესი, ხალხისთვის უხილავი არიან, მაგრამ ისინი შეიძლება გამოჩნდნენ, როდესაც ამის მიზანი არსებობს. ზოგჯერ, როდესაც ანგელოზი გამოჩნდებოდა, ხალხი თავიდან ფიქრობდა, რომ ის ჩვეულებრივი ადამიანი იყო (დაბადების 19:1-2). სხვა დროს ანგელოზები ისეთი გაბრწყინებით გამოჩნდნენ, რომ ხალხი შიშით მიწაზე დაემხო (მათეს 28:2-4). როდესაც ანგელოზი ვინმეს ეცხადებოდა, ის ჩვეულებრივ იწყებდა სიტყვებით: „ნუ გეშინია.“ (წაიკითხეთ ლუკას 1:13, 1:30, 2:10).

ანგელოზები სულები არიან, მაგრამ ამის გამო მათზე არ უნდა ვიფიქროთ, რომ ისინი ნაკლებად რეალურები არიან.[1] ბიბლია გულისხმობს, რომ სულები უფრო ძლიერები არიან, ვიდრე რაიმე ფიზიკური. (წაიკითხეთ ესაიას 31:3).

ანგელოზებს ღვთის შვილებს უწოდებენ (იობის 1:6). და მათ აქვთ ღმერთის ბუნების მსგავსი ბუნება, მაგრამ არა ისე, როგორც ადამიანებს. ახლა ანგელოზები ბევრად აღემატებიან ადამიანებს ძალაუფლებით და ინტელექტით, მაგრამ ადამიანები ოდესმე ანგელოზებზე მაღლა დადგებიან. (წაიკითხეთ 1 კორინთელთა 6:3).

ანგელოზების შექმნა არ არის ნახსენები დაბადების წიგნში. ისინი დედამიწამდე შეიქმნენ და ხარობდნენ, როდესაც დაინახეს, როგორ ქმნიდა მას ღმერთი (იობის 38:4-7)

ანგელოზები უკვდავები არიან (ლუკას 20:36). ის, რომ ისინი დედამიწაზე ადრე შეიქმნენ, ნიშნავს, რომ ყველა ანგელოზი ათასობით წლის განმავლობაში ცხოვრობდა და აკვირდებოდა კაცობრიობის მთელ ისტორიას.

ანგელოზებს აქვთ პიროვნება. მათ შეუძლიათ ლაპარაკი და ურთიერთობა (ლუკას 1:18-20). ისინი თაყვანს სცემენ ღმერთს, რაც ნიშნავს, რომ მათ შეუძლიათ რაიმე გაიგონ მისი ბუნების შესახებ და შეძლონ მასზე პასუხის გაცემა მოშიშებით (ებრაელთა 1:6). ისინი ხარობენ, როდესაც ცოდვილი ინანიებს, რაც ცხადყოფს, რომ მათ აქვთ ემოციები. (წაიკითხეთ ლუკას 15:10). ისინი ძალიან არიან დაინტერესებული ხსნის გეგმის გაგებით, რაც ცხადყოფს, რომ მათ ინტელექტუალური შესაძლებლობები აქვთ. (წაიკითხეთ 1 პეტრეს 1:12). მათ იზეიმეს იესოს დაბადების შესახებ უწყების გამო (ლუკას 2:13-14).

ანგელოზები ყველა ერთნაირი არ არის, რადგან ზოგს ქერუბიმებს და ზოგს სერაფიმებს უწოდებენ. არსებობს ანგელოზების იერარქიაც, რადგან ბიბლია საუბრობს როგორც ანგელოზებზე, ისე სულ მცირე ერთ მთავარანგელოზზე და ახსენებს „ეშმაკს და მის ანგელოზებს.” მათ შორის არსებობს ავტორიტეტის სტრუქტურის სისტემა, რომელსაც უწოდებენ ტახტებს, სამფლობელოებსა და სამთავროებს. (წაიკითხეთ კოლასელთა 1:16; ეფესელთა 6:12).

ებრაულ და ქრისტიანულ ტრადიციებში ბევრი რამ დაიწერა ანგელოზების შესახებ, რაც ბევრად აღემატება იმას, რაც წმინდა წერილიდან ვიცით.

წმინდა წერილში ბევრი რამ არ არის გამოვლენილი ანგელოზების განსხვავებების შესახებ. ტერმინი მთავარანგელოზი მხოლოდ ორჯერ არის გამოყენებული ბიბლიაში. მიქაელს მთავარანგელოზს უწოდებენ და იესოს დაბრუნებისას მთავარანგელოზის ხმა იქნება (იუდას 1:9; 1 თესალონიკელთა 4:16). ტერმინი "მთავარანგელოზი" სიტყვასიტყვით ნიშნავს მთავარ ანგელოზს. ჩვენ არ ვიცით რამდენი მთავარანგელოზი არსებობს.

სერაფიმი მოხსენიებულია ბიბლიაში მხოლოდ ესაიას მე -6 თავში. მათ ექვსი ფრთა ჰქონდათ. იმის გარდა, რომ მათ ფრთები აქვთ, ისინი შეიძლება გარკვეულწილად ადამიანურად გამოიყურებოდნენ, რადგან მათ ჰქონდათ ხელები, ფეხები და სახეები.

ქერუბიმი და ცეცხლოვანი ხმალი მოათავსეს ედემის ბაღში ადამისა და ევას განდევნის შემდეგ (დაბადების 3:24). ეს იმისთვის იყო, რომ ბაღი მიუწვდომელი ყოფილიყო. ეზეკიელის მიერ ქერუბიმების აღწერა, რომელიც მან იხილა, ძალიან განსხვავდება ნებისმიერი სხვა არსებისგან, რომელიც ჩვენთვის ცნობილია. მათ ჰქონდათ ოთხი ფრთა, ოთხი განსხვავებული სახე, რამდენიმე ხელი, ცეცხლივით ნათება, ელვისებური ბრწყინვალება და ელვის სისწრაფე (ეზეკიელის 1:5-14; 10:15).

აღთქმის კიდობნის ბოლოებზე განთავსებული იყო ორი ქერუბიმის გამოსახულება, ამათ შორის იყო წყალობის ტახტი. სულ მცირე, რვაჯერ მაინც არის ნახსენები ბიბლიაში, რომ ღმერთი ქერუბიმებს შორისაა.[2] ამან ის გამოარჩია, როგორც ისრაელის ღმერთი, რომელსაც თაყვანს სცემდნენ ტაძარში, და ასევე აჩვენა, რომ იგი მიუწვდომელი იყო, გარდა მისი მითითებული გზებისა.

ღვთის ძალა და დიდებულება ჩანს მის მსახურებში. ქერუბიმები ისეთი ქმნილებები არიან, რომ ადამიანს, რომელიც ხედავს მას, შეიძლება იფიქროს, რომ ღმერთს ხედავს და თაყვანი სცეს მას, მაგრამ ის მხოლოდ ღვთის მსახურია.

ის ფაქტიც, რომ ღმერთს თან ახლავს ამდენი ანგელოზი, მის დიდებულებას აჩვენებს. იოანე მოციქულმა იხილა უამრავი ანგელოზი ღვთის ტახტის გარშემო, რომლებზეც მან თქვა: “მათი რიცხვი იყო ათიათასთა ათიათასები და ათასთა ათასები” (გამოცხადების 5:11).[3]

ანგელოზის ძალა არ არის შეუზღუდავი, რადგან ჩვენ ვკითხულობთ, რომ დანიელისთვის ცნობის მიტანა დაგვიანდა წინააღმდეგობის გამო. (წაიკითხეთ დანიელის 10:12-13). მიუხედავად ამისა, ღმერთს შეუძლია მისცეს მათ იმდენი ძალა, რამდენიც სჭირდებათ ნებისმიერი დავალების შესრულებისას, მაგალითად, იმ დროს, როდესაც ერთმა ანგელოზმა 185000 ჯარისკაცი მოკლა (4 მეფეთა 19:35).

როგორც ჩანს, ანგელოზებს ეკისრებათ პასუხისმგებლობები. ბიბლია გვეუბნება, რომ ისინი მოსამსახურებლად მივლენილნი არიან მათთან, ვინც ხსნას მიიღებს. (წაიკითხეთ ებრაელთა 1:14). ანგელოზები გარშემორტყმულნი არიან და მფარველობენ ღმერთის მსახურებს (ფსალმუნის 33:8). შეგვიძლია ვივარაუდოთ, რომ მრავალი ანგელოზი იმყოფება ჩვენთან მუდმივად. იესომ თქვა, რომ ბავშვებს ანგელოზები ჰყავთ დანიშნული. (წაიკითხეთ მათეს 18:10). მთავარანგელოზ მიქაელს უწოდებენ მთავარს, რომელიც იცავს ისრაელის ერს (დანიელის 12:1).

ბიბლია არასოდეს ამბობს, რომ ანგელოზებს უნდა ვევედროთ. ის არ ამბობს იმასაც, რომ ჩვენ უნდა ვეცადოთ მათთან რაიმე სახით ურთიერთობას. ისინი არ არიან შუამავლები ჩვენსსა და ღმერთს შორის. არსებობს გაფრთხილება იმ ადამიანების შესახებ, რომლებიც თაყვანს სცემენ ანგელოზებს და მონაწილეობენ სულიერი სამყაროს საკითხებში, რაც მათ ნამდვილად არ ესმით. (წაიკითხეთ კოლასელთა 2:18). თუ ჩვენ ვცდილობთ ურთიერთობა გვქონდეს ანგელოზებთან ისე, როგორც ღმერთს არ სურს, ღვთის ანგელოზების ნაცვლად ბოროტი სულები გვიპასუხებენ.

► საიდან წარმოიშვნენ ბოროტი სულები?

ბოროტი სულები არიან ანგელოზები, რომლებიც ღვთის წინააღმდეგ აჯანყდნენ. ეს მოხდა ადამიანის შექმნამდე და ამის შესახებ ბიბლია ბევრს არაფერს ცხადყოფს.

თავიდან ყველა ანგელოზი კეთილად და წმინდად იყო შექმნილი და ბიბლია მათ "წმინდა ანგელოზებს" უწოდებს” (მათეს 25:31). სატანა აჯანყების მეთაური იყო და მას ანგელოზების მესამედიც მიყვებოდა (გამოცხადების 12:4). იუდა საუბრობს ანგელოზებზე, რომლებმაც დატოვეს თავიანთი პირველადი პოზიცია (იუდას 6). ისინი უკვე მსჯავრდადებულნი არიან ღვთის განაჩენით. (წაიკითხეთ იოანეს 16:11, 2 პეტრეს 2:4)

წინასწარმეტყველთა წიგნებში ორი მონაკვეთია, რომლებიც შეიძლება სატანის დაცემას ეხებოდეს (ესაიას 14:12-17 და ეზეკიელის 28:12-19). თითოეული მონაკვეთი საუბრობს ადამიანზე, მიწიერ მეფეზე და შემდეგ, როგორც ჩანს, საუბრობს ისეთ საკითხებზე, რომლებიც მხოლოდ ადამიან მეფეს არ ეხება. მათ შეუძლიათ შეადარონ მეფის დაცემა სატანის დაცემას.

როგორც ჩანს, სატანა გაამპარტავნდა და ღმერთისგან დამოუკიდებლობა სურდა. მოციქულმა პავლემ გაგვაფრთხილა, რომ ადამიანი შეიძლება ამპაეტავნად იქცეოდეს და იმავე მსჯავრში ჩავარდეს, როგორშიც ეშმაკი. (წაიკითხეთ 1 ტიმოთეს 3:6). ეს იგივე ცდუნება იყო, რაც ეშმაკმა შესთავაზა ადამს და ევას, როდესაც მან თქვა, “თქვენ ღმერთებივით იქნებით.” ეს არის ცდუნება, უარყო ღვთის ავტორიტეტი და გახდე შენი თავის ღმერთი.

► რა არის ის, რაც სატანის შესახებ ვიცით?

სატანა კვლავ ხელმძღვანელობს ღმერთის წინააღმდეგ აჯანყებას. მას უწოდებენ „ჰაერის ძალთა მთავარს” (ეფესელთა 2:2). სატანას "ქვეყნიერების მმართველს" უწოდებენ, რადგან ქვეყნიერების ხალხი ძირითადად ღვთის წინააღმდეგ აჯანყებულია (იოანეს 12:31). იგი აცხადებს, რომ ფლობს მსოფლიოს სამეფოებს და მათ დროებით მისცემს იმას, ვისაც აირჩევს (ლუკას 4:4-6). იგი ცოდვილებს გონებას უბნელებს, რათა სახარება არ მიიღონ. (წაიკითხეთ 2 კორინთელთა 4:4). ცოდვილები მის ტყვეებაში იმყოფებიან (2 ტიმოთეს 2:26). მას ადამიანთა გონებიდან მიაქვს ღვთის სიტყვა, რომ მას არანაირი შედეგი არ მოჰყვეს. (წაიკითხეთ მარკოზის 4:15). მან ჩადო ანანიასა და საფირას გულებში ეკლესიისა და სულიწმიდის წინაშე ტყუილის თქმის გეგმა (საქმეების 5:3). და იუდაში შევიდა იესოს ღალატის სურვილით (ლუკას 22:3). ის იგონებს არასწორ რელიგიურ მოძღვრებებს, რომლებსაც ღვთის სიტყვა უწოდებს "ეშმაკის სწავლებას" და აღძრავს ხალხს, რომ ასწავლონ ისინი. (წაიკითხეთ 1 ტიმოთეს 4:1).

სატანას სძულს ღმერთი და ამიტომ სძულს ადამიანი, რომელიც ღვთის ხატად არის შექმნილი და ღმერთის უდიდესი კეთილგანწყობის ობიექტია. ის ცდილობს რაც შეიძლება მეტი ადამიანი მიიყვანოს იმავე სამსჯავროზე, რომელიც მან მიიღო, აიძულებს მათ აჯანყებულები იყვნენ ღვთის წინააღმდეგ.

ვინც შეგნებულად ემსახურება სატანას, ყველაზე მეტად მოტყუებული ხალხია მსოფლიოში, რადგან ისინი აჯანყებაში არიან, რომლებსაც წარმატება არ მოყვება, და ისინი ემსახურებიან ბატონს, რომელსაც სძულს ისინი და მხოლოდ მათი განადგურებით არის დაინტერესებული. ის იძლევა დაპირებებს, რომლებსაც იცის, რომ ვერ შეასრულებსl.

სხვები სატანას გაუცნობიერებლად მისდევენ, როდესაც ცოდვაში ცხოვრობენ. ამიტომ ის დიდ დროს და ენერგიას უთმობს ცდუნებას და მოტყუებას. მას სურს აიძულოს ხალხი უარყონ ღვთისადმი რწმენა, ღმერთის თაყვანისცემის ნაცვლად შექმნილ კერპებს ემსახურონ. მისი ცდუნებები ტყუილია, რადგან მას სინამდვილეში არაფერი აქვს შესათავაზებელი, გარდა ღმერთის შექმნილის დამახინჯებისა. ეშმაკს არანაირი სიხარული და სიამოვნება არ შეუქმნია: ღმერთმა შექმნა ისინი ყველა. ეშმაკს მხოლოდ სიამოვნებების გაუკუღმართებული ფორმების შეთავაზება შეუძლია, რომლებიც ღვთის ნების მიღმაა.

გარკვეული ბოროტი სულები აშკარად ყურადღებას ამახვილებენ გარკვეულ გეოგრაფიულ ადგილებზე ან ადამიანთა ჯგუფებზე. ისევე, როგორც ანგელოზ მიქაელს უწოდებდნენ მთავარს, რომელიც იცავს, არსებობდნენ ბოროტი სულები, რომლებსაც სპარსეთისა და საბერძნეთის მთავრებს უწოდებდნენ (დანიელის 10:13, 20). ზოგიერთი სულები ხალხთა ღმერთები გახდნენ.

სატანას სურს, რომ თაყვანი სცენ. (წაიკითხეთ მათეს 4:9). ბოროტი სულები მოქმედებენ ცრუ რელიგიების საშუალებით. ბიბლია გვეუბნება, რომ როდესაც ადამიანები თაყვანს სცემენ კერპებს ისინი დემონებს სცემენ თაყვანს. (წაიკითხეთ მეორე რჯულის 32:17; 1 კორინთელთა 10:20-21). დემონები რეაგირებენ იმ ხალხის თაყვანისცემაზე, ვინც არ იცის რას ეთაყვანება. როგორც ღმერთის თაყვანისმცემელი უფრო ჰგავს ღმერთს და სიამოვნებს სიწმინდე, ასევე, ბოროტი სულების თაყვანისმცემელი უფრო ბოროტი ხდება და სიამოვნებს ბოროტება. ალბათ ყველაზე უარესი თაყვანისცემა, რაც ოდესმე ყოფილა, იყო მაშინ, როდესაც ადამიანები საკუთარ შვილებს სწირავდნენ დემონებს. (წაიკითხეთ ფსალმუნის 105:37).

სატანა და სხვა დემონები ცდილობენ სრულად გააკონტროლონ ადამიანების გონება და ქცევა. ამას ეწოდება "დემონით შეპყრობილობა". ზოგი ადამიანი შეგნებულად უთმობს თავს ამ ძალებს; შესაძლოა სხვებმა გაუცნობიერებლად დაუშვეს ეს. ზოგი ადამიანი ნაბიჯ-ნაბიჯ შევიდა ამ მდგომარეობაში, ფიქრობდნენ რა, რომ ისინი იძენდნენ ძალაუფლებას, რომელსაც საკუთარი მიზნებისთვის გამოიყენებდნენ. ასე შეპყრობილი ადამიანი ხდება ბოროტი სულების მონა, თვითგანადგურებისკენ მიდრეკილი, რომელიც განიცდის საშინელ გონებრივ და ემოციურ ტანჯვას. (წაიკითხეთ მარკოზის 5:2-5). მხოლოდ იესოს შეუძლია გაათავისუფლოს ადამიანი ამ მონობისგან.

იმ ქვეყნებში, სადაც სახარებას ფართოდ ქადაგებენ, ბოროტი სულების მოქმედება ჩვეულებრივ შენიღბულია. ბედის ირონიით, სწორედ ამ "ცივილიზებულ" ქვეყნებში არის ხალხი ყველაზე საერო (არა ეკლესიური), რომლებიც დასცინიან ყველაფერს ზებუნებრივს და უარყოფენ სულების არსებობას. ასეთ გარემოში ბოროტი სულები ღიად არ იქცევიან, რადგან თუ ისინი შეაშინებდნენ სახარება მოსმენილ ხალხს, ბევრი მათგანი ღმერთს მიმართავდა ხსნისა და დაცვისთვის.

იმ ქვეყნებში, სადაც სახარება ნაკლებად არის ცნობილი, ბოროტი სულები ღიად მოქმედებენ. იქაურმა ხალხმა არ იციან, რომ მათ შეუძლიათ ქრისტესგან ხსნა მიიღონ, აქედან გამომდინარე, დემონების ძალა აშინებს მათ და ემორჩილებიან. ისინი სულებს ემსახურებიან, არა სურვილითა და სიხარულით, არამედ შიშით. სახარება ეს არის ხსნისა და თავისუფლების მშვენიერი გზავნილი.

ეშმაკის მუდმივი თავდასხმების გამო, ჩვენ სულიერ ომში ვართ. ჩვენ გაფრთხილებულნი ვართ, რათა გვახსოვდეს, რომ ჩვენი ომი სულიერ სამყაროშია და არა ფიზიკური მტრების წინააღმდეგ. (წაიკითხეთ ეფესელთა 6:12) გვეუბნებიან, რომ უნდა ავიღოთ სულიერი აბჯარი, ასე რომ შეგვიძლია დავიცვათ თავი (ეფესელთა 6:13). ჩვენ შეგვიძლია დარწმუნებული ვიყოთ გამარჯვებაში, რადგან ეშმაკს არ შეუძლია წინააღმდეგობა გაუწიოს ჩვენში არსებულ ღვთის ძალას, და როდესაც ჩვენ წინააღმდეგობას გავუწევთ ეშმაკს, ის გაიქცევა ჩვენგან (იაკობის 4:7).

► არის, თუ არა ეშმაკი ღმერთის საპირწონე?

ეშმაკს აქვს ძალა, რომელიც გაცილებით აღემატება იმას, რაც აქვს ადამიანს ახლანდელ, მოკვდავ მდგომარეობაში. ამასთან, მისი ძალა არაფერია ღვთის ძალასთან შედარებით. იგი არ უნდა განვიხილოთ ღმერთის საპირწონედ, თითქოს მას ღმერთთან თანაბარი ძალა ჰქონდეს. ზოგი ფილოსოფოსი ფიქრობს, რომ სიკეთისა და ბოროტების ძალები მსოფლიოში დაახლოებით თანაბარია. ეს სიმართლისგან შორს არის. სატანა არ არის ყველგან, არ იცის ყველაფერი და უშვებს შეცდომებს. ღმერთი არის სულების შემქმნელი და მათ არ შეუძლიათ დაამარცხონ ის. როდესაც ადამიანის გამოცდის დრო დასრულდება, ყველა ბოროტი სული განიკითხება, შეპყრობილი იქნება და დაისჯება ცოდვილ ადამიანებთან ერთად.

სატანის დამარცხების დაპირება დიდი ხნის წინ მოხდა. ღმერთმა აღუთქვა, რომ მაცხოვარს გამოგზავნიდა გველის თავის გასაჭეჭყად (დაბადების 3:15). იესო ეშმაკის საქმეების გასანადგურებლად მოვიდა და ცოდვაზე გამარჯვება მოგვცა. (წაიკითხეთ 1 იოანეს 3:8). იესო თავისი სიკვდილით და მკვდრეთით აღდგომით არ აძლევს სატანას სიკვდილზე ძალაუფლებას (ებრაელთა 2:14; გამოცხადების 1:18). სატანისა და სხვა ბოროტი სულების საბოლოო და მარადიული ბედი ცეცხლის ტბაა. (წაიკითხეთ მათეს 25:41).

ღმერთმა უკვე შეზღუდა ის, რისი გაკეთებაც სატანას შეუძლია (იობის 1:12; 2:6). ეს იმას ნიშნავს, რომ ჩვენ არ უნდა ვიცხოვროთ იმის შიშით, რომ სატანას შეუძლია ჩვენ ზიანი მოგვაყენოს. ვერაფერი მოხდება, თუ ღმერთი არ დაუშვებს და მან კი იცის, რისი გამკლავებაც შეგვიძლია.

ჩვენ არა მხოლოდ დაცულნი ვართ სატანის თავდასხმებისგან, არამედ ჩვენ შეგვიძლია გავზარდოთ ღვთის სამეფო სატანის სამეფოს წინააღმდეგ. იესომ მისცა ძალა ყველა თავის მოწაფეს, არა მხოლოდ მოციქულებს, ბოროტი სულების განსადევნად. (წაიკითხეთ ლუკას 10:17). როდესაც სახარებას ვქადაგებთ, ღმერთი თავის ჭეშმარიტების ძალით მოსავს და ათავისუფლებს სატანისგან მათ, ვინც სახარებას ეხმაურება და იღებს.

შენიშვნა კლასის ლიდერისთვის: კლასის წევრი შეიძლება შეირჩეს ქვემოთ მოცემულ ინფორმაციის ასახსნელად. („თავიდან ასარიდებელი შეცდომა: არასწორი ინტერესი სულიერი სამყაროს მიმართ“)

ზოგი ადამიანი მოხიბლულია სულიერი სამყაროთი. ისინი იწყებენ ანგელოზების შესწავლას და შეიძლება სცადონ მათთან ურთიერთობაში შესვლა. ბიბლია არასოდეს ამბობს, რომ ანგელოზების მიმართ უნდა ვილოცოთ, ან რომ ჩვენ უნდა ვეცადოთ მათთან რაიმე სახით ურთიერთობას. ბიბლია გვაფრთხილებს, რომ მათ არ ვცეთ თაყვანი და არ ვეცადოთ ვიცოდეთ მათზე იმაზე მეტი, რისი გაგებაც შეგვიძლია.(კოლასელთა 2:18)

კიდევ უფრო სახიფათოა ადამიანის დაინტერესება ბოროტი სულებით. ზოგი ადამიანი მოხიბლულია მათი ძალით და იმ საქმეებით, რის გაგეთებაც მათ შეუძლიათ. არსებობს თამაშები, რომლებიც ურთიერთქმედებენ სულებთან. არსებობს მეთოდები, რომლებსაც ადამიანები იყენებენ სულებისგან ინფორმაციის მისაღებად. ჩვენ არასოდეს უნდა ჩავერთოთ ბოროტ სულებთან ურთიერთობაში, გარდა იმ შემთხვევებისა, როდესაც მათ ღვთის ძალით გავუწევთ წინააღმდეგობას.

ზოგიერთმა ადამიანმა შეიმუშავა რთული და დეტალური ახსნა სულიერი სამყაროსა და მისი მუშაობის შესახებ. ფაქტია, რომ ბიბლიამ ამდენი რამ არ გაგვიმხილა. ღმერთმა გაგვიმხილა ის, რაც უნდა ვიცოდეთ.

► კლასმა ორჯერ მაინც უნდა წაიკითხოს „მრწამსის აღიარება.”

ღმერთმა შექმნა ყველა სული. წმინდა ანგელოზები თაყვანს სცემენ ღმერთს და იცავენ მორწმუნეებს. ანგელოზები არიან უკვდავი პიოვნებები, რომელთაც შეუძლიათ ლაპარაკი, თაყვანისცემა და მსჯელობა. მათ გააკეთეს მორალური არჩევანი. სატანა და სხვა ანგელოზები ცოდვაში ჩავარდნენ და ღმერთისა და ადამიანის მტრები გახდნენ. ღმერთი ზღუდავს სატანის ძალას და მას სამუდამო სასჯელი მიუსაჯა.

(1) წმიდა წერილის შესასწავლი ადგილების დავალება: თითოეულ სტუდენტს უნდა დაევალოს ქვემოთ ჩამოთვლილთაგან ერთ–ერთი ადგილი. შემდეგი გაკვეთილის წინ მან კლასში უნდა წაიკითხოს ეს ადგილი და დაწეროს აბზაცი იმის შესახებ, თუ რას ამბობს ის, ამ გაკვეთილში მთავარი განხილვის საგანთან დაკავშირებით.

• 1 პეტრეს 5:8-9
• საქმეების 12:7-11
• მათეს 12:43-45
• 2 კორინთელთა 11:13-15
• ლუკას 8:27-35

(2) ტესტი: შემდეგ მეცადინეობას დაიწყებთ მე-6 გაკვეთილის ტესტით. მოსამზადებლად კარგად შეისწავლეთ ტესტის საკითხები.

(3) სწავლების დავალება: არ დაგავიწყდეთ, რომ დაგეგმოთ და აცნობოთ თქვენი კლასის გარეთ ჩატარებული გაკვეთილების დრო.

(1) როდის შეიქმნენ ანგელოზები?

(2) რამდენი ხანი ცხოვრობენ ანგელოზები?

(3) საიდან ვიცით, რომ ანგელოზებს ჩვეულებრივ ფიზიკური სხეულები არ აქვთ?

(4) საიდან ვიცით, რომ ანგელოზებს აქვთ პიროვნება?

(5) რომელია ბიბლიის სხვადასხვა სიტყვები, რომლებიც ანგელოზებს ეხება?

(6) რა არის ის, რასაც ანგელოზები აკეთებენ მორწმუნეებისთვის?

(7) საიდან წარმოიშვნენ ბოროტი სულები?

(8) რას სცემს თაყვანს სინამდვილეში კერპთაყვანისმცემელი?

(9) რა ბედი ეწევა სატანასა და სხვა ბოროტ სულებს?